استانادا قاتەرلى ىسىكپەن جانە تۋبەركۋلەزبەن اۋىراتىندار سانى تومەندەگەن
بۇل تۋرالى استانا قالاسى اكىمدىگىنىڭ مەديا ورتالىعىنان حابارلاندى. ورتالىق مالىمەتتەرىنە قاراعاندا، ەلوردادا تۇرعىندار اراسىندا تاراعان اۋرۋلارمەن بايلانىستى جاعداي وڭالعاندىعىنا قاراماستان مۇندا ءبىرقاتار پروبلەمالار دا جوق ەمەس.
سولاردىڭ ءبىرى قاتەرلى ىسىك اۋرۋلارىنىڭ كەش انىقتالۋىمەن بايلانىستى بولىپ وتىر. 2016-جىلدىڭ وسى كەزەڭىمەن سالىستىرعاندا قاتەرلى ىسىكتەرمەن سىرقاتتانۋشىلار سانى %18 عا تومەندەپ، 100 مىڭ حالىققا شاققاندا 2016-جىلى 215,9 بولسا، 2017 جىلى بۇل كورسەتكىش 176,8 ءدى قۇراعان.
استانا قالاسىندا قاتەرلى ىسىكپەن سىرقاتتانۋشىلاردىڭ قايتىس بولۋى بىلتىرعىمەن سالىستىرعاندا %17,4 تومەندەپ، 100 مىڭ حالىققا شاققاندا 2016-جىلى 76,5 بولسا، 2017 جىلى 92,6 بولعان. I- II ساتىداعى قاتەرلى ىسىكتەرمەن سىرقاتتانۋشىلاردى انىقتاۋ بويىنشا وسى جىلدىڭ 9 ايىنداعى جاعداي %1,2 عا جاقسارعان. دارىگەرلەردىڭ ايتۋىنشا، كورسەتكىشتەردىڭ كوڭىلگە قونىمدى بولعانىنا قاراماستان، باستى ماسەلە راكپەن سىرقاتتانۋشىلاردىڭ دارىگەرگە وتە كەش قارالۋىمەن بايلانىستى بولىپ وتىر.
«قاتەرلى ىسىكتەردىڭ كەش انىقتالۋ سەبەبى - سىرقاتتانۋشىلاردىڭ ءوز دەنساۋلىعىنا نەمقۇرايلى قاراۋى (وسىنداي جاعدايلاردىڭ ۇلەسى %25,6 قۇرادى) جانە دارىگەرگە كەش قارالۋى (ۇلەس %25,2 قۇرادى) بولىپ وتىر.
باسقا قالالاردان كەلىپ، اۋرۋدىڭ اسقىنعان كەزىندە دارىگەرگە جۇگىنگەن پاتسيەنتتەردىڭ پايىزدىق كورسەتكىشى 19,2»، - دەپ اتاپ ءوتتى استانا قالاسى دەنساۋلىق ساقتاۋ باسقارما باسشىسىنىڭ ورىنباسارى تيمۋر مۇراتوۆ.
ونىڭ سوزىنشە، ونكولوگيالىق پاتولوگيالاردى ۋاقتىلى انىقتاۋدا سكرينيگتىك زەرتتەۋلەردىڭ ماڭىزى زور.
قازاقستان رەسپۋبليكاسىنىڭ تۋبەركۋلەزگە قارسى كۇرەس جونىندەگى ۇلتتىق باعدارلاماسىنىڭ شەڭبەرىندە استانا قالاسى اكىمدىگىنىڭ قولداۋىمەن جانە دەنساۋلىق ساقتاۋ باسقارماسىنىڭ كەشەندى شارالاردى ىسكە اسىرۋىنا بايلانىستى تۋبەركۋلەزگە شالدىققاندار سانى جىل سايىن تومەندەۋدە. 9 ايدىڭ قورىتىندىسى بويىنشا تۋبەركۋلەزبەن سىرقاتتانۋشىلار %1,6 عا، تارالۋى %10,4 عا تومەندەگەن.
