ۆيتالي كليچكونىڭ گولوۆكينگە ايتارى بار
«گولوۆكين- الۆارەستىڭ جەكپە-جەگى ءتارىزدى ايقاستى ءسىزدىڭ ءارقاشاندا تولقىنىسپەن كۇتەتىندىگىڭىز شىندىق. ويتكەنى، ولار وتە قابىلەتتى سپورتشىلار. ءبىراق، ناشار تورەلىك شەشىمدەر بوكستا ءار ۋاقىتتا بولعان. ءار ۋاقىتتا دا ناتيجەگە كوڭىلى بولماي قالاتىندار دا بولا بەرەدى. وكىنىشكە وراي قازىرگى ۋاقىتتا مۇنداي شەشىمدەر ارتا تۇسۋدە. الايدا، ەگەردە سەن قارسىلاسىڭدى نوكاۋتقا تۇسىرسەڭ، وندا سەندە تورەشىلەر شەشىمىنە قاتىستى ەشقانداي پروبلەما بولمايدى. مۇنداي جاعدايدا اتالعان پروبلەمادان شىعۋدىڭ قاراپايى جولى وسى»، - دەپ كەلتىرەدى ۆيتاليي كليچكونىڭ پىكىرىن Boxingscene.com سايتى.
سونىمەن قاتار داڭقتى بوكسشى WBC پرەزيدەنتى ماۋريسيو سۋلەيماننىڭ تورەشىلەرگە ارنايى قۇلاپقاپ بەرىپ، ولاردىڭ جۇمىسىن جەڭىلدەتۋگە قاتىستى يدەياسىنا دا قولداۋ بىلدىرگەن. ويتكەنى، جەكپە-جەكتى كورۋگە كەلگەن جانكۇيەرلەردىڭ ايعاي-شۋى ۇپاي سانىن ەسەپتەيتىن تورەشىلەرگە كەدەرگى كەلتىرۋى ىقيمال.
«ازداعان تەحنولوگيا ەنگىزۋ جونىندەگى ماۋريسيو ۇسىنىسىن قولدايمىن. ول بوكس ومىرىنە كۇندەلىكتى قاتىسىپ جۇرگەن ادام جانە نە قاجەت ەكەندىگىن دە بىلەدى. جەكپە- جەكتە بارىنشا وبەكتيۆتى بولۋ قاجەت. ەگەر ەنگىزىلەتىن جاڭاشىلدىق تورەشىلەردىڭ جۇمىسىن جەڭىلدەتەر بولسا، وندا مەن ەشقانداي پروبلەمانى كورىپ وتىرعانىم جوق»، - دەدى ول.
ايتا كەتەيىك، 17 -قىركۇيەكتە WBA (Super) ، WBC، IBF مەن IBO تۇجىرىمدارى بويىنشا الەم چەمپيونى گەننادي گولوۆكين (37-0, 33 كو) كوپتەن كۇتكەن جەكپە-جەگىن وتكىزدى. ول اقش- تىڭ لاس- ۆەگاس قالاسىندا ۇيىمداستىرىلعان بوكس كەشىندە مەكسيكالىق بوكستىڭ جارىق جۇلدىزى - ساۋل "كانەلو" الۆارەسپەن (49-1-1, 34 ك و) جۇدىرىقتاسىپ، تەڭ ءتۇستى. ال گولوۆكين - الۆارەس ريەۆانشى 2018 -جىلدىڭ 5 -مامىرىندا وتەدى دەپ بولجانۋدا.
