اۋىلىم كوشىپ كەلسە قىزىلجارعا

 استانا. قازاقپارات - بيىلعى تامىز، قىركۇيەك ايلارى ساپارمەن ءوتىپ، الماتى، تالدىقورعان، شىعىس قازاقستان (وسكەمەن، سەمەي) ، استانا، سولتۇستىك قازاقستان وبلىستارىن ارالاپ قايتتىم.

دۇنيەگە جار سالىپ، ەل جۇرەگىن دۇبىرلەتكەن ەكسپو- نى دا ارالاپ كورۋدى اللا بىزگە ءناسىپ قىلعان ەكەن. سوڭعى كۇندەرىنە ءدال كەلىپپىز. ەكسپو جىرى ءوز الدىنا ءبىر دۇنيە. ءبىز ساپارىمىز جايلى، ياعني سولتۇستىكتىڭ قىرى مەن سىرىن ماقالامىزدىڭ ارقاۋى ەتۋدى ءجون كوردىك.

سەبەبى بۇل ساپارىمىزدىڭ باستى ماقساتى سولتۇستىك قازاقستانعا وڭتۇستىك ايماقتاردان قونىس اۋدارعان باۋىرلارىمىزدىڭ جاي- كۇيىمەن تانىسۋ، قۇر تانىسۋ عانا ەمەس، تۇبىندە ءوزىمىزدىڭ دە وسى جاققا قونىس اۋدارۋ ويىمىزدا بار ەدى. وسىدان بىرنەشە جىل بۇرىن قىتايدان قازاقستاننىڭ وڭتۇستىك وڭىرىنە شوپەك اۋلەتىنەن بىرنەشە وتباسى قونىس تەپكەن ەدى. ولاردىڭ جەرگىلىكتى قانداستارىمەن قۇدا بولعان جايلارى دا بار... ءسويتىپ، وسى اۋلەتتىڭ ۇلكەنى مەككە باستاپ، ىنىلەرى باقاش، سەيدوللا، مۇقيات، شاھيدوللا بولىپ التى كىسى سولتۇستىك وڭىرىنە قاراي جولعا شىقتىق.

پەتروپاۆلدىڭ اۆتوۆوكزالىنان ءبىزدى ارالباي قوجامسەيىت ۇلى كۇتىپ الدى. جاسى الپىسقا كەلسە دە، دەنەسى بالاداي جەڭىل، ەلپىلدەپ تۇراتىن كىسى. ول كىسى اققايىڭ اۋدانىنا قونىس اۋدارعان. ءۇيى وبلىس ورتالىعىنان 40 شاقىرىمداي قاشىقتىقتا، كۇرە جولدىڭ بويىندا ەكەن. ەسىل جانە اققايىڭ اۋداندارىنىڭ تىرشىلىككە قولايلى ەكەنى تۋرالى ارەكەڭ سىلەكەيىمىزدى شۇبىرتىپ اڭگىمەلەپ بەردى. ارالباي اقساقالدىڭ ەلدى، جەردى جەرىنە جەتكىزە ماقتاعانى سونشالىق - بىزبەن بىرگە بارعاندار اجەپتەۋىر قوپاقتاپ قالدى. ەرتەڭىندە اققايىڭ اۋداندىق ءماسليحاتىنىڭ دەپۋتاتى قيزات قۇرمانبايەۆ، اۋداندىق جۇمىسپەن قامتۋ مەكەمەسىنىڭ ديرەكتورى قانات سادىقوۆپەن اڭگىمە- دۇكەن قۇردىق. ولار ءبىزدىڭ ساپارىمىزدىڭ مازمۇنىمەن تانىسقان سوڭ، بىزگە ارنايى كولىك ءبولدى.

قانات پەن قيزات اعانىڭ باستاۋىمەن ءبىراز ەلدى مەكەندەرمەن تانىستىق. سولاردىڭ العاشقىسى، چەركاس اۋىلىنا جاڭادان تاعايىندالعان اكىم ءلاززات تەمىرحان قىزى اعىنان جارىلىپ قارسى الدى. دەرەۋ بوس ۇيلەردى كورسەتە باستادى.

