يتاليادا «ورالمان» فيلمى ەكى بىردەي جۇلدەگە يە بولدى
سونىمەن قاتار، اتالعان تۋىندى SIGNIS تاۋەلسىز قازىلار القاسىنىڭ ارنايى جۇلدەسىنە قول جەتكىزدى (كوممۋنيكاتسيا جونىندەگى الەم كاتوليكتەرى قاۋىمداستىعىنىڭ جۇلدەسى) . قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاقفيلم» كينوستۋدياسى تۇسىرگەن اتالمىش فيلم تۋعان جەرىنەن كەتۋگە ءماجبۇر بولعان، الايدا ونداعان جىلدار وتكەن سوڭ اۋعانستاننان ەلىنە قايتا ورالعان قانداستارىمىز جايلى باياندايدى. بيىل حالىقارالىق «Religion Today» كينوفەستيۆالىنىڭ نەگىزگى بايقاۋىندا 28 ەلدەن 41 تولىقمەتراجدى كارتينا باق سىنادى. فەستيۆالدىڭ ۇزدىك فيلمدەرىن حالىقارالىق قازىلار القاسى انىقتادى. ولاردىڭ قۇرامىندا رەجيسسەر بەندجامين فرەيدەنبەرگ، سەربيالىق رەجيسسەر گوران رادوۆانوۆيچ، «كينوداعى بوسقىنداردىڭ ءۇنى» باعدارلاماسىنىڭ ديرەكتورى بەرنادەتت شرامم جانە باسقالار. فەستيۆالدىڭ باس جۇلدەسى يتاليالىق رەجيسسەر ەرماننو ولمانىڭ «كوردىڭدەر مە، مەن دە سەندەر سياقتىمىن» اتتى كارتيناسىنا بۇيىردى.
«ۇزدىك قىسقامەترلى فيلم» جۇلدەسىن لۋيزا روۋزدىڭ «چوپ» ءفيلمى يەلەندى، ال «ۇزدىك دەرەكتى فيلم» جۇلدەسى يراندىق رەجيسسەر بەرۋز نۋرانيپۋردىڭ «ا 157» اتتى فيلمىنە بەرىلدى. ودان بولەك، فەستيۆالدە حالىقارالىق قازىلار القاسىمەن بىرگە SIGNIS تاۋەلسىز قازىلار القاسى جۇمىس ىستەدى. ونىڭ قۇرامىندا ماتتەو استي (يتاليا) ، گۋيدو كونۆەنتەس (بەلگيا) ، بلانكا ماريا مونزون (ارگەنتينا) جانە ماگالي ۆان رەەت (فرانسيا) بولدى. تاۋەلسىز قازىلار القاسىنىڭ مۇشەلەرى «ورالمان» فيلمىنىڭ رەجيسسەرى ءسابيت قۇرمانبەكوۆكە ايرىقشا العىستارىن ءبىلدىردى. «بۇل فيلم ورتالىق ازياداعى ەڭ كەرەمەت فيلمدەردىڭ ءبىرى. قاريانىڭ اتاجۇرتىنا دەگەن ماحابباتى ادەمى بەينەلەنگەن. ەگەر دە ءار بوسقىننىڭ جۇرەگىندە اتا جۇرتقا ورالۋعا دەگەن ءۇمىت بولسا، قيىندىقتارعا قاراماستان، ماقساتىنا جەتە الادى» . ەستەرىڭىزگە سالا كەتسەك، «ورالمان» كوركەم ءفيلمى وسى جىلدىڭ باسىندا يراننىڭ استاناسى تەگەراندا وتكەن 35- حالىقارالىق فادجر كينوفەستيۆالى مەن XIII حالىقارالىق «ەۋرازيا» كينوفەستيۆالىنىڭ باس جۇلدەسىن جەڭىپ العان بولاتىن. فيلمدە باستى ءرولدى سومداعان اكتەر دۋلىعا اقمولدا قىركۇيەك ايىندا تاتارستاندا وتكەن XIII حالىقارالىق مۇسىلماندار كينوسى فەستيۆالىندە «ۇزدىك ەر ادام ءرولى» جۇلدەسىمەن ماراپاتتالدى.
ايتا كەتسەك، «ورالمان» كوركەم فيلمى حالىقارالىق پروكاتقا شىعىپ، شەتەلدەردە كورسەتىلىپ ءجۇر. بۇل فيلمدى ءبىرىنشى بولىپ اۆستراليانىڭ تالعامپاز كورەرمەندەرى تاماشالادى. كەلەسى جىلدىڭ باسىنان باستاپ «ورالمان» فيلمى يتاليادا پروكاتقا شىعاتىن بولادى. فيلم ⅩⅩعاسىردىڭ 30- جىلدارى قىزىل اسكەردىڭ جەندەتتەرىنەن اۋعانستانعا قونىس اۋدارۋعا ءماجبۇر بولعان قازاق وتباسى تۋرالى. باس كەيىپكەر بازارباي قارتتىڭ ءبىر قىزى مەن ۇلى سول جاقتا دۇنيەگە كەلەدى. بالالارى ەسەيىپ، وتباسىن قۇرادى. ۇلى ساپارقۇل جەرگىلىكتى پۋشتۋن ۇلتىنان كەلىنشەك الادى. ال قىزى اۋعان جىگىتىنە تۇرمىسقا شىعادى. ساپارقۇل سوعىس كەزىندە مودجاحەتتەر جاعىندا سوعىسادى. جىلدار وتەدى. بازاربايدىڭ وتباسى قازاقستانعا كوشۋگە رۇقسات بەرەتىن كۆوتا الادى. بارلىعى جولعا جينالادى. تاۋلى قىشلاقتان شىققان وتباسىنى ۇزاق جول كۇتەدى.
