عالىمدار رومانتيكالىق قارىم-قاتىناستا قىزعانىشتىڭ پايدالى ەكەنىن مالىمدەدى
بۇل تۋرالى Frontiers in Ecology and Evolution جۋرنالىنا سىلتەمە جاساپ ria.ru جازادى.
عالىمدار قارىم-قاتىناسقا بەرىك ءارى ءوز مەكەنىن جانىن سالىپ قورعايتىن سەكىرگىش مايمىلدارعا تاجىريبە جۇرگىزگەن. ولار ەركەك مايمىلدارعا ءوز جۇپتارىنىڭ باسقا ەركەك مايمىلدارمەن ويناپ جۇرگەنىن كورسەتەدى.
سونىمەن قاتار، ەركەك مايمىلداردىڭ تاعى ءبىر توبىنا ءدال وسىنداي جاعدايداعى باسقا ۇرعاشى مايمىلداردى كورسەتكەن. تاجىريبە بارىسىندا مايمىلداردىڭ ميىن سكانەرلەپ، گورموندارى مەن قانىن تەكسەرگەن.
عالىمدار وسى ارقىلى قىزعانىشتىڭ ميدىڭ قاي بولىگىندە تۋىندايتىنىن جانە مۇنىڭ ۇزاق مەرزىمدى قارىم-قاتىناس ورناتۋمەن قانداي بايلانىسى بار ەكەنىن انىقتايدى.
قىزعانشاق مايمىلداردا الەۋمەتتىك اۋىرتپالىققا (ايرىلىسقاندا، جالعىزدىقتا جانە باسقا جاعدايلاردا) جاۋاپ بەرەتىن الدىڭعى بەلدەۋلىك قىرتىس جانە ەموتسيونالدىق پروتسەستەر مەن كۇيزەلىس دەڭگەيىن كورسەتەتىن لاتەرالدىك قاتپاردىڭ بەلسەندىلىگى ارتقان.
دوكتور كارەن بەيلستىڭ ايتۋىنشا، بۇدان بۇرىنعى زەرتتەۋلەر بۇل قاتپاردىڭ جۇپتار اراسىنداعى بايلانىستى قالىپتاستىرۋعا قاتىسى بار ەكەنىن كورسەتكەن. جاڭا زەرتتەۋلەر بولسا ميدىڭ بۇل بولىگىنىڭ اراداعى قاتىناستى ساقتاۋداعى ءرولىن انىقتاپ وتىر.
وسىعان قاراپ، عالىمدار قىزعانشاقتىق جاي عانا جۇپتاردىڭ قارىم-قاتىناسىن ساقتاۋدىڭ ەۆوليۋتسيالىق ءتاسىلى دەگەن تۇجىرىمعا كەلىپ وتىر.
