شىمكەنتتىك قاريا ەلدىڭ تۇرمىسىن كوتەرۋ ءۇشىن تەز ارادا شىڭعىس حاننىڭ قابىرىن اشۋدى ۇسىندى

استانا. قازاقپارات - شىمكەنتتىك ءادىلحان اتەموۆ ەسىمدى قاريا حالىقتىڭ تۇرمىسى جاقسارىپ، ەلدىڭ رۋحىن كوتەرۋ ءۇشىن تەز ارادا شىڭعىس حاننىڭ قابىرىن اشۋ كەرەكتىگىن ايتتى.

بۇل تۋرالى ول زامانا گازەتىنە بەرگەن سۇحباتىندا مالىمدەگەن.

ەستەرىڭىزدە بولسا، سمان وتەگەنوۆ پەن گۇلجانار التىنبەكوۆا ەسىمدى ەرلى-زايىپتىلار شىڭعىس حاننىڭ قابىرىن تاپقانىن ايتىپ، و ق و- دا ورنالاسقان زيرات ايماعىندا قازۋ جۇمىستارىن باستاعان ەدى. ولار شىڭعىس حاننىڭ تۇسىندە ايان بەرگەنىن، قابىردى تەك پرەزيدەنتتىڭ بۇيرىعىمەن اشۋدى ەسكەرتكەنىن مالىمدەدى. الايدا، ولاردىڭ وتىنىشىنە جوعارىداعىلاردىڭ نازار اۋدارماعانى شىمكەنتتىك قاريانى ابدەن اشۋلاندىرىپتى.

- ولارعا جاردەم بەرۋ كەرەك. وزدەرى پاتەر جالداپ تۇرادى. ادام ەمدەپ جانە اركىمنىڭ ۇساق-تۇيەك جۇمىسىنا جالدانىپ كۇن كورىپ ءجۇر. مەن گۇلجانات شاقىرعاسىن بارعانمىن.

ول: «تاعى دا ايان ءتۇس كورىپ ءجۇرمىن. بابالار ءىستى تەزدەتۋدى بۇيىردى. قازعان جەرلەرىڭە تىرەۋ قويىڭدار دەدى»، - دەيدى.

وزدەرى جۇدەپ قالىپتى، ولارعا كومەك كەرەك. بايقاۋىمشا، ولار ەشقانداي دا «اۋىتقىعان» نەمەسە ارام ماقسات كوزدەپ جۇرگەن جاندار ەمەس. جوعارىداعىلاردىڭ ولار قازىپ جاتقان جەردى تەكسەرتە سالسا نەسى كەتەتىنىنە تۇسىنبەيمىن.

سولاي ەتسە، قانداي بولعاندا دا شىندىقتىڭ بەتى اشىلار ەدى. بۇل ءوزى تەگىن نارسە ەمەس قوي. مىسالى، كەلەس جاقتاعى اباي اۋىلىندا تۇراتىن ءبىر بالاعا دا وسىنداي اياندار بەرىلىپ ءجۇر ەكەن. ول ءتىپتى ايان بويىنشا شىڭعىس حاننىڭ تاعىنىڭ سۋرەتىن دە سالعان. مىنە، مەن سونى دا ارنايى اكەلىپ وتىرمىن، - دەيدى ءادىلحان اتەموۆ.

اقساقالدىڭ ايتۋىنشا، شىڭعىس حاننىڭ قابىرى اشىلعان سوڭ ەلدەگى پروبلەمالار شەشىلىپ، زورلىق-زومبىلىق ازايىپ، حالىقتىڭ تۇرمىسى جاقسارادى ەكەن.

«ارى كەتسە ەكى-ءۇش اپتانىڭ ىشىندە گۇلجانار مەن سمانعا قابىردى اشۋعا مۇمكىندىك تۋدىرۋىمىز كەرەك. جۇرت جينالسا، قابىردى اشامىز. ويتكەنى گۇلجانارعا: «قابىردى وزدەرىڭ اشپاڭدار. باسشىلار رۇقسات بەرىپ، ادام جىبەرسە، سودان كەيىن بارىپ كىرەسىڭدەر»، - دەپ ايان بەرىلىپتى»، - دەيدى قاريا.