يوردانيادا سۇلتان بەيبارىستىڭ جاۋلاعان قورعانى ساقتالعان - ەلشى

استانا. قازاقپارات - قازاقستان رەسپۋبليكاسىنىڭ يوردانيا حاشيميت كورولدىگىندەگى توتەنشە جانە وكىلەتتى ەلشىسى ازامات بەردىباي قازاق تاريحىندا ورىنى بار سۇلتان بەيبارىستىڭ يوردانيا ەلىندە قانداي ءىز قالدىرعانى تۋرالى ايتىپ بەردى، دەپ حابارلايدى «قازاقپارات» ح ا ا ءتىلشىسى.

ب ا ق الدىندا باسپا ءسوز ءماسليحاتىن وتكىزگەن ازامات بەردىباي 1250-جىلى ايگىلى مىسىر پاتشاسى سۇلتان بەيبارىستىڭ يوردانيالىق ءال-كاراك قالاسىندا جاۋلاپ العان قورعانىن كورسەتتى.

ول قورعاندى كىرەست جورىعىنىڭ كىرەسشىلەرى سالعان. ءبىراق كەيىن قورعان ءامىر سالاحادديننىڭ جاۋلاۋىمەن مۇسىلمانداردىڭ قولىنا وتكەن.

«بۇل جەر نەسىمەن اتاقتى؟ تاريحتى بىلسەڭىزدەر، ماملۇكتەردىڭ پاتشاسى سۇلتان بەيبارىس 1250-جىلى ءدال وسى ءال-كاراك قالاسىن جاۋلاپ، سول قالادا تۇرعان. ءدال وسى جەردە ول ۇلكەن مۇنارا تۇرعىزىپ، جەر استىندا كىتاپحانا اشقان. بۇل البەتتە ءبىزدىڭ تاريحىمىزعا دا قاتىستى»، - دەيدى ەلشى.

ازامات بەردىباي سونىمەن بىرگە، ءال-كاراك سەكىلدى تاريحي ورىندار يوردانيادا كوپ ەكەنىن اتاپ ءوتتى.

«مەن بۇل مەملەكەتتى اشىق اسپان استىنداعى مۋزەي دەپ ايتار ەدىم. استاناسى امان بۇرىن فيلادەلفيا اتالعان. ريمدىكتەردىڭ جاۋلاۋىنان باستاپ مۇندا كونە تاريحتىڭ ءىزى سايراپ جاتىر. الەمنىڭ جەتى كەرەمەتىنىڭ ءبىرى - پەترو قالاسى دا وسىندا. وندا جىلىنا ميلليون تۋريست كەلەدى. گولليۆۋدتىڭ «ينديانا دجونس» فيلمى سوندا تۇسىرىلگەن»، - دەيدى ول.

ەلشىنىڭ ايتۋىنشا، قازاقستان ازاماتتارى يوردانياعا ب ا ءا، تۇركيا، رەسەي، ۋكراينا، گرۋزيا ەلدەرى ارقىلى ۇشىپ جەتە الادى.

اۆتور: ايان بەكەن ۇلى