بۇگىن قازاقتىڭ كوك بايراعىنىڭ اۆتورى شاكەن نيازبەكوۆتىڭ تۋعان كۇنى

استانا. قازاقپارات - بۇگىن قازاقستاننىڭ مەملەكەتتىك تۋىنىڭ اۆتورى شاكەن نيازبەكوۆتىڭ تۋعان كۇنى.

شاكەن وڭالسىن ۇلى - تاراز جەرىندە 1938 -جىلدىڭ 12 -قازانىندا دۇنيەگە كەلگەن. شەشەسى جاعىنان پولكوۆنيك، كەڭەستەر وداعىنىڭ باتىرى باۋىرجان مومىش ۇلىنىڭ تۋىسى بولىپ كەلەدى. باباسى - دانا تولە ءبي. ون جاسقا كەلگەن كەزدە، ءبىر جىل ىشىندە اكە-شەشەسى ءولىپ، كەنەتتەن تۇلدىر جەتىم قالادى.

ورتا مەكتەپتى بىتىرگەننەن كەيىن شاكەن نيازبەكوۆ اتاقتى «مۋحينكاعا» (لەنينگرادتىڭ ۆ. ي. مۋحين اتىنداعى جوعارى كوركەم- ونەركاسىپتىك ۋچيليشەسى) وقۋعا تۇسەدى. ستۋدەنت كەزىندە ول ەرميتاج، يسااك سوبورى جانە پەترودۆورەتستى قالپىنا كەتىرۋ جۇمىستارىنا قاتىسادى. شاكەن نيازبەكوۆ ءوزىنىڭ ەڭ باستى ۇستازى رەتىندە ءابىلحان قاستەيەۆتى اتايدى.

سوڭعى وتىز جىلدان استام ۋاقىت كولەمىندە سۋرەتشى كوپتەگەن كونكۋرستارعا قاتىسىپ، بىرنەشە رەت جەڭىمپاز اتاندى. 1961 -جىل - «گلوبۋس» تەلەديدارىنىڭ ديزاينى ءۇشىن چەحوسلوۆاكيادا بەرىلگەن التىن مەدال، 1964 -جىل - لەنينگرادتا وتكەن «بەيبىتشىلىكتى قولدايمىز!» اتتى پلاكاتتار كونكۋرسىندا ءبىرىنشى ورىن، 1982 -جىل - الماتى قالاسىنداعى رەسپۋبليكا الاڭىن كوركەم بەزەندىرۋدەن وتكەن كونكۋرستا ءبىرىنشى ورىن العان.

«قۇرمانعازى»، «كوبىك شاشقان»، «يساتاي تايمانوۆ»، «اباي»، «شوقان ءۋاليحانوۆ»، «مۇحتار اۋەزوۆ»، «سىرىم دات ۇلى»، «جامبىل»، «قازاقستاننان كەلگەن سولدات»، «انا» دەگەن جۇمىستار سۋرەتشىنىڭ جەكە كورمەلەرىندەگى كاتالوگتاردان قوماقتى ورىن الادى. ونىڭ جەتىستىكتەرىنە، سونداي-اق، پاتريوت باۋىرجان مومىش ۇلىنىڭ زيراتىنا قويىلعان قۇلپىتاس پەن الماتى قالاسىنىڭ ەلتاڭباسىن دا جاتقىزۋعا بولادى.

1992 -جىلى ول قازاقستان، ت م د، تۇركيا، گەرمانيا، موڭعوليا ەلدەرىنەن 1200-گە تارتا سۋرەتشى قاتىسقان كونكۋرستا جەڭىپ شىقتى.

اتاقتى سۋرەتشى 2014 -جىلدىڭ 16 -تامىزىندا 75 جاسىندا دۇنيە سالدى.

1992 -جىلدىڭ باسىندا جوعارعى كەڭەس پرەزيديۋمىنىڭ جاڭا مەملەكەتتىك سيمۆوليكانى دايىنداۋ بويىنشا جۇمىس توبىن قۇرۋ تۋرالى قاۋلىسى شىقتى. سوعان سايكەس ارنايى شىعارماشىلىق كوميسسيا قۇرىلدى. ەلتاڭبا، تۋ، ءانۇران جوبالارىن جاساۋ بايقاۋى جاريالانىپ، وعان 600 دەن استام ادام قاتىستى.

