استانالىق قىز قالاي بىرنەشە وتباسىلى ازاماتتىڭ كوڭىلدەسىنە اينالعانىن ايتىپ بەردى
المانىڭ ايتۋىنشا، (اتى وزگەرتىلگەن - رەد. ەسكەرتپەسى)، ەر ادامدار بۇگىندە وتە ساراڭ بولىپ كەتكەن.
«ءوزىم ءسان سالاسىندا جۇمىس ىستەيمىن. تاپقانىم تەك جالدامالى پاتەرگە، تاماققا جانە جولىما جەتەدى. قىزدارمەن بىرىگىپ پاتەر جالداپ تۇرامىن. اتا-انامنان ەرتە ايىرىلعانمىن. تۇرمىسقا مۇلدە شىققىم كەلمەيدى. بالكىم ءوز جان جارىمدى ءالى جولىقتىرماعان بولارمىن؟
بۇعان دەيىن ءبىر ەر اداممەن تۇردىم. ول مەنى تولىق قاجەتتىمەن قامتاماسىز ەتىپ وتىردى. ماعان پاتەر ساتىپ الىپ بەرمەك بولعانىندا، بۇل تۋرالى ونىڭ ايەلى ءبىلىپ قويدى. اقىرى ەكەۋىمىز ايىرىلىسىپ تىندىق.
كەيىن مەن وزگە وتباسىلى ازاماتتارمەن كەزدەسە باستادىم. ەر ادامدار كەدەيلەنىپ كەتكەندەي، داعدارىستى سىلتاۋراتاتىن بولعان. ءتىپتى مەيرامحانالاردىڭ ارزانىن تاڭدايدى. دەگەنمەن قاسىندا حاس سۇلۋدىڭ بولعانىن قالايدى. ال بۇل سۇلۋلىققا قول جەتكىزۋ ءۇشىن از قاراجات كەتپەيدى. ونى ەر ادامدار ءتۇسىنىپ جاتپايدى»، - دەپ مۇڭىن شاقتى الما.
بويجەتكەننىڭ ايتۋىنشا، سۇلۋلىق سالونى مەن كيىم-كەشەكتىڭ وزىنە ايىنا كەمىندە 250 مىڭ تەڭگە كەتەدى. ول سونىمەن قاتار جاڭا IPhone الۋدى ارمانداپ ءجۇر ەكەن.
«اقىرى باستاپقىدا ەكى، كەيىن ءۇش جىگىتتىڭ كوڭىلدەسى اتاندىم. ءبىرى پاتەراقىمدى تولەدى، ەكىنشىسى كيىندىردى، ءۇشىنشىسى كولىك ساتىپ الىپ بەردى»، - دەيدى الما.
ۇشەۋىن دە جاقسى كورەتىن ارۋ ولارعا بۇل جايلى ايتپاي، الداپ جۇرگەنىن دە جاسىرمادى.
«ۇشەۋىمەن ءبىر ۋاقىتتا كەزدەسىپ قالماس ءۇشىن ءتۇرلى سىلتاۋلار تاباتىنمىن. الايدا جەتى اي وتكەسىن، وتىرىك ايتۋدان جالىعىپ، ءبارىن جايىپ سالدىم. ۇشەۋىنە دە بار شىندىقتى ايتىپ، بىردەي حابارلاما جىبەرگەن بولاتىنمىن. ءبىزدىڭ قوعام بىرنەشە جىگىتى بار ايەلدى سابىرمەن قابىلداي المايدى ەكەن. ۇشەۋى دە مەنى بۇل جايتتان كەيىن تاستاپ كەتتى»، - دەپ ويىن ءتۇيدى بويجەتكەن.
