ق ر پرەمەر- ءمينيسترى قىرعىزستانعا قاتىستى «سۇر يمپورت» تۋرالى دالەلدى مالىمەتتەردى كەلتىردى - ساراپشى
دەپ حابارلايدى «قازاقپارات» ح ا ا ءتىلشىسى.
«كەشە باقىتجان ءابدىر ۇلى (ساعىنتايەۆ - قازاقپارات) ە ا ە و ەلدەرىنىڭ قىتاي حالىق رەسپۋبليكاسىمەن ساۋدا- ساتتىق قارىم- قاتىناسى تۋراسىندا دالەلدى ستاتيستيكانى كەلتىردى. ول مالىمەتتەردە ەۋرازيالىق ەكونوميكالىق وداققا كىرگەلى بەرى قىرعىزستانعا «سۇر يمپورتتىڭ» مولشەرى ارتىپ كەتكەنى كورسەتىلگەن»، - دەيدى ول.
راحىم وشاقبايەۆ ءوز سوزىندە قازاقستان تاراپى كەدەندىك باقىلاۋدى الىپ تاستاعان جاعدايدا قىرعىزستانمەن شەكارادا تاۋاردىڭ اتالعان «سۇر» اعىنى جاۋلاپ الاتىنىنا ساقتىقپەن قاراپ وتىرعانىن اتاپ ءوتتى.
«بۇل جاعداي قازاقستاننىڭ عانا ەمەس، بۇكىل ەۋرازيالىق ەكونوميكالىق وداقتىڭ ەكونوميكاسىنا ايتارلىقتاي كەرى اسەرىن تيگىزەدى»، - دەيدى راحىم وشاقبايەۆ.
سونىمەن بىرگە، ول قىرعىزستاننىڭ پرەمەر- ءمينيسترى ساپار يساكوۆتىڭ فەيسبۋكتاعى جازباسىمەن تانىس ەكەنىن ءبىلدىردى.
«قويىلعان سۇراقتار بويىنشا قىرعىز تاراپى ەشقانداي جاۋاپ بەرمەي وتىر. ىشىندە 43 پۋنكت بار «جول كارتاسى» ازىرلەنىپ جاتقانى ايتىلدى. ءبىراق، وعان قازىرگى ۋاقىتتا قول قويىلعان جوق. مەنىڭ بىلۋىمشە، ول قۇجاتقا قىرعىز تاراپى قول قويماي وتىر. جەكە ءوز باسىم قازاقستاندىق تاراپتىڭ اۋماعىمىزعا زاڭسىز تاۋارلار مەن «سۇر يمپورتتىڭ» ەنۋىنە، ءتارتىپتى ورناتۋعا دەگەن ارەكەتىن قولدايمىن»، - دەيدى ول.
«تالاپ» قولدانبالى زەرتتەۋلەر ورتالىعىنىڭ ەسەبىنە سايكەس، قازاقستان «سۇر يمپورتتىڭ» كەسەلىنەن جىلىنا 162 ميلليون ا ق ش دوللار قاراجاتىن جوعالتادى.
«مەنىڭشە، قىرعىز تاراپى جاۋاپكەرشىلىكتى ءوز موينىنا الىپ قانا قويماي، ماسەلەنى شەشۋ جولىندا ناقتى قادامعا بارۋى كەرەك سەكىلدى. ويتكەنى پروبلەمانىڭ بار ەكەنى كوزگە ۇرىپ تۇر. باردى بار دەپ ايتىپ وتىرعانىمەن، ماسەلەنىڭ شەشىلۋى جولىندا قىرعىزستان ەشتەڭە جاساماي وتىر. قىرعىزستاندا اتالعان ماسەلەنى شەشۋگە قارسىلىق تانىتىپ وتىرعان بيلىكتە قۇزىرلى بەنەفيتسيارلار دا بار دەگەن پىكىرلەر ايتىلىپ ءجۇر»، - دەيدى راحىم وشاقبايەۆ.
بۇعان قوسا ساراپشى قىرعىزستان ە ا ە و قۇرامىنا ەنگەننەن كەيىن قازاقستان ول تاراپتىڭ «سۇر يمپورتقا» قاتىستى ارەكەتتەرىنە كوز جۇما قاراپ كەلگەنىن اتاپ ءوتتى.
«بۇل ماسەلە كۇنى بۇگىنگە دەيىن شەشىمىن تاپپاي وتىرعاندىقتان، ءبىز ءوز نارىعىمىزدى قورعاۋىمىز كەرەك. البەتتە، ازداعان وزگەرىس بولۋى مۇمكىن. ءبىراق، ءبارىبىر ماسەلە وزەكتى كۇيىندە قالادى. مۇنى رەتكە كەلتىرۋدىڭ ءبىر- اق قانا جولىن قازاقستان جۇزەگە اسىرىپ وتىر. ول - تاۋار وندىرۋشىلىك نەمەسە ەشقانداي كوممەرتسيالىق قۇجاتتارسىز كەلگەن شەكاراداعى تاۋارلارعا باقىلاۋ ورناتىپ، جارامايتىن تاۋاردى كەرى قايتارىپ وتىرۋ. مەنىڭشە، قازاقستان تاراپى ۇستانىمىن قىرعىزستان ءوز جۇمىسىن رەتكە كەلتىرگەنشە وزگەرتپەۋى كەرەك»، - دەيدى ول.
اۆتور: ايان بەكەن ۇلى