مەملەكەتتىك تۋ ەسكيزدەرىنىڭ شىعارماشىلىق ەڭبەكتەرى بار بارلىعى 1200 ءوتىنىم بەرىلدى. سونىڭ ىشىندە شاكەن نيازبەكوۆتىڭ تىڭ تۋىندىسى ەرەكشە كوزگە ءتۇسىپ، جوعارى كەڭەستە تالقىلانعان. كۇن - جارقىن بولاشاقتىڭ، كۇننەن تاراعان ءار شاپاعات، شۋاقتىڭ - مولشىلىق پەن امانشىلىقتىڭ بەلگىسى. دالا قىرانى - كەڭدىك پەن زەرەكتىكتى بىلدىرەدى. دالا ادامدارى ءۇشىن بۇل ازاتتىق، تاۋەلسىزدىككە، ماقساتقا، بيىككە، بولاشاققا ۇمتىلۋدىڭ سيمۆولى. ويۋلار قازاقى ەلەمەنتتىڭ بىردەن- ءبىر كورىنىسى.

وسىلايشا، قازاقستان رەسپۋبليكاسىنىڭ مەملەكەتتىك رامىزدەرى - ەلتاڭبا، تۋ جانە ءانۇران 1992 -جىلدىڭ 4 -ماۋسىمىندا قابىلداندى.

ءبىزدىڭ وتانداستارىمىز قازاقستان تۋىن الەمدىك جارىستار مەن وليمپيادالاردىڭ جەڭىستى جولدارىمەن سان مىڭ رەت ۇستاپ ءجۇرىپ، ونى عالامشاردىڭ بارۋعا جولى ەڭ قيىن ءتۇرلى جەرلەرىنە، ەڭ بيىك تاۋ شىندارىنا جانە عارىشقا تىكتى.

1995 -جىلى ابايدىڭ 150 -جىلدىعىنا قارسى مەملەكەت باسشىسى نۇرسۇلتان ءابىش ۇلى نازاربايەۆ مەملەكەتتىك تۋدى ىلە الاتاۋىنىڭ «اباي» شىڭىنا تىكتى.

2015 -جىلى عارىشكەر ايدىن ايىمبەتوۆتىڭ عارىشقا ساپارى كەزىندە قازاقستان رەسپۋبليكاسىنىڭ مەملەكەتتىك تۋى جەر شارىن 150-دەن استام رەت اينالىپ ۇشتى.

2011 -جىلدىڭ 14 -جەلتوقسانىندا وڭتۇستىك پوليۋسكە شىعۋدىڭ 100 جىلدىق مەرەيتويىندا قازاقستان رەسپۋبليكاسىنىڭ تۋى انتاركتيدادا تىگىلدى.

2015 -جىلدىڭ 14 -ساۋىرىندە قازاقستاندىق شاڭعى ەكسپەديتسياسى قازاقستان رەسپۋبليكاسىنىڭ تۋىن سولتۇستىك پوليۋس - اركتيكادا تىكتى.

2012 -جىلدىڭ 23 -اقپانىندا قازاقستاندىق اندرەي گۋنداريەۆ وڭتۇستىك افريكانىڭ ەڭ بيىك نۇكتەسى - "وحوس- دەل- سالادو" باعىندىردى، قازاقستاندىق تۋ وسىلايشا الەمدەگى ەڭ بيىك جانارتاۋعا تىگىلگەن.

2014 -جىلى قازاقستاندىق الپينيست ماقسۇت جۇمايەۆ سولتۇستىك امەريكانىڭ ەڭ بيىك تاۋى - «ماك- كينلي» شىڭىنا شىعىپ، وندا قازاقستاندىق تۋدى ورناتتى.

قازاقستاننىڭ تۋى سونداي-اق باتىس ەۋروپانىڭ ەڭ بيىك نۇكتەسى - بيىكتىگى 4810 مەتردى قۇراعان «مونبلانعا» كوتەرىلگەن.

ەلىمىزدىڭ مەملەكەتتىك تۋى مەن مەملەكەتتىك ءانۇرانى ازيا مەن بۇكىل الەمنىڭ ەڭ بيىك شىڭدارى - پامير تاۋىنىڭ «لەنين» شىڭىنا (7 134 مەتر) جانە ەۆەرەستە (8800 مەتر) كوتەرىلىپ، شىرقالعان.

 

دەرەككوز: ينتەرنەت ماتەريالدارى