- بىرنەشە ءۇي بوس تۇر. يەلەرى رەسەيگە، استاناعا، پەتروپاۆلعا قونىس اۋدارعان. قانشا وتباسى كوشىپ كەلەسىزدەر؟ - دەپ سۇرادى ءلاززات حانىم.

- ءبىز قازىر ەلمەن، جەرمەن تانىسىپ ءجۇرمىز، - دەدى ارالباي اقساقال.

ودان كەيىن لەنين اۋىلىنا باردىق. اۋىل اكىمى باباقوۆ جۇمىستارىمەن اۋدان ورتالىعىندا ءجۇر ەكەن. ول كىسىنىڭ كابينەتىن اشتىرىپ، قيزات اعا وسى اۋىل اكىمشىلىگىندە ىستەيتىن جىگىتتەرمەن تانىستىردى. ولاردىڭ سوزىنەن ۇققانىمىز: اۋىلدا قولعا بىرەر سيىر، از- ماز ۇساق مال ۇستاۋعا بولادى. تابىن- تابىن سيىر، قورا- قورا قوي باعاتىن ءورىستى جەر بۇل اۋىلدا جوق ەكەن. ونداي جەرلەر كەزىندە دوكەيلەردىڭ قولىنا ءوتىپ كەتكەن... ال ارالاعاش كۇرە جولدىڭ بويىندا قالادان نەبارى 70 شاقىرىم قاشىقتىقتاعى اۋىل ەكەن. 100 دەن اسا وتباسى، ورتا مەكتەبى بار. بۇل اۋىلعا وزبەكستاننان - بەس، قىتايدان ءبىر قازاق وتباسى كوشىپ كەلىپتى. قىتايدان كەلگەن  سەرىك قابىل مىرزامەن كورشى بولعان وزبەكستاندىق بەس وتباسى ءبىر اتانىڭ بالاسىنداي ءبىر- بىرىنە باۋىرمال، تاتۋ- ءتاتتى ءومىر ءسۇرىپ جاتقان جايى بار. بەرىك راۋشانوۆ قازىرگى تاڭدا 80 گا ەگىستىك جانە 13 گا جايىلىمدىق جەردى جالعا العان. جەتى- سەگىز جىلقى، 12 سيىر باعىپ وتىر. ال جولبارىس يۋسىپەكوۆتىڭ سيىرىنىڭ سانى 30 شاقتى. قىستىڭ قامىن جاز ويلاعان بۇل جىگىتتەر قىسقا الدىن الا دايىندالىپ، جەم- ءشوبىن تولىعىمەن قامداپ العان.

وسى اۋىلدىڭ بولىمشەسى امانگەلدىگە دە جولىمىز ءتۇستى. بۇرىن 100 دەن استام ءۇيى، بار جاعدايى جاسالعان اۋىل بولعان ەكەن. تۇرعىندارى جان- جاققا كوشىپ، بۇگىندە 12 اق ءتۇتىن قالىپتى. ءوزى قالادا تۇرسا دا، اۋىلداعى كاسىبىنەن قول ۇزگىسى كەلمەيتىن تولەگەن اقساقال مەن مارحابا اپايدىڭ اقكوڭىل، ىستىق ىقىلاسىنا بولەندىك. داستارحانىن جايىپ، قىمىزىن قۇيىپ، قوناقجايلىلىق تانىتتى.

