ب ۇ ۇ يراننىڭ يادرولىق قارۋسىزدانۋعا قاتىستى قارارىن قابىلدادى

استانا. قازاقپارات - بىرىككەن ۇلتتار ۇيىمى (ب ۇ ۇ) يراننىڭ جاھاندىق يادرولىق قارۋسىزدانۋعا قاتىستى قارارىن قابىلدادى، دەپ حابارلايدى قازاقپارات يرنا اگەنتتىگىنە سىلتەمە جاساپ.

سەنبى كۇنى ب ۇ ۇ- نىڭ ءبىرىنشى كوميتەتى يراننىڭ جاھاندىق يادرولىق قارۋسىزدانۋ جونىندەگى قارارىن قولداپ، داۋىس بەردى. قاراردى 112 دەلەگات قولداسا، 44 ى قارسى بولدى، 15 مەملەكەت داۋىس بەرۋدەن قالىس قالدى.

قاراردا يادرولىق قارۋمەن قارۋلانعان بارلىق ەلدەردى يادرولىق قارۋدى تاراتپاۋ تۋرالى شارتقا سايكەس ءوز ارسەنالدارىن جويۋعا شاقىراتىن ۇندەۋ جاريالانعان. سونداي-اق اتالعان ەلدەر جاڭا يادرولىق قارۋ ءوندىرىسىن توقتاتىپ، ولاردى وزگە مەملەكەتتەرگە ەكسپورتتاۋىن نەمەسە وزگە تەرريتوريالاردا ورنالاستىرۋىن توقتاتۋى ءتيىس.

يرنا اگەنتتىگىنىڭ حابارلاۋىنشا، قۇجاتقا قارسى داۋىس بەرگەندەر اراسىندا ا ق ش، يزرايل، ۇلى بريتانيا، رەسەي جانە فرانسيا بار.

اتاپ وتىلگەندەي، تەگەران ازىرلەگەن قارار 1995، 2000 جانە 2010 -جىلدارى وتكەن يادرولىق قارۋدى تاراتپاۋ تۋرالى شارتتىڭ ءىس-ارەكەتىن قاراستىرۋ بويىنشا راتيفيكاتسيالانعان كونفەرەنسيالارعا نەگىزدەلگەن.