باكۋدە ايەل پوليتسەيلەر جاعالاۋدى كۇزەتۋگە كىرىستى
ولار تۋرا ەر-ازاماتتار سەكىلدى جۋان تاياقپەن، تەمىر كىسەن جانە گاز باللونمەن جاراقتانعان، دەپ حابارلايدى حابار 24 تەلەارناسى.
قالا تۇرعىندارى جاعاجاي كۇزەتكەن ايەل پوليتسەيلەردى العاش رەت كورىپ تۇر. تاڭعى ساعات 9-دان كەشكى 10-عا دەيىن فورماداعى حانىمدار بۇيرىق بويىنشا بەكىتىلگەن ايماقتى باقىلايدى. پوليتسيا قىزمەتكەرلەرىنىڭ ەتيكالىق مىنەز-قۇلىق كودەكسىن، نۇسقاۋلىقتاردى ۇلگىلى تۇردە ورىنداۋ جانە مۇقيات بولۋ - ولاردىڭ باستى مىندەتى.
«ءبىزدىڭ مىندەتىمىز - قوعامدىق قاۋىپسىزدىك پەن قۇقىق ءتارتىبىن قامتاماسىز ەتۋ. قاجەت بولعان جاعدايدا ادامدارعا كومەك كورسەتۋ. وسى قىزمەتتە حالىققا كومەكتەسە الاتىنىما وتە قۋانىشتىمىن»، - دەيدى پوليتسيا سەرجانتى اينۇر اليەۆا.
«دەمالىس كۇندەرى قالا تۇرعىندارى مەن تۋريستەر نەگىزىنەن جاعالاۋدا جينالاتىنىن ەسكەرىپ، پاترۋلدىك قىزمەتكە ايەل ادامداردى قويدىق. ەگەر ازاماتشالار زاڭعا قايشى ارەكەت جاساسا نەمەسە ولارعا كومەك قاجەت بولسا، ولارمەن ايەل پوليتسەيلەر اينالىسۋى كەرەك دەپ سانايمىز»، دەيدى پوليتسيا پودپولكوۆنيگى انار گۋسەينوۆ.
ايەل پوليتسەيلەردىڭ قىلمىسكەرلەرگە شامالارى كەلمەسە، كەزەشى بولىمگە حابارلاسىپ، كومەك شاقىرادى.
جالپى ازەربايجاننىڭ ىشكى ىستەر مينيسترلىگىندە 3 مىڭعا جۋىق ايەل جۇمىس ىستەيدى. ولاردىڭ قاتارىندا جەدەل- ىزكەسۋشىلەر، تەرگەۋشىلەر، ىشكى اسكەر قىزمەتكەرلەرى بار.