سول كۇنى شىمكەنتتەن كەلگەن بەس جىگىت كەرى قايتتى. ماعان «ءبىر اۋدانمەن عانا تانىستىم. قالعان اۋدان، اۋىلداردىڭ جاي- جاپسارىمەن نەگە تانىسپاسقا؟ » دەگەن وي كەلدى. سونىمەن، جولسەرىكتەرىمنەن ءبولىنىپ قالا بەردىم. الدىمەن قالادان 15 شاقىرىم قاشىقتىقتاعى بايتەرەك اۋىلىنا ات باسىن بۇردىم. بايتەرەكتە سەگىز مەملەكەتتەن كوشىپ كەلگەن 376 وتباسى تۇرادى ەكەن. بىرەن- ساراندارى اۋا رايىن سىلتاۋراتىپ بۇرىنعى كەلگەن جەرلەرىنە كەرى كوشىپ كەتكەن. ولاردىڭ ورنىن جەرگىلىكتى وتباسىلار تولىقتىرىپتى. ءزاۋلىم مەكتەبى، مەدپۋنكتى بار. اۋىل دەگەن - اتى، ايتپەسە شاعىن قالاشىققا ۇقسايدى.

وسى ساپار بارىسىندا وبلىس اكىمىنىڭ ورىنباسارى، ۇزاق جىلدار جۇمىسپەن قامتۋ ورتالىعىن باسقارعان اسقار ساقىپكەرەيەۆپەن اڭگىمەلەسۋدىڭ ءساتى ءتۇستى. وبلىستىق جۇمىسپەن قامتۋ ورتالىعى باستىعىنىڭ ورىنباسارى الماز تەمىربولاتوۆ جانە الما تىلەگەن قىزى اقىلداسا كەلە، وبلىستاعى بارلىق اۋدانداردى (13 اۋدان) ارالاپ، وڭتۇستىك ايماقتاردان كوشىپ كەلگەن قانداستارىمىزعا قانداي جاعداي جاسالىپ جاتقانىن جانە ولاردىڭ تىنىس- تىرشىلىگىمەن تانىسۋ ءۇشىن ارنايى كولىكپەن الىپ جۇرەتىن بولدى.

بۇل وڭىرگە كوشىپ كەلۋشىلەر كوبىنەسە م. جۇمابايەۆ اۋدانىنا قونىس تەبەدى ەكەن. اۋدان اكىمى اسقار بەگمانوۆ وڭتۇستىكتىڭ تۋماسى، بۇعان دەيىن استانادا جانە باسقا اۋدانداردا قىزمەت اتقارعان. ءوزى ارنايى قابىلداپ، اشىق- جارقىن اڭگىمە- دۇكەن قۇردى. 39 وتباسىن باسپانامەن، جۇمىسپەن قامتاماسىز ەتىپتى. قىتايدان كەلگەن باۋىرلارىمىزدىڭ كەيبىر قۇجاتتارى دۇرىس بولماي قالىپ، سولاردىڭ شارۋاسىمەن استاناعا دەيىن ىزدەنىپ بارعانىن ەستىگەندە تىپتەن ءسۇيسىنىپ قالدىق. قاي اكىم وسىنداي قانجىلىك بولىپ حالقى ءۇشىن شاپقىلاپ ءجۇر؟ !.

ادامنىڭ جانىنا باتىپ، جىگەرىڭدى قۇم قىلىپ، جۇرەگىڭدى اۋىرتاتىن اۋىر جايت - اۋىلدارداعى مەكتەپتەردە بالا سانىنىڭ كۇرت ازايۋى. سونىڭ بىرنەشە مىسالى: مامليۋت اۋدانى بوستاندىق اۋىلىنىڭ كوپقاباتتى مەكتەبى جايناپ تۇر. 1991 -جىلى 300 وقۋشىعا ارناپ سالىنعان مەكتەپتە قازىر 60 بالا عانا وقيدى. ۇلتتىق تەستىلەۋدە وبلىس بويىنشا ۇزدىك 10 مەكتەپتىڭ، رەسپۋبليكا بويىنشا 100 مەكتەپتىڭ ءبىرى اتانعان. مەكتەپ ديرەكتورى ايگۇل سارباسوۆا قالا مەكتەپتەرىندە بولا بەرمەيتىن ءبىلىم بەرۋدىڭ جاڭا جۇيەلەرىن ەنگىزگەنىن ايتىپ قالدى. ءبىراق وسىنداي كەرەمەت ءبىلىم ورداسى كوشكەن جۇرتتاي قاڭىراپ بوس تۇر. قاڭىراپ بوس قالعان مەكتەپتىڭ ءبىرى - ع. مۇسىرەپوۆ اۋدانىنداعى سارىبۇلاق مەكتەبى. اۋىلدا 40 قا جۋىق وتباسى بار. مەكتەپتە ءۇش- اق بالا، ءبىر ءمۇعالىم، ءبىر ديرەكتور. وسىلايشا جامبىل اۋدانىندا ءتورت مەكتەپ، ەسىل اۋدانىندا بەس مەكتەپ جابىلعان. ءبىز كورمەگەن اۋىلداردا قانشاما مەكتەپتەردىڭ جابىلىپ جاتقانى ءبىر قۇدايدىڭ وزىنە ايان.

