ساۋد ارابياسىندا قازاقستاننىڭ سوت تورەلىگىنەن جاسىرىنىپ جۇرگەندەر جوق
اتاپ ايتقاندا، قازاقستان مەن ساۋد ارابياسى كورولدىگى اراسىنداعى كەلىسىم 2016-جىلعى 25- قازاندا ەر-ريادتا جاسالدى.
كەلىسىمنىڭ ەرەجەلەرىنە سايكەس، تاراپتار وزدەرىنىڭ اۋماعىنداعى ۇستاپ بەرۋگە اكەپ سوعاتىن قىلمىستار ءۇشىن ەكىنشى تاراپتىڭ اۋماعىندا كۇدىك كەلتىرىلەتىن، ايىپتالاتىن نەمەسە سوتتالعان كەز كەلگەن ادامدى قىلمىستىق جاۋاپتىلىققا تارتۋ مەن سوت ۇكىمىن ورىنداۋ ماقساتتارىندا ۇستاپ بەرۋگە مىندەتتەلەدى.
زاڭ جوباسى بويىنشا جاساعان بايانداماسىندا ق ر باس پروكۋرورىنىڭ ورىنباسارى اندرەي لۋكين قازاقستان پوستكەڭەستىك كەڭىستىكتە وسىنداي كەلىسىمدى ساۋد ارابياسىمەن بەكىتكەن ءبىرىنشى مەملەكەت ەكەنىن اتاپ ءوتتى.
قۇجاتتا قىلمىستىق قۋدالاۋ تۇرعىسىندا ۇستاپ بەرۋ نەمەسە ودان باس تارتۋدىڭ نەگىزدەمەلەرى قاراستىرىلعان. وسى رەتتە ەگەر دە ادامعا اسكەري نەمەسە ساياسي سيپاتتاعى قىلمىستار ءۇشىن سۇراۋ جاسالسا، قىلمىستىق جاۋاپكەرشىلىككە تارتۋدىڭ مەرزىمى ءوتىپ كەتكەن جاعدايدا، ەگەمەندىك پەن ۇلتتىق قاۋىپسىزدىككە زالال كەلتىرگەن كەزدە، قوعامدىق ءتارتىپ پەن باسقا دا مۇددەلەرگە كەرى اسەر ەتسە نەمەسە كونستيتۋتسياعا قايشى بولسا ۇستاپ بەرۋ شارالارى جۇزەگە اسىرىلمايدى.
«كەلىسىم بەكىتىلگەن ۋاقىتتان باستاپ ساۋد ارابياسىمەن ىنتىماقتاستىق شارالارى ءتيىمدى ىسكە اسىرىلىپ كەلەدى. قازىرگى كەزدە قازاقستاننىڭ سوت تورەلىگىنەن ساۋد ارابياسى اۋماعىندا جاسىرىنىپ جۇرگەن ادامدار جوق، سونداي-اق اتالعان ەلدىڭ قازاقستان اۋماعىندا دا ىزدەستىرىپ جاتقان ادامدار انىقتالمادى. كەلىسىم الدىن الۋ سيپاتىنا يە ەكەنىن ەسكەرە وتىرىپ، بۇل قۇجات بولاشاقتا ەكى ەلدىڭ قىلمىستىلىقپەن كۇرەس سالاسىنداعى ءتيىمدى ىنتىماقتاستىعىنا جاقسى قۇقىقتىق نەگىز جاسايدى»، - دەدى لۋكين.
بەلگىلى بولعانداي، بۇگىندە قازاقستان الىس شەت مەملەكەتتەرمەن ەكىجاقتى 18 كەلىسىمدى بەكىتتى. سونىمەن قاتار جالپى وتىرىستا پالا دەپۋتاتتارى «قازاقستان رەسپۋبليكاسى مەن ساۋد ارابياسى كورولدىگى اراسىنداعى سوتتالعان ادامداردى بەرۋ تۋرالى كەلىسىمدى راتيفيكاتسيالاۋ تۋرالى» زاڭ جوباسىن دا قابىلداندى.
اۆتور: رۋسلان عابباسوۆ
