كەننەديدىڭ ولىمىنە قاتىستى قۇپيا قۇجاتتار جاريا ەتىلدى
بۇل تۋرالى اق ءۇي باسپا ءسوز قىزمەتى ءمالىم ەتتى، دەپ حابارلايدى قازاقپارات Associated Press-كە سىلتەمە جاساپ.
ترامپ اتاپ وتكەندەي، ا ق ش بيلىگى كوپشىلىكتىڭ تاريحتى وزگەرتكەن وقيعا جايلى تولىعىراق ءبىلۋى ءۇشىن پرەزيدەنت دجون كەننەديدىڭ ولىمىنە قاتىستى قۇجاتتارعا قولجەتىمدىلىكتى قامتاماسىز ەتپەك.
امەريكا كوشباسشىسى ءبىرقاتار ۆەدومستۆولاردىڭ تالاپتارىنا سايكەس، بۇل تاقىرىپقا قاتىستى باسقا دا ماتەريالداردىڭ قۇپيا ساقتالاتىنىن ناقتىلادى.
«ءبىزدىڭ ۇلتتىق قاۋىپسىزدىگىمىزگە زيانى ءتيىپ كەتپەۋ ءۇشىن وسىنداي توقتامعا كەلدىك»، - دەدى ترامپ.
اتالعان قۇجاتتار ا ق ش ۇلتتىق ارحيۆىنىڭ سايتىندا جاريالانا باستادى جانە بۇل پروتسەسس ءبىر اپتا بويى جالعاسادى.
ايتا كەتەيىك، دجون فيتسدجەرالد كەننەدي 1917 -جىلدىڭ 29 -مامىرىندا برۋكلايندا (ا ق ش، ماسساچۋسەتس شتاتى) دۇنيەگە كەلگەن. ول 1960 -جىلى 43 جاسىندا ا ق ش تاريحىنداعى ەڭ جاس پرەزيدەنت بولدى. 1963 -جىلدىڭ 22 -قاراشاسىندا داللاسقا (تەحاس شتاتى) جاساعان ساپارى كەزىندە ولتىرىلگەن ەدى. ۇكىمەتتىك كوميسسيا پرەزيدەنتكە لي حارۆي وسۆالد جالعىز ءوزى قاستاندىق جاسادى دەگەن قورىتىندىعا كەلدى. الايدا، رەسمي نۇسقانى ا ق ش جۇرتشىلىعى قابىلدامادى. سەبەبى ساراپشىلار جيناعان دەرەكتە پرەزيدەنتكە ءار ءتۇرلى نۇكتەدەن التى رەت وق اتقانى كورسەتىلگەن ەدى.