اۋىل - قازاقتىڭ قان تامىرى، كوز نۇرى، كوكىرەك ايناسى. امال قانشا، ادامداردىڭ تىرشىلىگى قالاعا بايلاندى. سول سەبەپتى اۋىلدا كارى- قۇرتاڭدار عانا قالدى. قانىڭدى مۇزداتىپ، جانىڭدى سىزداتاتىن مۇنداي مىسالداردىڭ الدەنەشەۋىن كەلتىرۋگە بولادى. ەندى وسىنداي اۋىلدارعا ءوڭ بەرىپ، مەكتەپكە بالا سانىن اسىرىپ، اۋىل تىرشىلىگىنە اجار بەرگەن اعايىندار تۋرالى ايتا كەتسەك. وسىناۋ ەڭبەكسۇيگىش جاندارعا تاڭعالماي تۇرا المايسىڭ. ەسىل اۋدانىنداعى بىرلىك ەلدى مەكەنىنە قىتايدان 12 وتباسى كوشىپ كەلگەن. سونىڭ ءبىرى ازامات ارميا ۇلى جۇبايى ەكەۋى قالادا وسكەنىنە قاراماستان، بىلەك سىبانىپ، ەڭبەك ەتۋدە. ون ەكى سيىر الىپ، وعان سەگىز مايا ءشوپ، جەم ءتۇسىرىپ، قىس قامىنا كىرىسكەن ازاماتتىڭ كەلىنشەگى قازاقتىڭ اقجارما قۇرتىن جاساپ، شىپتاسىن جايىپ وتىر. كەلگەنىنە ءالى جارتى جىل بولا قويماعان باۋىرىمىزدىڭ تالپىنىسى تاماشا- اق.

ايىرتاۋ اۋدانىنىڭ كيرلوۆكا اۋىلىنا قىزىلوردا وبلىسى شيەلى اۋدانىنان كوشىپ كەلگەن باقىتجان بەكجانوۆتىڭ وتباسى دا ەڭبەك ەتۋدەن ەش جالىققان ەمەس. 100 گەكتار جەردى 10  جىلعا جالعا العان. جانە 6 پايىز جەڭىلدىكپەن 2 ميلليون تەڭگە نەسيە الىپ، 24 باس سيىر تۇلىگىن ءوسىرىپ، 300 قاز باعىپ، اۋلاسىن قۇسقا دا تولتىرىپ وتىر. قازدىڭ ەتىن، مامىعىن استانادان تاپسىرىسپەن الىپ كەتىپ جاتىر ەكەن. «كەيدە 100 كەلىگە دەيىن تاپسىرىس الامىز، ەرىنبەي ەڭبەك ەتكەنگە بۇل جەردە مۇمكىندىك مول. كۇيەۋىم مەكتەپتە شارۋاشىلىق مەڭگەرۋشىسى بولىپ جۇمىس ىستەيدى. قاينىم مۇقاعالي بەكجانوۆ مالدارىگەرلىك جۇمىسىن اتقارۋدا» ، - دەيدى وتاناسى مارحابات. «ويباي، سولتۇستىگى قۇرىسىن، اياز، قار- بۇرقاقتان كوز اشپايسىڭ» دەيتىندەرگە وزبەكستاننان كوشىپ كەلىپ، كوسىلىپ ءومىر ءسۇرىپ جاتقانداردىڭ تىرشىلىگىن مىسال ەتۋگە ابدەن بولاتىنداي...

