قازاقستان قىرعىزستانمەن ەكىجاقتى بايلانىستى قانداي دا ءبىر ساياسي ويىنداردىڭ قۇربانى ەتۋگە نيەتتى ەمەس - ساراپشى
مۇنداي ويدى الەمدىك ەكونوميكا جانە ساياسات ينستيتۋتىنىڭ ساراپشىسى جۇمابەك سارابەكوۆ ايتتى، دەپ حابارلايدى قازاقپارات.
«قازاقستان پرەمەر-ءمينيسترىنىڭ ت م د ۇكىمەت باسشىلارىنىڭ كەڭەيتىلگەن وتىرىسىندا جاساعان مالىمدەمەسىن قىرعىزستان تارابىنا، ياعني رەسمي بىشكەككە ايقىن بەلگى دەپ قاراستىرۋ كەرەك. پرەمەر- مينيستر نە ايتتى؟ «ءبىز ەكونوميكالىق ماسەلەلەر بويىنشا ىنتىماقتاستىققا، كونسترۋكتيۆتى ديالوگ جۇرگىزۋگە دايىنبىز» دەدى. مەن وسى سوزگە باسا نازار اۋدارار ەدىم. سەبەبى، قازاقستان قىرعىزستاندىق تاراپتىڭ ارانداتۋشىلىق، ساياسي ادەپكە، جالپى شىندىققا ساي كەلمەيتىن مالىمدەمەلەرىنە قاراماستان بۇل ەلگە قارسى قانداي دا ءبىر قاتاڭ مالىمدەمە جاسامادى. جالپى، ەكىجاقتى بايلانىستى قىسقا مەرزىمدە ساياسي ءبىر ويىنداردىڭ قۇربانى ەتۋگە نيەتتى ەمەس ەكەندىگىن ءبىلدىردى»، - دەدى ول.
ونىڭ ايتۋىنشا، ەلىمىزدىڭ ۇكىمەت باسشىسى كەشەگى مالىمدەمەسىندە قازاقستاننىڭ قىرعىزستانمەن ەكونوميكالىق بايلانىستاردى ارى قاراي ساپالى دامىتۋعا جانە كونسترۋكتيۆتى ديالوگ جۇرگىزۋگە نيەتى بار ەكەندىگىن ءبىلدىردى.
«ال وسى كونسترۋكتيۆتى ديالوگتى باستاۋ ءۇشىن قىرعىزستان تارابى بەلگىلى ءبىر قادامدارعا بارۋى كەرەك جانە ول قادامداردى قازاقستاننىڭ ۇكىمەت باسشىسى ناقتىلاپ ايتىپ تا بەردى. بىرىنشىدەن، قىرعىزستان ە ە ا و اياسىندا قابىلداعان مىندەتتەمەلەرىنە وراي زاڭنامالارىن وداق زاڭناماسىنا سايكەستەندىرۋى ءتيىس. سونىمەن قاتار وداق اياسىندا ۆەتەرينارلىق جانە فيتوسانتيتارلىق تەكسەرۋ جۇيەلەرىن رەتكە كەلتىرۋ بويىنشا موينىنا العان مىندەتتەمەلەرىن ورىنداۋى قاجەت. ەكىنشىدەن، ءوزىنىڭ اۋماعى ارقىلى وتەتىن زاڭسىز ەكسپورتتى توقتاتۋى كەرەك. بۇل جەردە رەەكسپورت جايىندا اڭگىمە بولىپ وتىر. سول ارقىلى ەكونوميكامىزعا ءتيىپ جاتقان شىعىنداردى بولدىرماۋىمىز قاجەت. ۇشىنشىدەن، قىرعىزستان ءوزىنىڭ اۋماعىنان قارۋ- قاراق، كونتراباندا جانە وسى سياقتى قاۋىپسىزدىككە كەرى اسەرىن تيگىزەتىن زاتتاردى وتكىزبەۋ تۋرالى شارالاردى قابىلداۋى ءتيىس»، - دەدى ول.
سونىمەن قاتار ول قىرعىزستان پرەمەر- ءمينيسترى ساپار يساكوۆتىڭ قازاقستاندى ت م د اياسىندا جاسالعان ەركىن ساۋدا اينالىمى تۋرالى كەلىسىمنىڭ شارتتارىن ساقتاماي وتىر دەپ ايىپتاپ ۇلگەرگەنىنە دە توقتالدى.
«وكىنىشكە قاراي، بۇل قىرعىزستان تاراپىنىڭ ءالى دە بولسا ديالوگكە دايىندىعىنىڭ از ەكەندىگىنەن حابار بەرەدى. بۇعان جاۋاپ رەتىندە ق ر پرەمەر-ءمينيسترى قازاقستان بارلىق كەلىسىمدەردى ءوز دەڭگەيىندە ورىنداپ وتىرعانىن جانە قىرعىز ۇكىمەت باسشىسىنىڭ مالىمدەمەسى شىندىققا جاناسپايتىندىعىن اشىق ايتتى»، - دەدى جۇمابەك سارابەكوۆ.
ەسكە سالا كەتسەك، كەشە تاشكەنتتە وتكەن ت م د ۇكىمەت باسشىلارى كەڭەسىنىڭ كەڭەيتىلگەن وتىرىسىندا قىرعىزستان پرەمەر-ءمينيسترى ساپار يساكوۆ كۇتپەگەن جەردەن قازاقستاننىڭ قىرعىزستانعا قاتىستى 2011 -جىلى 18 -قازانداعى ت م د ەركىن ساۋدا ايماعى تۋرالى شارتتى تولىق ورىنداماعانىن مالىمدەگەن بولاتىن. قازاقستان ۇكىمەتىنىڭ باسشىسى باقىتجان ساعىنتايەۆ قىرعىز تاراپىنىڭ مالىمدەمەسىن ورىنسىز دەپ اتاپ، قىرعىز تاراپىن بەس پرينتسپتىك باعىت بويىنشا سىندارلى شەشىم قابىلداۋعا شاقىردى.
