لاتىن الىپبيىنە كوشۋدە پسيحولوگيالىق كەدەرگىنى ەڭسەرۋ ماڭىزدى - ەرمۇرات باپي
بۇنداي پىكىردى ول لاتىن گرافيكاسى ماسەلەلەرىنە قاتىستى س. امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىندە وتكەن ستۋدەنتتەرمەن كەزدەسۋدە ايتتى، دەپ حابارلايدى قازاقپارات ءتىلشىسى.
كەزدەسۋدە «لاتىن قارپىنە كوشۋدەگى ەڭ ۇلكەن ماسەلە نە بولماق؟» دەگەن سۇراققا جۋرناليست: «ءبىزدىڭ حالقىمىزدىڭ، اسىرەسە ورتا جانە اعا بۋىننىڭ پسيحولوگياسى» دەپ جاۋاپ بەردى.
«ەڭ باستىسى - پسيحولوگيالىق كەدەرگىنى جەڭۋ. بۇل وتە ۇزاق پروتسەسس، جاڭا ءالىپبيدى جاستار تەزىرەك ۇيرەنىپ كەتەدى دەگەن ويدامىن، ال اعا بۋىننىڭ جاعدايىنا كەلسەك، ولاردان ءبىراز ەڭبەك تالاپ ەتىلۋى مۇمكىن. ەگەر بۇل قاجەتتىلىكتى جەتە تۇسىندىرە الساق، قازاقستاندىقتاردىڭ ساناسىنا جەتكىزە الساق، وتپەلى كەزەڭدەگى بارلىق قيىندىقتاردى ەڭسەرە الامىز»، - دەيدى ە. باپي.
سونىمەن قاتار اتالعان كەزدەسۋ بارىسىندا ساياساتتانۋشى ەرلان سايىروۆ «لاتىن ءارىپى قارا باستىڭ قامى ءۇشىن ەنگىزىلىپ جاتقان ماسەلە ەمەس ەكەنىن» اتاپ ءوتتى. ونىڭ پايىمىنشا، مۇنداعى ماقسات - سانانى جاڭعىرتۋ، ال جاڭعىرۋ - بىرتىندەپ جۇزەگە اساتىن، عىلىمي جانە ينتەللەكتۋالدىق كوزقاراستى تالاپ ەتەتىن پروتسەسس.
«بۇگىندە بارشا الەمدە تەحنولوگيا كوز ىلەسپەس جىلدامدىقپەن دامىپ كەلەدى. تابىستى مەملەكەت جانە تابىستى قوعام بولۋ ءۇشىن جوعارى تەحنولوگيالارعا، زاماننىڭ جاڭا تىلىنە جاقىن بولۋىمىز كەرەك. بۇل تۇرعىدا لاتىن گرافيكاسىن ەنگىزۋدىڭ قيسىنى بار. ءبىز اقپاراتتىق تەحنولوگيالار عاسىرىندا ءومىر ءسۇرىپ كەلەمىز. ماسەلەن، قازىردىڭ وزىندە «اباي جولىن» لاتىن گرافيكاسىنا 3 سەكۋندتا اۋدارىپ بەرەتىن كونۆەرتەر قۇراستىرىلدى. ⅩⅩ عاسىردا قازاقستاننىڭ ءۇش رەت ءالىپبي اۋىستىرعانىن، بارلىق جۇمىستاردىڭ ءساتتى ىسكە اسقانىن اتاپ وتكىم كەلەدى. 1929 -جىلى اراب قارىپىنەن لاتىن الىپبيىنە كوشتى، 1940 -جىلى مولوتوۆتىڭ شەشىمىمەن كيريلليتساعا كوشىرىلدى جانە ەشكىم ەشقانداي ماسەلە كوتەرگەن جوق»، - دەيدى ول.
ە. سايىروۆتىڭ ايتۋىنشا، جالپى قوعام بۇل شەشىمگە وڭ قاباق تانىتىپ وتىر.
«كەشە الماتىدا جاستارمەن كەزدەسۋدە بولدىق، بۇگىن ەل شىعىسىندا ءجۇرمىز، دۇيسەنبى كۇنى وڭتۇستىك قازاقستاندا بولامىز. ارينە، تەحنولوگيالارى مەن ادىستەمەسى بويىنشا ءبىرقاتار ماسەلە بار، ءبىراق تۇتاس لاتىن ءالىپبيىن ەنگىزۋدە ءبىرىڭعاي شوعىرلانعان وپتيميزم بار. كەشە عانا ارنايى مەملەكەتتىك كوميسسيانىڭ قۇرىلاتىنى جانە كوميسسيا اياسىندا ادىستەمەلەرىنىڭ جەتىلدىرىلەتىنى حابارلاندى». سونىمەن قاتار، «كەيبىر ادىستەمەلىك ماسەلەلەردى شەشۋ ءۇشىن قانداي دا ءبىر عىلىمي توپ قۇرىلا ما؟» دەگەن سۇراققا جاۋاپ بەرگەن ساياساتتانۋشى قازاقستانداعى لاتىنداندىرۋدىڭ ءبىر كۇندە ەنگىزىلمەيتىنىن، كەزەڭ- كەزەڭىمەن جۇزەگە اسىرىلاتىنىن باسا ايتتى.
«اتالعان ماسەلە بويىنشا ەلدە مەملەكەتتىك كوميسسيانىڭ قۇرىلاتىنى حابارلاندى. ءدال وسى كوميسسيا اياسىندا فونەتيكامەن جانە سينتاكسيسپەن اينالىساتىن توپتار قۇرىلۋى مۇمكىن. ياعني بۇل - كەزەڭ- كەزەڭىمەن جۇزەگە اسىرىلاتىن پروتسەسس. ارينە، عىلىمي، پراكتيكالىق توپتار دا قۇرىلا بەرەدى. بۇل عىلىمي جانە ازاماتتىق قوعامنىڭ جۇيەلى جۇمىسى بولماق»، - دەپ ءوز ءسوزىن تۇيىندەدى ەرلان سايىروۆ.
اۋدارما: ايجان سەرىكجان قىزى
