تۇمانباي اقىننىڭ تۋعان جەرىندە ەسكەرتكىشى اشىلدى - فوتو

تالدىقورعان. قازاقپارات - الماتى وبلىسىندا قازاقتىڭ كورنەكتى اقىنى تۇمانباي مولداعاليەۆتىڭ ەسكەرتكىشى اشىلدى.

بيۋست ەڭبەكشىقازاق اۋدانىنىڭ ەسىك قالاسىنداعى اۋداندىق مادەنيەت ءۇيىنىڭ الدىنداعى الاڭعا قويىلدى.

اشىلۋ سالتاناتىنا اقىننىڭ جارى كۇلتاي قاسىم قىزى، قازاق ادەبيەتىنىڭ بەلدى وكىلدەرى قاتىستى، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.

كوپشىلىكتى وسىناۋ ايتۋلى وقيعامەن وبلىس اكىمىنىڭ ورىنباسارى جاقسىلىق ومار قۇتتىقتادى.

ول ءوز سوزىندە «رۋحاني جاڭعىرۋ» باعدارلاماسى اياسىندا وڭىردە اۋقىمدى جۇمىستار اتقارىلىپ جاتقانىن تىلگە تيەك ەتتى.

«مادەنيەتتىڭ ىشىندەگى سۇبەلى ورىن - ادەبيەتتىڭ ەنشىسىندە. قازاق ادەبيەتى ءوزىنىڭ سان عاسىرلىق تاريحىندا تالاي تالانتتى تۇلعالارىن تانىتتى. سونىڭ ىشىندە ليريك اقىن تۇمانباي مولداعاليەۆتىڭ ورنى ەرەكشە. ونىڭ دالاداي دارحان، سامالداي جۇمساق، بۇلاقتاي تازا سىرشىل ولەڭدەرى ءوز وقىرمانىن ىزگىلىككە، ادامگەرشىلىككە، گۋمانيستىك ويلارعا جەتەلەگەنى انىق. اقىننىڭ سوزىنە جازىلعان ءشامشى قالداياقوۆ، نۇرعيسا تىلەنديەۆ، اسەت بەيسەۋوۆ سىندى كورنەكتى كومپوزيتورلاردىڭ اندەرىمەن قانشاما بۋىن ۇرپاق ءوسىپ، ەر جەتتى. تۇماعاڭا ارناپ بيۋست - ەسكەرتكىش ورناتۋ اقىننىڭ تۋعان توپىراعىنىڭ قازاق پوەزياسىنا جاساعان قۇرمەتى، اقىننىڭ رۋحىنا باس يگەندىكتىڭ كورىنىسى دەپ بىلەمىن. بارشاڭىزدى وبلىس باسشىلىعىنىڭ اتىنان ايتۋلى وقيعامەن تاعى دا قۇتتىقتايمىن»، - دەدى ج. ومار.

اقىننىڭ جۇبايى كۇلتاي توقتاسىن قىزى وسىنداي يگىلىكتى ءىستى اتقارۋعا مۇرىندىق بولعان جەرلەستەرىنە ريزاشىلىعىن ءبىلدىردى.

«بۇگىنگى قۋانىشىمدى ءبىر سوزگە سىيعىزىپ ايتۋ مۇمكىن ەمەس. بۇل ءبىزدىڭ وتباسىمىز ءۇشىن عانا ەمەس، تۇتاس ەلىمىز ءۇشىن - ەرەكشە وقيعا. ءوز تۋعان توپىراعىندا بەينەسى اسقاقتاپ تۇرسا، تۇماعاڭدى ەل-جۇرتى، وقىرماندارى ۇمىتپاعانى. بۇگىن ەرەكشە تولقىپ تۇرمىن. ەسكەرتكىشتىڭ اشىلۋىنا اتسالىسقان بارلىق ازاماتتارعا شىن جۇرەكتەن العىس ايتامىن»، - دەدى اقىننىڭ زايىبى.

ءسوز كەزەگىن العان قازاقستان جازۋشىلار وداعىنىڭ ءتوراعاسى نۇرلان ورازالين تۇمانباي مولداعاليەۆتىڭ قازاق پوەزياسىن، ءسوز ونەرىن دامىتۋعا قوسقان ولشەۋسىز ۇلەسىنە كەڭىنەن توقتالىپ، اقىننىڭ ەسىمى زامان وزعان سايىن جارقىراي تۇسەتىنىن ايتتى.

باس قوسۋ سوڭىندا جينالعان قاۋىم ءوڭىر ونەرپازدارىنىڭ كونسەرتىن تاماشالادى.

ايتا كەتۋ كەرەك، ەسكەرتكىشتىڭ ەسكيزدىك جوباسىنىڭ اۆتورى - ساۋلەتشى، ەتنوديزاينەر قۇرمانعازى قادىروۆ، ءمۇسىنشىسى - التاي بەيسەنوۆ. اقىننىڭ بيۋستى قولادان جاسالعان، تۇعىرى ءمارمار تاستان دايىندالعان. ەسكەرتكىشتىڭ بيىكتىگى - 4 مەتر. الاڭى 3,5 گ ا بولاتىن اۋماق 76 ميلليون تەڭگەگە اباتتاندىرىلعان.

مۇندا 70 جارىق باعاناسى، 4 سۇحباتتاساتىن ورىن، 30 ورىندىق ورناتىلعان. 1,5 شاقىرىمعا جاياۋ جۇرگىنشىلەرگە ارنالعان جول توسەلگەن. 120 تيان-شان شىرشاسى,150 گە جۋىق راۋشان گۇلى ەگىلگەن.

اۆتور: سامال قابىشەۆا