قازاقستان اۋعانستانعا كومەك كورسەتۋىن جالعاستىرادى - ق ر پرەزيدەنتى

استانا. قازاقپارات - قازاقستان اۋعانستانعا تەحنيكالىق جانە گۋمانيتارلىق كومەك كورسەتۋىن جالعاستىرادى.

 بۇل تۋرالى بۇگىن اقوردادا قازاقستانداعى توتەنشە جانە وكىلەتتى ەلشى بولىپ تاعايىندالعان ءبىرقاتار شەتەلدىڭ ديپلوماتىنان سەنىم گراموتاسىن قابىلداعان ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.

«وسى جىلدارى اۋعانستانمەن ءوزارا ساياسي ءىس- قيمىل ايتارلىقتاي جاندانىپ كەلەدى. 2015 -جىلى اۋعانستان پرەزيدەنتى موحامماد اشراف عاني رەسمي ساپارمەن قازاقستانعا كەلدى. بيىل ءبىز عاني مىرزامەن شاڭحاي ىنتىماقتاستىق ۇيىمى مەن يسلام ىنتىماقتاستىق ۇيىمىندا كەلىسسوزدەر جۇرگىزدىك. ءوزارا ساۋدا كولەمى جارتى ميلليارد دوللارعا جەتىپ، الماتى مەن كابۋل قالاسىندا ساۋدا ۇيلەرى اشىلدى. ءبىز تەحنيكالىق جانە گۋمانيتارلىق كومەك كورسەتۋدى دە جالعاستىرا بەرەتىن بولامىز. اۋعانستاننىڭ قاۋىپسىز ءارى ورنىقتى دامۋى وڭىرىمىزدەگى بەيبىتشىلىك، تۇراقتىلىقتى وركەندەتۋدىڭ كەپىلى بولادى»، - دەدى نۇرسۇلتان نازاربايەۆ.

 مەملەكەت باسشىسى قازاقستان كانادامەن كوپ سالالى ىنتىماقتاستىقتى ودان ارى نىعايتۋعا نيەتتى ەكەندىگىن باسا ايتتى.

«وتكەن جىلى - G 20 سامميتىندەگى كەزدەۋدە پرەمەر- مينيستر دجاستين تريۋدومەن ءتۇرلى سالاداعى بايلانىستاردى نىعايتۋ جونىندە ۋاعدالاستىق. بيىلعى ماۋسىم ايىندا استانادا قازاقستان- كانادا ىسكەرلىك كەڭەسىنىڭ ءوتۋى سول ۋاعدالاستىقتىڭ ناقتى ىسكە اسىرىلۋى بولىپ تابىلادى. بەلگيامەن ءىس- قيمىل ءوزارا قۇرمەت پەن سەنىم قاعيداتتارىنا نەگىزدەلگەن. 2014 -جىلعى قازاندا مەن بريۋسسەلگە جۇمىس ساپارىمەن بارىپ، جوعارى مارتەبەلى كورول فيليپپەن كەلىسسوزدەر وتكىزدىم. وندا ەكىجاقتى جانە كوپجاقتى ىنتىماقتاستىقتىڭ وزەكتى ماسەلەلەرى جونىندە پىكىر الىستىق. بەلگيا كاپيتالى، تەحنولوگيالارىن قازاقستان نارىعىنداعى بىرلەسكەن جوبالارعا بەلسەندى تۇردە تارتۋدى قۇپتايمىز»، - دەدى ەلباسى.

نۇرسۇلتان نازاربايەۆ پولشا رەسپۋبليكاسى ورتالىق جانە شىعىس ەۋروپاداعى قازاقستاننىڭ نەگىزگى سەرىكتەستەرىنىڭ ءبىرى بولىپ تابىلاتىندىعىن ايرىقشا اتادى.

 «2016 -جىلعى تامىزداعى ۆارشاۆاعا مەنىڭ مەملەكەتتىك ساپارىمنىڭ جانە پولشا پرەزيدەنتى اندجەي دۋدانىڭ بيىلعى قىركۇيەكتىڭ باسىنداعى قازاقستانعا مەملەكەتتىك ساپارىنىڭ قورىتىندىلارىن جوعارى باعالايمىز. وتكەن كەلىسسوزدەر قازاقستان- پولشا اراسىنداعى ديالوگتىڭ الەۋەتى زور ەكەندىگىن دالەلدەپ، ءوزارا ءتيىمدى كوپتەگەن جوبالارعا جول اشتى دەپ سانايمىن»، - دەدى ق ر پرەزيدەنتى.

قازاقستان مەن فينليانديانى ءداستۇرلى دوستىق قاتىناستار مەن كوپ جىلداردان بەرگى ىنتىماقتاستىق بايلانىستىرىپ كەلە جاتقاندىعىنا دا توقتالدى. «پرەزيدەنت ساۋلي نيينيستەنىڭ بيىلعى ماۋسىمداعى استاناعا ساپارى ءوزارا ءىس- قيمىلىمىزدىڭ جوعارى دەڭگەيدە ەكەندىگىن كورسەتتى. استانا مەن حەلسينكي اراسىندا تىكەلەي اۋە رەيسىنىڭ اشىلۋى ايتۋلى وقيعا بولدى. جاسىل تەحنولوگيالاردى دامىتۋ جونىندەگى ورتالىق قۇرىلدى. قازاقستاندا فينن كاسىپورىندارى اشىلۋدا. جوعارعى جانە ۇكىمەتارالىق دەڭگەيدەگى ۋاعدالاستىقتاردىڭ ودان ارى ىسكە اسىرىلۋىن قامتاماسىز ەتۋگە دايىنبىز. سولاردىڭ ناتيجەسىندە ماشينا جاساۋ، عارىش، مەتاللۋرگيا، كولىك جانە باسقا دا سالالاردا تەحنولوگيالىق جوبالار ازىرلەندى»، - دەدى مەملەكەت باسشىسى.

ق ر پرەزيدەنتى فرانسيا پرەزيدەنتى ەممانۋەل ماكرونمەن جەمىستى بايلانىستى دامىتۋعا نيەتتى ەكەندىگىن، ەكى ەلدىڭ اراسىندا ەكونوميكالىق، مادەني، ءبىلىم سالاسىنداعى قارىم- قاتىناستار بۇرىننان دامىپ كەلە جاتقانىن ايتتى.

«ەستونيامەن قارىم- قاتىناسىمىز قارقىندى دامىپ كەلە جاتقانىن اتاپ وتكىم كەلەدى. ءبىز كولىك جانە ترانزيت، ەنەرگەتيكا، كوممۋنيكاتسيا، تەحنولوگيا سياقتى پەرسپەكتيۆالى باعىتتار بويىنشا جۇمىس جاساۋعا ءازىرمىز. ەۋروپالىق وداققا ءتوراعالىق ەتىپ وتىرعان ەستونيا باسشىلىعى قازاقستان مەن ەۋروپا سەرىكتەستىگىن ىلگەرىلەتۋگە ۇلەس قوسادى دەپ سەنەمىز»، - دەدى نۇرسۇلتان نازاربايەۆ.

 اۆتور: مارلان جيەمباي