باتىرلىق دەگەنىمىز نە؟

 استانا. قازاقپارات - باتىر دەسە ءبىزدىڭ كوز الدىمىزعا ەكى يىعىنا ەكى كىسى مىنگەسكەندەي الىپ ەر ازامات نەمەسە ات ۇستىندە ءجۇرىپ جاۋعا شاپقان ەجەلگى اتا- بابالارىمىز ەلەستەيدى.

 ءبىز ءۇشىن ءبىر قولى نە ءبىر اياعىن جاۋعا بەرىپ كەلگەن سوعىس ارداگەرلەرىن دە باتىر دەيمىز. سوندا ولاردان باسقا باتىر بولماعانى ما؟ كوشە تازالاۋشىلارى دا باتىر بولا الادى. الا تاڭنان بارىنەن بۇرىن ويانىپ، ءسىز جۇمىسقا شىعامىن دەگەنشە جۇرەتىن جولىڭىزدى جاپىراقتان، قاردان تازارتىپ قويادى. وتكەن- كەتكەندەردىڭ مۇسىركەپ قاراعان كوزدەرىن، كەكەتە سويلەگەن سوزدەرىن قاپەرگە المايدى. دوستارىنىڭ ءوزى تۋرالى نە ويلايتىنى دا ماڭىزدى ەمەس. باستىسى، ماڭداي تەرىمەن ادال اقىسىن الىپ ءجۇر. باسقا جۇمىس بولماسا ءسىز وسى ىسپەن اينالىسا الار ما ەدىڭىز؟

داياشىلار دا باتىر بولا الادى. جىگىت باسىمەن داستارقاندى ءسۇرتىپ، بىرنەشە ىدىستى اسا ساقتىقپەن ارى- بەرى الىپ شاپقىلاعانىن ەسەپتەمەگەننىڭ وزىندە، كۇنىنە نەشە ءتۇرلى كليەنت كەلەتىنىن ويلاپ كورىڭىز. ءبىرى سىرتتان اشۋلانىپ كەلىپ جىنىن داياشىدان الادى، ءبىرى تىرناق استىنان كىر ىزدەپ، سەبەپسىز جەردەن الىپ، جەرگە سالادى. مۇنىڭ بارلىعىنا ۇندەمەي شىدادى دەيىك. ولىمنەن ۇيات كۇشتى ەمەس پە؟ ول ادامنىڭ مەنسىنبەي، تومەندەتىپ قاراعان كوزقاراسى شە؟ ءسىز وسىنىڭ بارلىعىنا توزە الار ما ەدىڭىز؟

ءتىلشى دە باتىر بولا الادى. ەگەر ەشتەڭەگە قاراماستان، شىندىقتى شىرقىراتىپ جازا السا.. . ەشكىم باتىلى بارىپ ايتا الماعاندى اشىپ جازعانىنان قوعامدى وزگەرتۋگە، جوعارى جاققا قوزعاۋ سالۋعا مۇمكىندىگى بولىپ تۇرعاندا، وتباسىن ويلاماي، جۇمىستان شىعارىپ جىبەرەدى، سوتتاپ جىبەرەدى، ءولتىرىپ كەتەدى دەپ جەكە جاعدايىن ويلاماي، الەمدى وزگەرتۋ ءۇشىن باسىن قاتەرگە تىگە السا، ونىڭ باتىر بولعانى. بۇل مامانداردىڭ بارلىعى بىردەي وسى ماماندىقتى تاڭداعانى ءۇشىن باتىر دەگەن ءسوز ەمەس. اڭگىمە ءوزى ۇناتقان نە قالاعان ءىسى ءۇشىن ەشتەڭەگە قاراماۋىندا جانە موينىنا العان شارۋانى قانداي دەڭگەيدە اتقارعانىنا بايلانىستى.

 قازاقتا «باتىر انا» دەگەن ۇعىم بار. ءبىر ادامنىڭ ىشىنەن ءبىر ادام شىعۋى، ومىرگە نارەستە اكەلۋ وڭاي ءىس ەمەس. ونى 273 كۇن بويى قۇرساعىڭدى كوتەرىپ، كۇتىمىن جاساۋ دا قيىن. الايدا بۇل ءىس كەيدە وقۋشى قىزداردىڭ ءوزىنىڭ قولىنان كەلەدى. ال قاتارىنان 7-8 بالانى وسىلاي جارىق دۇنيەگە اكەلىپ، قاتارىنان قالدىرماي ءوسىرۋ كەز كەلگەن انانىڭ قولىنان كەلمەيدى، سوندىقتان 7 بالادان ارتىق تاپقان اناعا عانا وسى مارتەبە بەرىلەدى.

باتىرلىق -  ادامگەرشىلىكتەن، جاۋاپكەرشىلىكتەن تۋادى. ءسىزدىڭ عانا قولىڭىزدان كەلەتىنىن كورىپ تۇرىپ، تارتىنىپ قالماي، مويىنعا العان ءىستى ابىرويمەن الىپ شىقساڭىز باتىرسىز. قولىنا نايزا الىپ، ساداق ۇستاعاننىڭ ءبارى باتىر ەمەس، جاۋعا جالعىز شاۋىپ، دارا ەرلىك كورسەتكەن -  باتىر. باتىرلىق -  ءوز قاراقان باسىنان بۇرىن، ەل قامىن ويلاۋ، ءوز جانۇياسىنان وتانىن بيىك قويۋ. باتىرلىق -  باسقانىڭ قولىنان كەلمەيتىن ءىستى جەكە ءوزى اتقارۋ.

Massaget.kz