ۇلتتىق كيىمدەردى كۇندەلىكتى ومىردە كيۋگە ىڭعايلى ەتىپ تىگۋ ماسەلەسى كوتەرىلدى - فوتو
وبلىستىق ادەت-عۇرىپ جانە سالت-ءداستۇر ورتالىعى ۇيىمداستىرعان باسقوسۋعا وڭىردەگى ۇلتتىق كيىم وندىرەتىن كاسىپكەرلەر مەن ديزاينەرلەر قاتىستى، دەپ حابارلايدى قازاقپارات ءتىلشىسى.
ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسى اياسىندا ۇيىمداستىرىلعان شارادا ءسوز العان جوبالىق كەڭسەنىڭ جەتەكشىسى باقىتجان اشىربەكوۆ، ۇلتتىق كيىمنىڭ ءاربىر حالىقتىڭ سالت-ءداستۇرى مەن مادەنيەتىن ايشىقتايتىن قۇندى دۇنيە ەكەندىگىنە توقتالىپ ءوتتى.
سەمينار- ترەنينگكە قاتىسقان ديزاينەرلەر مەن تىگىن شەبەرلەرى ۇلتتىق كيىم تۇرلەرىن بۇگىنگى زامان تالابىنا ساي، كۇندەلىكتى تۇرمىستا كيۋگە ىڭعايلى ەتىپ تىگۋ ماسەلەسىن كوتەردى. جاستاردىڭ ەستەتيكالىق تالعامىن، ۇلتتىق كيىم تاريحىن زەرتتەۋگە قىزىعۋشىلىعىن ارتتىرۋ ەكەنىنە توقتالدى. سونداي-اق، قازاقى كيىمنىڭ بارشا سىمباتى مەن ويۋ-ورنەگىندە، ءاربىر اشەكەيىندە حالقىمىزدىڭ تاريحىنىڭ، وي-دۇنيەسىنىڭ قايتالانباس كورىنىسى بار ەكەندىگىن حالىققا جەتكىزۋ ماسەلەلەرى جونىندە اڭگىمە قوزعادى. وسى ماقساتتا سەميناردى ۇيىمداستىرۋشىلار «ۇلتتىق كيىم - ۇرپاققا مۇرا» اتتى جاڭا جوبا باستالعانىن اتاپ ءوتتى.
«قادىرلى قوناقتى، ەل اعالارىن سىيلاۋ، ءقادىر تۇتۋ ماقساتىندا يىعىنا شاپان جاۋىپ، ءىلتيپاتىمىزدى بىلدىرەمىز. سوڭعى ۋاقىتتا ول تويدىڭ عانا ءسانى. قۇرمەتتى ازاماتتارعا تىلەك بارىسىندا عانا جابامىز، سوسىن سومكەگە سالىنادى نە ساندىقتىڭ تۇبىنە كەتەدى. سونشالىقتى قاسيەتىنەن ايىرىلعاندىعى سول، شاپان بەس-التى تويدى اينالىپ وزىڭە قايتا كەلەدى. شارانى ۇيىمداستىرۋداعى ماقسات كاسىپكەرلەر، شەبەرلەر، تىگىنشى، ديزاينەرلەرمەن بىرلەسە وتىرىپ، ۇلتتىق كيىمگە دەگەن قوعامدىق سانانى وزگەرتۋ. قايتسەك قۇندىلىقتى جاڭعىرتامىز، كۇندەلىكتى زامان اعىمىنا قاراي وزگەرتۋگە بولاتىن تۇستارى بار ما؟ حالىققا جاڭاشا ءبىر دۇنيەلەر ۇسىنۋدى سىزدەرمەن اقىلداسا وتىرىپ شەشسەك»، - دەدى وڭىردەگى قوعامدىق سانانى جاڭعىرتۋ باعدارلاماسىن جۇزەگە اسىرۋ جونىندەگى جوبالىق كەڭەستىڭ جەتەكشىسى باقىتجان اشىربەكوۆ.
ۇيىمداستىرۋشىلاردىڭ ايتۋىنشا، جوبانىڭ قورىتىندىسى كەلەسى جىلدىڭ قازان ايىندا شىعارىلادى. وعان دەيىن جوبا اياسىندا ءتۇرلى باسقوسۋلار، ناسيحات جانە دارىپتەۋ شارالارى، ۇلتتىق كيىمدەر فەستيۆالى وتەدى.