وزبەكستاننىڭ قىسى سولتۇستىكتىڭ كۇز بەن كوكتەمىندەي عانا عوي. ماسەلە ىنتا- ىقىلاستا. تايىنشا اۋدانىنا كوشىپ كەلگەن اققۇلوۆتار اۋلەتى توعىز جولدىڭ تورابىنان «نۇر- اراي» كافەسىن اشقان. كۇندىز- ءتۇنى ادامنىڭ قاراسى ۇزىلمەيدى. وڭتۇستىك وڭىرىنەن بىرگە كەلگەن قارت اناسى دا وسى جەرگە ۇيرەنە باستاپتى. سونداي- اق اقجار اۋدانىنداعى كەڭاشى، ءبايتوس دەگەن اۋىلداردى كورگەندە كوزىمىز شىراداي جانىپ، كوڭىلىمىزگە نۇر قۇيىلعانداي سەزىمدە بولدىق. بۇل اۋىلداردىڭ ءبىلىم ۇيالارى جايناپ تۇر. اللانىڭ ءۇيى - مەشىت ەكى اۋىلدا دا بار. اۋىل ادامدارىن ۇيىمداستىرىپ، وسى مەشىتتەردى اۋىل اكىمى امانتاي ءوزى باس بولىپ سالعىزعان ەكەن. ش. ءۋاليحانوۆ اۋدانى دا وڭتۇستىكتەن قونىس اۋدارۋشىلاردى جاقسى قابىلداپ، كوڭىل ءبولىپ وتىر. اۋداندا 17 مىڭ حالىق تۇرادى. اۋدان تۇرعىندارىنىڭ 90 پايىزى ءوزىمىزدىڭ قاراكوز قانداستار. ادامنىڭ ادامدىعىن جاساعان ورتاسى، العان تاربيەسى ايگىلەپ تۇراتىنى سياقتى كوپ ادامدارعا اكىم- قارالاردىڭ ەسىگى تارس جابىق تۇراتىنى كوپشىلىككە ءمالىم. ال اۋدان اكىمى مەدەت وسپانوۆ «جاس كەلسە ىسكە...» دەگەندەي، ءبىراز جۇمىستاردىڭ باسىن قايىرىپ، حالقىنا ادال قىزمەت ەتىپ جۇرگەن ازاماتتاردىڭ ءبىرى ەكەن. اسىرەسە ۇلكەندەرگە دەگەن ءىلتيپاتى ەرەكشە. ال وڭتۇستىك ءوڭىردىڭ سارىاعاش اۋدانى اباي اۋىلىنان كەلىپ قونىستانعان ماحامبەت اعامىز ەڭبەگىن جەردەن تاۋىپ ءجۇر ەكەن. ءۇش جىلعا 22 گەكتار جەردى جالعا الىپ، وسى اۋماقتاعى كولدىڭ سۋىن تازارتىپ، بالىق شارۋاشىلىعىمەن دە اينالىسۋ تۋرالى ويىن اڭگىمەلەپ بەردى.

وسى ساپار بارىسىندا ءبىزدى تاڭعالدىرعان تاعى ءبىر جايت - ع. مۇسىرەپوۆ اۋدانىنا الماتى وبلىسى سارقانت اۋىلىنان كوشىپ كەلگەن مۇسا جۇماقابىل ۇلىنىڭ شاڭىراعىندا بولعان شاتتىق- قۋانىش. مۇسانىڭ كەلىنشەگى ساز ونەرىنىڭ جەتىك مامانى. بەس بالا تاربيەلەپ وتىرعان وتباسى. بۇلار اۋدان ورتالىعىندا ءۇش- اق كۇن پاتەر جالداپ تۇرىپتى. ءتورتىنشى كۇنى وبلىس اكىمى قۇمار اقساقالوۆتىڭ قولىنان ءۇش بولمەلى پاتەردىڭ كىلتىنە يە بولادى. اكىمدىك مۇسانىڭ كەلىنشەگىنە ماماندىعى بويىنشا ەكى جەردەن جۇمىس ۇسىنىپتى. ال مۇسانىڭ ءوزى ءۇي جيھازدارىن جاسايتىن شەبەرحاناعا جۇمىسقا تۇرماق.

