نيۋ-يوركتە تەراكت جاساعان وزبەكستاندىق «كوپ ادام ولتىرگىسى كەلگەنىن» ايتىپ، سوتتى شوشىتتى
بۇل تۋرالى ورتالىق ازيانىڭ جاڭالىقتار قىزمەتى حابارلادى.
ەسكە سالا كەتەيىك، تەراكت نيۋ-يوركتە 31- قازاندا بولدى. سوتتا تۇتقىندالعان وزبەكستان تۋماسى ادەيى وسى كۇندى تاڭداپ العانىن، سەبەبى حەللوۋيندى مەرەكەلەۋگە كوشەگە ادام كوپ شىعاتىنىن ايتقان.
ول سونىمەن بىرگە بۇل تەراكتىنى ءبىر جىل بويى جوسپارلاعانىن، دايىندىقتى سوڭعى ەكى ايدا جۇرگىزگەنىن مالىمدەگەن. ول بۇل ىسىنە ەش وكىنبەيتىنىن كەرىسىنشە، كوپ ادام جۇرەتىن برۋكلين كوپىرىنە دەيىن بارعىسى كەلگەنىن، ءبىراق اياق استىنان اۆتوبۋسقا سوعىلعانىن ايتقان.
سوتقا سايپوۆ ارباعا تاڭىلعان كۇيدە جەتكىزىلدى. ول وپەراتسيادان كەيىن ءوزىن جاقسى سەزىنەتىنىن ايتىپ، ءوز-وزىنە قارسى كۋالىك ەتۋدەن باس تارتتى.
سوتتالۋشى سونىمەن قاتار «يسلام مەملەكەتى» (ي م) تەرروريستىك توبىنىڭ ۆيدەوسىن كورىپ، شابىتتاندىم دەگەن. جۇك كولىگىن ول 22- قازاندا جالعا الىپ، حەللوۋين كۇنى شابۋىل جاساۋ ءۇشىن الدىن الا دايىندالعان.
ول ءوزىنىڭ اۋرۋحاناداعى جاتقان بولمەسىنە ي م جالاۋىن ءىلىپ قويۋىن سۇراعان.
پوليتسيا سايپوۆكە تەراكت جاسادى دەگەننەن بولەك، تەرروريستىك ۇيىمدارعا اقشالاي قولداۋ ءبىلدىرىپ وتىردى دەگەن ايىپ تاقتى.
تاشكەنتتە تۋىپ-وسكەن سايفۋللو سايپوۆ لوتەرەيادان گرين كارتا ۇتىپ الىپ، امەريكاعا 2010-جىلى كوشىپ كەتكەن. ا ق ش- تاعى ونىڭ تانىستارى سايپوۆتى راديكالدى يسلامشىل رەتىندە ەمەس، ۇنەمى قارجى پروبلەماسىمەن جۇرەتىن اگرەسسيۆتى ادام رەتىندە سيپاتتاعان.
