اشتىقتىڭ قارتايۋعا قارسى پايداسى دالەلدەندى

 استانا. قازاقپارات - گارۆارد ۋنيۆەرسيتەتىنىڭ عالىمدارى ەمدوم نەمەسە گەنەتيكالىق امال كومەگىمەن ميتوحوندريالار بەلسەندىلىگىن باقىلاۋ ادامنىڭ ءومىر ءسۇرۋ ۇزاقتىعىن ارتتىرىپ، «دۇرىس» قارتايۋىنا اسەر ەتەتىنىن دالەلدەدى.

 جۇرگىزىلگەن زەرتتەۋ جۇمىسىنىڭ ناتيجەسىن ارقاۋ ەتكەن ماقالا Cell Metabolism جۋرنالىندا جارىق كوردى. بۇل تۋرالى EurekAlert! باسىلىمى حابارلايدى.

ميتوحوندريالار ءتىرى اعزالاردىڭ جاسۋشاسىنداعى ورگانويدتار بولىپ تابىلادى. ولار وتتەگىنى قالپىنا كەلتىرۋگە، ا ت ف، ياعني جاسۋشاداعى زات الماسۋىنا قاجەتتى مولەكۋلانىڭ تۇزىلۋىنە جاۋاپ بەرەدى. ميتوحوندريالار ءۇشىن «شيكىزات» قىزمەت اتقاراتىن - پيرۋۆات. ول ورگانيزمگە تاماقپەن بىرگە تۇسەتىن سۋتەكتەر گليكوليزدەنگەندە پايدا بولادى. سونىمەن قاتار ميتوحوندريالار بويىندا جاسۋشانى زاقىمداپ، قارتايۋىنا اسەر ەتەتىن وتتەگى راديكالدارى تۇزىلەدى.

 ميتوحوندريالار جاسۋشالاردىڭ قۋاتتى قاجەتسىنۋە قاراي وزگەرىپ وتىراتىن تىزبەكتەر قۇرادى. ادامنىڭ جاسى ۇلعايعان سايىن، ولاردىڭ قىزمەتى ناشارلاي باستايدى.

Caenorhabditis elegans قۇرتتارىنا جۇرگىزىلگەن تاجىريبە ناتيجەسى بويىنشا، تۇتىنىلاتىن كالوريا مولشەرىنىڭ ازايۋى ميتوحوندريا تىزبەكتەرىنىڭ جۇمىسىن جاقسارتادى. ءدال وسىنداي ناتيجەگە اقۋىزبەن جاسالاتىن گەنەتيكالىق امالدىڭ كومەگىمەن دە جەتۋگە بولادى. ورگانيزمدى قۋاتپەن قامتاماسىز ەتەتىن ورگانويدتار «اشىعا» باستاعان كەزدە قۇرتتاردىڭ ءومىر ءسۇرۋ ۇزاقتىعى دا ارتا تۇسكەن.