ەسەپ كوميتەتىنىڭ قۇزىرەتىن كەڭەيتۋ كەرەك - ءاليحان بايمەنوۆ

استانا. قازاقپارات - استانا مەملەكەتتىك قىزمەت حابىنىڭ باسشىسى ءاليحان بايمەنوۆتىڭ ويىنشا، مەملەكەتتىك ورگانداردىڭ تيىمدىلىگىن باعالاۋدى ق ر رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنە بەرۋ كەرەك، دەپ حابارلايدى قازاقپارات ءتىلشىسى.

«شىنى كەرەك، ەسەپ كوميتەتى بۇرىنعىداي اتالعانىمەن قازىرگى كەزدە ونىڭ ماقسات-مىندەتتەرى كەڭەيىپ وتىر. ماسەلەن، اتالعان مەكەمە قارجىنى زاڭ بويىنشا جۇمساۋدى عانا ەمەس، جۇمسالعان قارجىنىڭ تيىمدىلىگىن دە انىقتايدى. ونى اۋديت دەيدى. باعالاۋ جۇيەسىنىڭ ماقساتى دا سوعان جاقىن. سول سەبەپتى ەۋروپا ەلدەرىنىڭ كوبىسىندە اۋديت جۇيەسى مەن باعالاۋ جۇيەسى بىرىككەن. بۇل مەملەكەتتىك رەسۋرستاردى دا ءتيىمدى جۇمساۋعا مۇمكىندىك بەرەدى. ەسەپ كوميتەتى - تىكەلەي پرەزيدەنتكە باعىناتىن ورگان. سوندىقتان ول ۇكىمەتتىك ورگانداردىڭ جۇمىسىن بەيتاراپ، تاۋەلسىز باعالاي الادى»، - دەدى بايمەنوۆ قازاقپارات تىلشىسىنە بەرگەن سۇحباتىندا.

حاب باسشىسىنىڭ ايتۋىنشا، ەسەپ كوميتەتىنىڭ اتاۋىن وزگەرتۋدىڭ قاجەتى جوق. ونىڭ قۇزىرەتىن مەملەكەتتىك ورگانداردىڭ جۇمىسىن باعالاۋ قۇزىرەتىن عانا بەرۋ كەرەك.

«مەنىڭ ويىمشا، قازىرگى جۇيە التى جىل بويى ءوز ميسسياسىن اتقارىپ كەلەدى. دەگەنمەن، ونىڭ تيىمدىلىگىن ارى قاراي دامىتۋ ءۇشىن اۋديت پەن باعالاۋدى ينتەگراتسيالاۋ قاجەت»، - دەپ اتاپ كورسەتتى ءا. بايمەنوۆ.

ايتا كەتەيىك، بۇگىن تۇركيانىڭ ىستانبۇل قالاسىندا مەملەكەتتىك ورگانداردىڭ تيىمدىلىگىن باعالاۋ سالاسىنداعى قازاقستاننىڭ تاجىريبەسى كەڭىنەن تانىستىرىلدى. اتالعان شارا باعالاۋ سالاسىنداعى ۇلتتىق الەۋەتكە ارنالعان V جاھاندىق كونفەرەنسيا اياسىندا ءوتىپ وتىر.

اۆتور: ارمان اسقاروۆ