ءۋاليحانوۆتاردىڭ اتادان قالعان مەكەنى - سولتۇستىك قازاقستاننىڭ كيەلى جەرى

پەتروپاۆل. قازاقپارات - س ق و ايىرتاۋ اۋدانىنداعى ءۋاليحانوۆتاردىڭ اتادان ميراس بولىپ قالعان مەكەنى قازاقستاننىڭ كيەلى جەرلەرى قاتارىنا ەنگىزىلدى، دەپ حابارلايدى «قازاقپارات» ح ا ا ءتىلشىسى مادەنيەت، مۇراعات جانە قۇجاتتامالار باسقارماسىنا سىلتەمە جاساپ.

«سىرىمبەت» مەكەنى 19 عاسىرعا تيەسىلى اعاش ساۋلەتىنىڭ ەسكەرتكىشى. ول سىرىمبەت اۋىلىنان ءۇش شاقىرىم قاشىقتىقتاعى كوركەم تابيعاتتى قاراعايلى توبەشىكتەردىڭ ورتاسىندا ورنالاسقان.

ول تۇتاس اۋىلدى دالا جەلىنەن قورعاپ تۇرادى. ءۋاليحانوۆتار ءۇي-جايى سىرتىنان قاراعاندا 19- عاسىرداعى ورىس دۆورياندارىنىڭ مەكەنىن ەسكە سالادى. سولاي بولاتىنى زاڭدى دا.

ويتكەنى، ءۇي-جاي يمپەراتور ءبىرىنشى الەكساندردىڭ 1824-جىلدىڭ 30- ساۋىرىندەگى بۇيرىعى بويىنشا، ءۋالي حاننىڭ جەسىرى، ابىلاي حاننىڭ كەلىنى جانە شوقاننىڭ اجەسى ايعانىمعا ارنالىپ سالىنعان.

بۇل جەردە بەلگىلى عالىمنىڭ بالالىق شاعى ءوتتى، ول ومبىداعى كادەت كورپۋسىنان وسى جەرگە دەمالىسقا كەلەتىن. سىرىمبەتتە بۇل ۇيدەن باسقا، مەشىت، مەكتەپ، ديىرمەن، قىزمەتشىلەرگە ارنالعان ءۇي، مونشا جانە باسقا دا شارۋاشىلىق ورىندارى بار.

«ايعانىمنىڭ ءۇيى اعارتۋشىلىق ويلاردىڭ تاراۋىندا ۇلكەن ماڭىزعا يە بولدى. بۇل جەردە ايتىستار ۇيىمداستىرىلىپ، بەلگىلى كومپوزيتورلار، اقىندار مەن انشىلەر ونەر كورسەتكەن»، - دەدى مادەنيەت باسقارماسىنىڭ قىزمەتكەرلەرى.

«سىرىمبەت» ءۇي-جايى وركەندەۋدى دە، قۇلدىراۋدى دا كوردى. 1917-جىلعا قاراي، ول تۇتاستاي بۇزىلدى.

كەڭەستىك بيلىك ونىڭ ماتەريالدارىن باسقا عيماراتتاردىڭ قۇرىلىسىنا پايدالاندى. 1993-جىل ءۇي- جايدىڭ ەكىنشى رەت دۇنيەگە كەلگەن جىلى بولدى. سول جىلى ق ر ۇكىمەتىنىڭ تاريحي ەسكەرتكىشتى قايتا قۇرۋ تۋرالى قاۋلىسى جاريالاندى.

ءۇي-جاي شوقاننىڭ تۋعانىنا 150 جىل تولۋى قارساڭىندا تولىقتاي قالپىنا كەلتىرىلدى. 1995-جىلى ءۋاليحانوۆتاردىڭ ميراس بولىپ قالعان جەرىنە قازاقستان، وزبەكستان جانە قىرعىزستان پرەزيدەنتتەرى كەلدى.

جىل سايىن «سىرىمبەت» اۋىلىندا شوقان ءۋاليحانوۆتىڭ ءومىرى مەن ەڭبەگىنە ارنالعان ادەبي شارالار وتكىزىلىپ، دارىستەر وقىلادى.