تۇركيادا قازاقستاندىق بويجەتكەندى كولىك قاعىپ كەتتى
ق ر س ءى م باسپا ءسوز قىزمەتىنىڭ كەلتىرگەن مالىمەتىنە سايكەس، وقيعا 4- قازان كۇنى ساعات 19:00 شاماسىندا انتاليا قالاسى كونياالتى اۋدانىندا تىركەلگەن.
«جول-كولىك وقيعاسى سالدارىنان بويجەتكەن باس سۇيەگى جاراقاتتانىپ، قالانىڭ جەكە كلنيكالارىنىڭ بىرىنە جەتكىزىلگەن. سول جەردە وعان جەدەل وتا جاسالعان. قازاقستاننىڭ كونسۋلى قازاقستاندىق جاتقان كلينيكاعا بارىپ، دارىگەرلەرمەن كەزدەستى. قازىرگى ۋاقىتتا زارداپ شەككەن بويجەتكەن جانساقتاۋ بولىمىندە جاتىر. كلينيكانىڭ دارىگەرلەرىنىڭ ايتۋىنا قاراعاندا ونىڭ جاعدايى اۋىر، ءبىراق تۇراقتى»، - دەلىنگەن حابارلامادا.
قازىرگى ۋاقىتتا قازاقستاندىق ديپلوماتتار بويجەتكەننىڭ تۋعان-تۋىستارىمەن بايلانىس ورناتىپ، كومەك كورسەتۋدە. سونىمەن بىرگە، ول جەرگىلىكتى پوليتسيامەن تىعىز بايلانىس ورناتىپ، ءىستىڭ ءمان-جايىنىڭ انىقتالۋىنا كۇش سالىپ جاتىر.
«قولدا بار اقپاراتقا سايكەس، بويجەتكەن انتالياعا تۋريستىك ۆيزا بويىنشا اپكەسىنە كەلگەن. مەديتسينالىق ساقتاندىرۋى بار. جول-كولىك وقيعاسىنا كىنالى ادام ۇستالىپ، ۋاقىتشا وقشاۋلاعىشقا قامالعان. تەرگەۋ ءجۇرىپ جاتىر»، - دەپ حابارلايدى ۆەدومستۆونىڭ باسپا ءسوز قىزمەتى.
