جاقسىلىق ۇشكەمپىروۆ: جاڭا ءالىپبي اعا بۋىننان بۇرىن جاس ۇرپاققا كەرەك

 استانا. قازاقپارات - قازاق ك س ر ەڭبەك سىڭىرگەن سپورت شەبەرى، وليمپيادا چەمپيونى جاقسىلىق ۇشكەمپىروۆ بەكىتىلگەن لاتىن گرافيكاسىنداعى قازاق الىپبيىنە قاتىستى پىكىرىن ءبىلدىردى، دەپ حابارلايدى «قازاقپارات» ح ا ا ءتىلشىسى.

جاقسىلىق ۇشكەمپىروۆ لاتىن الىپبيىنە كوشۋ ءدال ۋاقىتىندا جاسالعان دۇرىس قادام دەپ باعا بەردى. «وسكەلەڭ ۇرپاقتىڭ الەمدە ورىن الىپ جاتقان جاڭالىقتاردان حاباردار بولۋى ءۇشىن، تەگىمىز ءبىر تۇركى تىلدەس حالىققا بۇگىنگىدەن دە جاقىنداپ، قازاق سپورتىنىڭ دەڭگەيىن الەمدىك ارەنالاردا بۇگىنگىدەن دە بيىكتەتۋ ءۇشىن، لاتىن قارپىندەگى قازاق الىپبيىنە كوشۋىمىز قاجەت. بۇل بۇگىنگى زاماننىڭ تالابى. جاڭا ءالىپبيدى مەڭگەرۋ جاستارمەن بىرگە اعا بۋىنعا دا قيىندىق تۋعىزبايدى دەگەن ويدامىن. سپورتشىلار جاڭا الىپبيمەن جازۋعا دايىن» ، - دەيدى جاقسىلىق ۇشكەمپىروۆ.

ونىڭ ايتۋىنشا، لاتىن الىپبيىنە كوشۋ تۋرالى حالقىمىزدىڭ ارمان- تىلەگى ەگەمەندىك العان جىلدارى تۋعان. «لاتىن گرافيكاسىنداعى قازاق الىپبيىنە كوشۋ - ەگەمەندىك العانىمىزدىڭ جارقىن بەلگىسى. بۇل بابالاردىڭ مۇراتى ەدى. سوندىقتان، جەكە مەملەكەت ەكەنىمىزدى بىلدىرەتىن ەلىمىزدىڭ بۇل قادامىنا قۋانىشتىمىن. ءبىزدىڭ قازىرگى ۇرپاقتىڭ باستامانى ءبىراۋىزدان قولداپ كەتكەنى قۋانتادى. اعا بۋىن بولىپ ءبىز دە اتسالىسۋىمىز كەرەك» ، - دەيدى داڭقتى چەمپيون.

 جاقسىلىق ۇشكەمپىروۆ سونىمەن بىرگە، اعا بۋىنعا جاڭا ءالىپبيدى مەڭگەرىپ، زامانمەن بىرگە العا جىلجۋ ەش قيىندىق تۋعىزبايتىنىن ايتادى. «ءتورت- بەس ارىپكە قينالامىز با؟ بۇكىل دۇنيە ءجۇزى لاتىن الىپبيىنە كوشىپ كەتكەن. جاس كەزىمدە الەمنىڭ 30-40 ەلىنە بارىپ كۇرەستىم. سول كەزدە ول ەلدىڭ باسىم بولىگى ءبىر- بىرىنە ۇقساس ارىپتەرمەن جازاتىنىنا ءمان بەرەتىنمىن. دەمەك، قازاقستان دا الەم ەلدەرىنىڭ كوشىنەن قالماۋى كەرەك. مۇنىڭ ءبارى اعا بۋىننان بۇرىن جاس ۇرپاق ءۇشىن قاجەت» ، - دەيدى جاقسىلىق ۇشكەمپىروۆ.

ەسكە سالا كەتسەك,27 قازاندا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى جارلىققا قول قويعان بولاتىن.

  

 اۆتور: ايان بەكەن ۇلى