نۇرسۇلتان نازاربايەۆ ت م د- نى ودان ءارى دامىتۋ تۇجىرىمداماسىن قايتا قاراۋدى ۇسىندى

استانا. قازاقپارات - قازاقستان پرەزيدەنتى نۇرسۇلتان نازاربايەۆ ت م د- عا مۇشە مەملەكەتتەر باسشىلارى كەڭەسىنىڭ شاعىن قۇرامدا وتكەن وتىرىسىنا قاتىستى، دەپ حابارلايدى اقوردانىڭ باسپا ءسوز قىزمەتى.

  كەڭەسكە ازەربايجان رەسپۋبليكاسىنىڭ پرەزيدەنتى ي. اليەۆ، ارمەنيا رەسپۋبليكاسىنىڭ پرەزيدەنتى س. سارگسيان، بەلارۋس رەسپۋبليكاسىنىڭ پرەزيدەنتى ا. لۋكاشەنكو، مولدوۆا رەسپۋبليكاسىنىڭ پرەزيدەنتى ي. دودون، رەسەي فەدەراتسياسىنىڭ پرەزيدەنتى ۆ. پۋتين، تاجىكستان رەسپۋبليكاسىنىڭ پرەزيدەنتى ە. راحمون، تۇرىكمەنستان پرەزيدەنتى گ. بەردىمۇحامەدوۆ، وزبەكستان رەسپۋبليكاسىنىڭ پرەزيدەنتى ش. ميرزيەيەۆ، سونداي- اق قىرعىز رەسپۋبليكاسىنىڭ پرەمەر- ءمينيسترى س. يساكوۆ جانە ت م د- نىڭ اتقارۋشى كوميتەتىنىڭ ءتوراعاسى - اتقارۋشى حاتشىسى س. لەبەديەۆ قاتىستى.

قازاقستان پرەزيدەنتى سويلەگەن سوزىندە ت م د- عا مۇشە ەلدەردىڭ اراسىنداعى ساۋدا- ەكونوميكالىق قارىم- قاتىناستى دامىتۋدا وسى ۇيىمنىڭ ەرەكشە ءرول اتقاراتىنىن اتاپ ءوتتى. مەملەكەت باسشىسى ت م د- نى جاڭعىرتۋ مەن ونى جەتىلدىرۋگە قاتىستى ءبىرقاتار وزەكتى باعىتتاردى ايتتى. نۇرسۇلتان نازاربايەۆ ت م د- نى ودان ءارى دامىتۋ تۇجىرىمداماسىن قايتا قاراپ، جاڭا ءىس- شارالار جوسپارىن ازىرلەۋدى ۇسىندى. سونىمەن بىرگە، قازاقستان پرەزيدەنتى دوستاستىق ەلدەرى اراسىنداعى ساۋدا- ەكونوميكالىق قارىم- قاتىناستاردى نىعايتۋ ماسەلەلەرىنە توقتالدى.

 - ت م د اۋماعىندا قىزمەت كورسەتۋدىڭ ەركىن ساۋداسى بيزنەسمەندەرىمىز ءۇشىن زور مۇمكىندىكتەر تۋعىزىپ، ەلدەرىمىزدىڭ ساۋدا- ەكونوميكالىق كووپەراتسياسىن جاڭا دەڭگەيگە شىعارادى. ۇكىمەتتەر باسشىلارىنىڭ كەڭەسى مەن اتقارۋشى كوميتەتكە قىزمەت كورسەتۋدىڭ ەركىن ساۋداسى تۋرالى كەلىسىم جوباسى بويىنشا جۇمىستى جانداندىرىپ، ونى جۋىق ارادا قابىلداۋدى تاپسىرۋدى ۇسىنامىن، - دەدى مەملەكەت باسشىسى.

نۇرسۇلتان نازاربايەۆ رەسەي فەدەراتسياسىنىڭ وسى ۇيىمعا ءتوراعالىعىنىڭ ناتيجەلى بولعانىن ايتىپ، كەلەسى جىلى ت م د- عا ءتوراعالىق ەتەتىن تاجىكستان رەسپۋبليكاسىنا تابىس تىلەدى.