جاسىراتىنى جوق، بىزدە كەيبىر ادامدار كوزبەن كورمەي، ەستىگەن اڭگىمەسىنە سەنەدى. «سولتۇستىكتىڭ جەرى دە، ادامدارى دا توڭمىنەز» دەپ ايتادى. ساپار بارىسىندا ونداي كەلەڭسىزدىكتى بايقامادىق. ەل بولعان سوڭ جاقسىسى دا، جامانى دا بولادى. تۇتاس ەلگە ءتىل تيگىزۋ تىپتەن دۇرىس ەمەس. العاشىندا ءبىز جەتەۋ ەدىك دەپ جوعارىدا ايتتىم عوي. اققايىڭ اۋدانى ارالاعاش اۋىلىنا بارعانىمىزدا، قىرعىز دەگەن اۋىل قارياسى: «اسۋ اسىپ كەلگەنسىڭدەر مە؟ » - دەدى. ءبىز «ءيا» دەدىك. قونالقاعا جاي تابا الماي جۇرگەن جاعدايىمىزدى تۇسىنگەن سوڭ، «جەتەۋىڭ دە قوناق بولىڭدار، ءۇي كەڭ. اللانىڭ بەرگەن ءدان- رىزدىعى جەتەدى» ، - دەپ قوناقجايلىلىق تانىتقانىن قالاي ۇمىتامىز؟ !

قىزىلجار اۋدانىنداعى بەسكول اۋىلىنا كوشىپ كەلگەن سەرىمۇحاممەد ورال ۇلى اعاشتان نەشە ءتۇرلى ءتۇيىن تۇيەتىن ۇستا ەكەن. جانە وسى ءوڭىردى وتىنمەن دە قامتاماسىز ەتەدى. حاس شەبەردىڭ قولىنان شىققان دۇنيەلەر كوزدىڭ جاۋىن الادى. سول سياقتى اسقار ماديەۆ، جومارت وماروۆ، تولەۋباي قاجى مولداحمەت ۇلى (اقجار اۋدانىنىڭ تۇرعىنى) ، ءبىرجان ەسىمدى قوس ازامات كاسىپكەرلىك سالاسى بويىنشا ىسكەرلىك تانىتىپ ءجۇر.

سوڭعى جىلدارى جوعارى ءبىلىمى بار، ءارتۇرلى ماماندىقتاردى يگەرگەن جاستار لەگىنىڭ (جاس وتاۋلاردىڭ) قالالارعا جۇمىس ىزدەپ سابىلۋى توقتاماي تۇر. بارىنە بىردەي جۇمىس قايدان تابىلسىن؟ سودان بارىپ كۇزەتشى، كولىك جۋۋشى، جانارماي قۇيۋشى سياقتى تابىسى از جۇمىستارعا جەگىلەدى. ودان العان ەڭبەكاقىلارى باسىنا تارتسا اياعىنا جەتپەي، جان كۇيزەلىسى مەن ءتان كۇيزەلىسىنە قاتار ۇشىرايدى. قۇلدىق پسيحولوگيا جاستارىمىزدىڭ ەڭسەسىن باسىپ، جان دۇنيەلەرى ەزگىگە ۇشىراپ كەلەدى. وزدەرى وسىلاي تابيعي تۇردە قۇلعا اينالعان جاستاردان دۇنيە ەسىگىن اشقان ۇرپاق «مەن قۇلدان تۋعان قۇلمىن!» دەپ شىرىلداپ ومىرگە كەلگەندە، ول ەرتەڭ كىمگە وپا، كىمگە جاقسىلىق، قاي قوعامعا پايدا اكەلەدى؟ مەنىڭشە، «وڭتۇستىكتەن سولتۇستىككە جۇمىس باعدارلاماسى» جاستارىمىزدى، جاس وتاۋلارىمىزدى قۇلدىق اپانىنان قۇتقارار ەدى. ولار سولتۇستىك ايماقتاردا باسپانالى بولىپ، ەلىنە، جەرىنە ايانباي قىزمەت قىلار ەدى.

