شىعىس قازاقستان وبلىسىنىڭ اكىمى بوس جاتقان جەرلەردى مەملەكەت مەنشىگىنە قايتارۋدى تاپسىردى

استانا. قازاقپارات - دانيال احمەتوۆ وسكەمەندەگى بوس جاتقان جەرلەردى مەملەكەت مەنشىگىنە قايتارۋعا نۇسقاۋ بەردى، دەپ حابارلايدى وبلىس اكىمىنىڭ باسپا ءسوز قىزمەتى.

 وسكەمەندەگى 19 شاعىن اۋدان قاراماعىنداعى ءبىرقاتار جەر تەلىمدەرى 13 جىل بويى نىسانالى ماقساتىنا ساي قولدانىلماي كەلگەن. ولار بۇگىندە جەكەمەنشىكتىڭ قۇزىرىندا. وبلىس اكىمى بوس جاتقان جەردى مەملەكەت مەنشىگىنە قايتارۋعا تاپسىرما بەردى.

 شاعىن اۋداننىڭ 30-دان استام ۋچاسكەسىنە ينجەنەرلىك ينفراقۇرىلىم جەلىسى تارتىلعان. ال جۇمىستىڭ قۇنى 40 ميلليارد تەڭگە بولدى. قاراجات مەملەكەت قازىناسىنان بولىنگەن. ءبىر قىزىعى، جۇمىس اياقتالعان سوڭ، جەر تەلىمدەرى جەكەنىڭ قولىندا كەتكەن. قۇرىلىسقا بىلەك سىبانا كىرىسكەندەرى نەكەن- ساياق. نەبارى 5 كاسىپكەر. وبلىس اكىمى تاپسىرماسىنان كەيىن بىردەن 3 ۋچاسكە كەرى مەملەكەت مەنشىگىنە قايتارىلدى.

 «ينجەنەرلىك- كوممۋنيكاتسيالىق ينفراقۇرىلىم جۇمىستارىنا 40 ميلليارد تەڭگە بەيبەرەكەت جۇمسالعان. ونىڭ جەمىسىن كورىپ جاتقان ەشكىم جوق. ءبىز شاعىن اۋدان سالۋ ءۇشىن جاڭا رەسۋرستار ىزدەپ جۇرسەك، مۇندا ۇلكەن جەر ۋچاسكەلەرى بوس جاتىر. ولاردىڭ ورنىنا 20 كوپپاتەرلى تۇرعىن ءۇي سالۋعا بولاتىن ەدى»، - دەدى دانيال احمەتوۆ.

 ايماق باسشىسى، جەر تەلىمدەرىن العان ازاماتتار قۇرىلىس جۇرگىزۋگە نيەت بىلدىرسە، قۇرىلىس مەرزىمى، قارجىلىق مۇمكىندىگى بايان ەتىلگەن قۇجاتتارىن، سونداي- اق جوبالىق- سمەتالىق قۇجاتىن كورسەتۋلەرى ءتيىس. ايتپەسە، جەر سوت ارقىلى كەرى قايتارىلادى.