سوچيدە ت م د مەملەكەت باسشىلارى كەڭەسى جۇمىسىن باستادى

سوچي. قازاقپارات - رەسەيدىڭ سوچي قالاسىندا ت م د مەملەكەت باسشىلارى كەڭەسى جۇمىسىن باستادى.

 دوستاستىق ەلدەرىنىڭ پرەزيدەنتتەرى كەڭەستىڭ شاعىن قۇرامداعى وتىرىسىنا كىرىستى. كەزدەسۋ باسىندا ت م د مەملەكەت باسشىلارى كەڭەسىنىڭ قازىرگى ءتوراعاسى ۆلاديمير پۋتين قاتىسۋشىلاردى قارسى الدى.

«سامميت كۇن ءتارتىبى تىعىز. ءبىز ت م د اياسىنداعى ءوزارا ىنتىماقتاستىقتى ودان ءارى نىعايتۋ جولدارىن بەلگىلەيمىز. دوستاستىقتىڭ جانە ونىڭ قۇرىلىمدارىنىڭ تيىمدىلىگىن ارتتىرۋ ءۇشىن قانداي شارالار قابىلداۋ قاجەتتىگى تۋرالى پىكىر الماسامىز. داستۇرگە وراي ەكونوميكا تاقىرىبىنا ەرەكشە ءمان بەرەمىز. ساۋدا جانە ينۆەستيتسيالىق بايلانىستاردى تەرەڭدەتۋگە، سونداي- اق تاۋارلار مەن قىزمەتتەر قوزعالىسىنا كەدەرگى بولاتىن توسقاۋىلداردى جويۋعا باعىتتالعان شارالاردى تالقىلايمىز. جاڭا، ءىرى، ءوزارا ءتيىمدى ىسكەرلىك جوبالارىن جۇزەگە اسىرۋ ءۇشىن ءبىزدىڭ بارلىق مۇمكىندىكتەرىمىز بار»، - دەدى ۆلاديمير پۋتين.

ودان ءارى ت م د اتقارۋشى حاتشىسى سەرگەي لەبەديەۆ كەڭەس قاتىسۋشىلارىن الدا تۇرعان شاعىن جانە كەڭەيتىلگەن قۇرامداعى كەزدەسۋلەردىڭ كۇن تارتىبىمەن تانىستىردى. ول 10 - قازان كۇنى وتكەن ت م د سىرتقى ىستەر مينيسترلەرىنىڭ وتىرىسىندا 9 قۇجات ماقۇلدانعانىن اتاپ ءوتتى.

 ت م د مەملەكەت باسشىلارى كەڭەسىنىڭ وتىرىسىنا قازاقستان رەسپۋبليكاسىنىڭ پرەزيدەنتى ن. نازاربايەۆ، رەسەي پرەزيدەنتى ۆ. پۋتين، ازەربايجان پرەزيدەنتى ي. اليەۆ، ارمەنيا پرەزيدەنتى س. سارگسيان، مولدوۆا پرەزيدەنتى ي. دودون، تاجىكستان پرەزيدەنتى ە. راحمون، تۇرىكمەنستان پرەزيدەنتى گ. بەردىمۇحامەدوۆ، وزبەكستان پرەزيدەنتى ش. ميرزيەيەۆ، قىرعىزستان پرەمەر- ءمينيسترى س. يساكوۆ قاتىسىپ جاتىر.