قىتايدىڭ شانشي ولكەسىنەن پاۆلودارعا العاشقى جۇك پويىزى كەلدى
پاۆلودار وبلىستىق ينۆەستيتسيالاردى تارتۋ اگەنتتىگىنىڭ باسشىسى ءانۋار مۇكىشەۆ پويىزدىڭ «ءبىر بەلدەۋ، ءبىر جول» باعدارلاماسىنىڭ اياسىندا كەلگەنىن ايتتى.
«قىتاي قازاقستان جانە رەسەي ارقىلى ەۋروپاعا تەمىر جول ارقىلى تۋرا جۇك تاسىمالداۋدى جوسپارلاپ وتىر، كولىكتىڭ باسقا تۇرلەرىنە قاراعاندا بۇل ارزانداۋ تۇسەتىنى بەلگىلى. بۇدان تىس قىتايدان روتتەردامعا دەيىن جۇك 40 كۇن جۇرەدى، ال تەمىر جول ونى ايتارلىقتاي قىسقارتادى»، - دەيدى باسشى.
سوندىقتان قىتاي بۇل مارشرۋتتاردى سىناقتان وتكىزىپ جاتىر. العاشقى پويىز كوممەرتسيالىق جۇك الىپ كەلدى، ءا. مۇكىشەۆتىڭ پىكىرىنشە، بۇل ساۋدا بايلانىستارىن جانداندىرۋعا سەپتىگىن تيگىزەدى. قىتاي كوپ كۇش سالىپ وتىرعان «ءبىر بەلدەۋ، ءبىر جول» جوباسى بويىنشا 40 ەل كەلىسىمدەرگە قول قويعان، قىتايدان نيدەرلاندىعا، ۇلى بريتانياعا، بەلارۋسكە، يرانعا تەمىر جول باعىتتارىن اشىلدى. تاعى ءبىر پويىز 29 - قىركۇيەك كۇنى ۇرىمجىدەن روتتەردامعا قاراي بەت تۇزەگەن.
