قازاقستاندا شەنەۋنىكتەرگە قىمبات ينوماركا ساتىپ الۋعا تىيىم سالىنۋى مۇمكىن

  استانا. قازاقپارات - «قازاۆتوونەركاسىپ» وداعى شەنەۋنىكتەردىڭ شەتەل كولىكتەرىنە تىم اۋەستىگىن ايتىپ، يمپورتتىق كولىككە تىيىم سالۋدى سۇرادى، - دەپ حابارلايدى ك ت ك ارناسى.

بيىل ءبىزدىڭ شەندىلەر ءۇشىن سىرتتان وتكەن جىلمەن سالىستىرعاندا جەتى جارىم ەسە كوپ يمپورتتىق تەمىر تۇلپار الىنىپتى. 2016 - جىلدىڭ العاشقى توعىز ايىندا 67 تەحنيكا ساتىپ الىنسا، بيىل 508 تەحنيكا الىنعان. مەملەكەتتىك مەكەمەلەر مەن ۇلتتىق كومپانيالار يمپورتتىق كولىككە بيۋدجەتىندە 6 ميلليارد 700 ميلليون تەڭگە بولگىزگەن. اسىرەسە وڭىرلىك اكىمدىكتەر قىمبات جول تالعامايتىن جاپون كولىكتەرىن جاقسى كورەدى ەكەن. ونىڭ ەڭ ارزانى قازىناعا 24 ميلليون تەڭگەگە تۇسەدى. ەندى قازاۆتوونەركاسىپ وداعى مەملەكەتتىك ساتىپ الۋ تۋرالى زاڭعا وزگەرىس ەنگىزۋدى ۇسىنىپ وتىر. وندا مەملەكەتتىك قىزمەتكەرلەر شەنىنە قاراي كولىك ءمىنسىن، شەتەلدىڭ ونىمىنە شەكتەۋ سالىنسىن، ساتىپ الۋلاردا وتاندىق كولىككە باسىمدىق بەرىلسىن دەلىنگەن. سوندا جىل سايىن كولىكتەن كەم دەگەن 1 ميلليارد تەڭگە ۇنەمدەلمەك.

«مەملەكەت سوڭعى 15  جىلدا وتاندىق اۆتو ونەركاسىپكە كوپ قاراجات قۇيدى. پرەزيدەنتتىڭ ءوزى «وتاندىق ءونىم ال» دەپ ۇران سالىپ جاتقاندا، وسى كوشتىڭ الدىندا بولۋى ءتيىس مەملەكەتتىك ورگانداردىڭ شەتەلدىكىنە جۇگىرگەنى تۇك تۇسىنىكسىز. ءتىپتى قيسىنسىز. ال شالعايداعى اۋداندىق اكىمدەر ءۇشىن ناعىز جۇمىس كولىگى نيۆا بار»، - دەيدى قازاۆتوونەركاسىپ وداعىنىڭ ءتوراعاسى ولەگ الفەروۆ.