شىمكەنتتە ءنازىر تورەقۇلوۆتى ەسكە الۋ كەشى ءوتتى
ا. پۋشكين اتىنداعى وبلىستىق امبەباپ كىتاپحاناسىندا وتكەن كەشكە جازۋشى، ءنازىرتانۋشى، تۇركىتانۋشى، «ءنازىر قورى» سىيلىعىنىڭ لاۋرەاتى سارسەن بەك ساحابات مەن مۇحتار اۋەزوۆ اتىنداعى وڭتۇستىك قازاقستان مەملەكەتتىك ۋنيۆەسيتەتى تاريح كافەدراسىنىڭ دوتسەنتى، تاريح عىلىمدارىنىڭ كانديداتى گ. تىلەۋقۇلوۆ پەن جوعارى وقۋ ورنىنىڭ ستۋدەنتتەرى، مەكتەپ ۇستازدارى قاتىستى. حالىقارالىق دارەجەدەگى ديپلوماتيالىق ساياساتتى جۇرگىزۋدە وزىندىك ۇلەسى بار، كورنەكتى قايراتكەر ءنازىر تورەقۇلوۆتىڭ قازاق حالقى ءۇشىن جاساعان ەڭبەگى ۇشان تەڭىز.
«ءنازىر تورەقۇلوۆ تۋرالى ەل اراسىندا اڭىز-اڭگىمەلەر كوپ. سولاردىڭ بىرىندە ءنازىر مەن تۇرار 1937 -جىلى قاماۋعا الىنعاندا ءوزارا حات جازىسىپ، وندا ولاردىڭ ەل جايىنا، ۇلت بولاشاعىنا الاڭدايتىنى ايقىن كورىنىس بەرگەن. ءيا، وسىنداي اردا ازاماتتاردىڭ ەلى مەن جەرى ءۇشىن جاساعان ەڭبەگىن بۇگىنگى ۇرپاق ۇمىتپاۋى ءتيىس. سوندىقتان الاش زيالىسىنىڭ ۇلت ءۇشىن جاساعان ەڭبەكتەرىن ۇنەمى ەسكە الىپ وتىرۋىمىز كەرەك»، - دەدى سارسەن بەك ساحابات.
ودان سوڭ ءسوز العان گ. تىلەۋقۇلوۆ ن. تورەقۇلوۆتىڭ قازاق تىلىنەن وزگە، تۇرىك، اراب، پارسى جانە ورىس تىلدەرىن جەتىك مەڭگەرگەنىن، سونداي-اق شىعىس ادەبيەتىن، تاريحىن تەرەڭ بىلگەنى جايلى ايتىپ ءوتتى.
كەشتە ءنازىر تورەقۇلوۆتى ەسكە الۋشىلار ۇلتتىڭ ۇلى قايراتكەرىن قازاقتان شىققان تۇڭعىش ەلشى جانە عالىم- اعارتۋشىنىڭ سولاقاي ساياساتتىڭ قۇربانى بولعانىن دا اڭگىمە ەتتى.
ايتا كەتەيىك، شىمكەنتتە بۇگىندە ورتالىق كوشەلەردىڭ ءبىرى مەن مەكتەپ تانىمال تۇلعا ءنازىر تورەقۇلوۆتىڭ اتىمەن اتالادى.