وسى ساپارىمىزدا پرەزيدەنتتىڭ شەكارالى ايماقتاردى قازاقتاندىرۋدىڭ قاعيداسىن تاعى دا ءبىر قىرىنان تۇسىنگەندەي بولدىق. تاعى ءبىر ايتا كەتەتىن جايت، قونىس اۋدارۋشىلار اۋدان، اۋىل باسشىلارىن ىعىر ەتىپ جىبەرگەن. كوشىپ كەلۋشىلەردى كەيبىر اۋداندار مالىن سويىپ، قوناقجايلىقپەن قول قۋسىرىپ قارسى العان. ال ولار اۋداندى ارالاپ- ارالاپ، اقىرىندا باي جاقپاعان كارى قىزداي كەرى قايتقان. ءتىپتى الداپ- سۋلاپ، ۇكىمەتتىڭ جەڭىلدىكتەرىن پايدالانىپ، ارتىنشا تايىپ تۇرعاندارى دا بار ەكەن. مەنىڭشە، سولتۇستىككە تەك ەڭبەك ەتەمىن دەگەن ادامدار عانا كەلە الادى. دايىنعا تاپ بولامىن دەگەندەر كوپكە بارمايدى. ويتكەنى بۇل ءوڭىر جاتىپىشەر ماسىلداردىڭ مەكەنى ەمەس.

ولەڭ ومىردەن تۋادى عوي. ماقالامدى «اۋىلىم كوشىپ كەلسە ەكەن قىزىلجارعا...» دەگەن ولەڭىممەن اياقتاعىم كەلىپ وتىر.

ادالداپ ءدامىڭ مەنەن تۇزىڭدى اللا،

اۋىلىم كوشىپ كەلسە ەكەن قىزىلجارعا.

سىرلى اياق سىرى وشسە دە، سىنى كەتپەس،

ەل ەدىك قوي باق دارىپ، قىدىر قونعان.

اۋىلىم كوشىپ كەلسە ەكەن قىزىلجارعا،

اق ايازى ايعىزداپ مۇزىن جارعان.

ازيا، ەۋروپانى ەندەي وتتىك،

قاندى سوقپاق بابامنىڭ ءىزى قالعان.

شاپاعات- نۇر شاشىپ تۇر دالا تاڭنان،

ۇشىرىپ ساعىم كوڭىل سان اپارعان.

اۋىلىم كوشىپ كەلسە ەكەن اققان سۋداي،

اعىلىپ قاراتاۋ مەن الاتاۋدان.

كەلسە ەكەن ۇلان- عايىر دالام كوشىپ،

ۇلان- اسىر توي جاساپ الام نەسىپ.

ات مىنگىزسەڭ ۇسىنام نار اتاندى،

اعايىن ويلاپ ءجۇر مە ساراڭ دەسىپ...

اۋىلىم كوشىپ كەلەدى قىزىلجارعا،

سارى التىنداي سىيلاسىن كۇزىڭدى الدان.

ابىلاي حان، بۇحار مەنەن قوجابەرگەن،

التى الاشىم سولاردىڭ ءىزىن جالعا.

ەلىمە ەل قوسىلىپ جيىلعان ەس،

بەلەستەر ءبىز الاتىن بۇيىم ەمەس.

ەسىل بويىن دۋمانعا بولەسە ءبىر،

سىر مەنەن قازىعۇرتتان قۇيىلعان كوش.

اۋىلىم كوشىپ كەلسە ەكەن قىزىلجارعا...

نۇرحان سۇلتانباي ۇلى،

اقىن، ت. ايبەرگەنوۆ اتىنداعى سىيلىقتىڭ يەگەرى

www.zhasalash.kz