جاراقاتىنان ايىققان دەنيس تەن ديماشتىڭ حيتىمەن ونەر كورسەتەدى

استانا. قازاقپارات - قازاقستاندىق مانەرلەپ سىرعاناۋشى، وليمپيادا ويىندارىنىڭ قولا جۇلدەگەرى دەنيس تەن تامىزدا العان جاراقاتىنان ايىعىپ، مۇز ايدىنىنا قايتا ورالاتىنىن مالىمدەدى، دەپ حابارلايدى «قازاقپارات» ح ا ا ءتىلشىسى.

سپورتشى ونەر كورسەتەتىن باعدارلامالاردىڭ ءبىرى ديماش قۇدايبەرگەن ورىنداعان فرانسۋزشا SOS d'un terrien en détresse كومپوزيتسياسىمەن سۇيەمەلدەنەدى. تانىمال ءانشى ينستاگرامداعى پاراقشاسىندا قازاقستاننىڭ ماقتانىشى دەپ اتاپ، سپورتشىعا ساتتىلىك تىلەدى.

«جىلى سوزدەرىڭ ءۇشىن راحمەت. سەنىڭ انىڭە بيلەۋ - ماعان ۇلكەن مارتەبە. وسى كومپوزيتسياعا وليمپيادا جىلىندا ۇلكەن ءۇمىت ارتىپ وتىرمىز. ەكى اي بۇرىن سپورتتىق مانسابىمدا ەڭ اۋىر جاراقات العان ەدىم... ءبىراق دارىگەرلەردىڭ بولجامىنا قاراماستان، وسى اپتادا فرانسيادا بىرىككەن شىعارمامىزدى جۇرتشىلىققا ۇسىنۋ باقىتى بۇيىردى»، - دەپ جاۋاپ قاتتى سپورتشى.

دەنيس تەن بيىل تولىق وڭالۋ ءۇشىن كوپ جۇمىس ىستەۋى، ساعاتتاپ جاتتىعۋى قاجەت ەكەنىن تىلگە تيەك ەتتى.

ەسكە سالا كەتەيىك، سپورتشى 10- تامىز كۇنى كورەياداعى «Ice Festa» شوۋى قارساڭىندا جاراقات الىپ قالعان بولاتىن.