ساپاربايەۆ جاڭا تاعايىندالعان اۋدان اكىمىنە بىرنەشە تاپسىرما بەردى
اقتوبە وبلىسى العا اۋدانىنىڭ اكىمى بولىپ 42 جاستاعى ناعىمجان الدياروۆ تاعايىندالدى. ول بۇعان دەيىن اقتوبە قالاسى اكىمىنىڭ ورىنباسارى قىزمەتىن اتقاردى.
اۋدان اكتيۆىمەن كەزدەسكەن وبلىس اكىمى بەردىبەك ساپاربايەۆ جاڭا باسشىعا ءبىرقاتار تاپسىرما جۇكتەدى.
«ەلباسى نۇرسۇلتان نازاربايەۆ ەكونوميكا وسىمىنە قول جەتكىزۋدى قامتاماسىز ەتۋدى تاپسىردى. ون ايدىڭ قورىتىندىسى بويىنشا وبلىسىمىزدىڭ ەكونوميكاسى 5 پايىزدى قۇرادى. وسى جۇمىستى جالعاستىرىپ، پرەزيدەنت تاپسىرماسىن ورىنداۋ قاجەت. ول ءۇشىن بىزدە بارلىق قور بار»، - دەدى ءوڭىر باسشىسى بەردىبەك ساپاربايەۆ.
وبلىس ورتالىعىنا جاقىن ورنالاسقان العا اۋدانىندا اۋىل شارۋاشىلىعى، ءوندىرىس جاقسى دامىعان. مۇندا وندىرىسكە قاجەتتى جارىلعىش زاتتار شىعاراتىن زاۋىت، قيىرشىق تاس زاۋىتى بار.
«جەرى قۇنارلى، سۋ قورى جەتكىلىكتى، اۋدان اقتوبە قالاسىنا وتە جاقىن ورنالاسقان. اۋىل شارۋاشىلىعىن دامىتۋعا بولادى. سونىمەن قاتار، سۋارمالى جەرلەردى اينالىمعا ەنگىزۋ، اۋىل شارۋاشىلىعىنىڭ ءداستۇرلى ەمەس ءتۇرىن دامىتۋ، قايتا وڭدەۋدى ارتتىرۋ باعىتىنداعى جۇمىستى جانداندىرۋ كەرەك»، - دەدى ب. ساپاربايەۆ.
اقتوبە وبلىسى اكىمىنىڭ باسپا ءسوز قىزمەتىنىڭ حابارلاۋىنشا، جەرگىلىكتى بيۋدجەت ءتۇسىمىن ارتتىرۋ، شاعىن جانە ورتا بيزنەستى، جول بويىنداعى قىزمەت كورسەتۋدى، تۇرعىن ءۇي- كوممۋنالدىق شارۋاشىلىعىن، مەملەكەتتىك- جەكەشەلىك سەرىكتەستىكتى دامىتۋ تاپسىرىلدى.
«تۋعان جەرگە تاعزىم» اكسياسى دا سىرت قالماۋى ءتيىس. حالىقتى جۇمىسپەن قامتۋ مىندەتتەلدى. دەنساۋلىق ساقتاۋ، ءبىلىم، مادەنيەت، سپورت سالاسى نىساندارىنىڭ قۇرىلىسىن كەدەرگىسىز جۇرگىزىپ، الەۋمەتتىك ماسەلەلەردىڭ شەشىمىن ۋاقىتىلى باقىلاۋ تاپسىرىلدى. العا اۋدانى اكىمىنىڭ مىندەتىن اتقارىپ وتىرعان گۇلناز سيسەنوۆا ءوز جۇمىسىن تياناقتى ىستەدى. اقتوبە وبلىسىنىڭ اكىمى بەردىبەك ساپاربايەۆ بىرنەشە اي بويى تىنىمسىز ەڭبەك ەتكەن باسشىعا العىسىن جەتكىزدى.
ايتا كەتەيىك، ناعىمجان الدياروۆ اقتوبە وبلىسى شالقار اۋدانىنا قاراستى بايقادام اۋىلىندا تۋعان. ءبىلىمى - جوعارى. م. تىنىشپايەۆ اتىنداعى قازاق كولىك جانە كوممۋنيكاتسيا اكادەمياسىنىڭ تەمىرجول تاسىمالىن ۇيىمداستىرۋ ينجەنەرى ماماندىعىن الدى. كەيىن ق. جۇبانوۆ اتىنداعى اقتوبە مەملەكەتتىك ۋنيۆەرسيتەتىن ەكونوميكا ماماندىعىن مەڭگەردى. «اققايىڭ» ءوندىرىس كووپەراتيۆىندە اعا ەسەپشى، «كازاگروپرومبانك» اق- دا مامان، «جۇك تاسىمالى» بولىمشەسىنىڭ اقتوبە بەكەتىندەگى پويىزدارىندادا جۇكتى قابىلداۋشى- تاپسىرۋشى، جىڭىشكە بەكەتىندە پويىزداردى قۇراستىرۋشىنىڭ كومەكشىسى، مارجانبۇلاق اۋىلدىق وكرۋگىنىڭ اكىمى، العا قالاسىنىڭ اكىمى، العا اۋدانى اكىمىنىڭ ورىنباسارى قىزمەتتەرىن اتقاردى. سوڭعى جىلدارى «اقتوبە قالاسىنداعى تۇرعىن ءۇي - كوممۋنالدىق شارۋاشىلىعى، جولاۋشىلار كولىگى جانە اۆتوموبيل جولدارى ءبولىمىنىڭ باسشىسى، اقتوبە قالاسى اكىمىنىڭ ورىنباسارى بولىپ جۇمىس ىستەدى.
اۆتور: التىناي ساعىندىقوۆا
