پرەزيدەنتتىڭ وققاعارلارى ناعىز ەركەكتەردىڭ سىناعىن تاپسىردى - فوتو
ولار وڭ قولدارىن كوتەرىپ، ءبىر-بىرىمەن ۇنەمى سويلەسىپ جۇرەدى. ىشتەرىندە قارا چەمودان ۇستايتىندار دا بولادى. بۇل جىگىتتەردىڭ ءبارى مەملەكەتتىك كۇزەت قىزمەتىندە ىستەيدى. ولار مەملەكەت باسشىسىنىڭ قاۋىپسىزدىگىنە عانا ەمەس، شەتەلدەن كەلەتىن مارتەبەلى مەيمانداردىڭ ومىرىنە دە جاۋاپتى.
ال وندايدا جەكە دايىندىققا قويىلاتىن تالاپ جوعارى. وتكەن دەمالىس كۇندەرى ەليتالىق جاساقتىڭ جىگىتتەرى جۋرناليستەرگە ءوز دايىندىعىن شىڭداۋدىڭ تاعى ءبىر شاراسىن كورسەتتى. بۇل جولى «قارا بەرەت» اتاعى ءۇشىن كەزەكتى سىناق ۇيىمداستىرىلدى، دەپ حابارلايدى قازاقپارات ءتىلشىسى.
سوڭعى ون جىلدىڭ ىشىندە «قارا بەرەت» ءۇشىن جۇزدەگەن جىگىتتەر تالاسىپ كوردى. الايدا مىڭداعان اسكەريلەردىڭ ارمانى بولعان اتاققا بارلىعى بىردەي ىلىگە المايدى. سەبەبى تۇگەل سىننان ءوتۋ - قيىننىڭ قيىنى. سودان بولار، «قارا بەرەت» ءۇشىن سىناقتى «ناعىز ەركەكتەردىڭ ەمتيحانى» دەپ اتايدى. وسى جولى دا مەملەكەتتىك كۇزەت قىزمەتىنىڭ 40-قا جۋىق ساربازى ءوز كۇشتەرىن سىناپ كوردى.
سىناقتىڭ ءوزى ەكى كەزەڭنەن تۇرادى. الدىمەن ۇمىتكەردىڭ اتىس شەبەرلىگى، جالپى دەنەشىنىقتىرۋ دايىندىعى، سونىڭ ىشىندە جۇگىرۋ مەن ءجۇزۋ ماشىعى تەكسەرىلەدى. بۇدان بولەك، تەوريالىق سىناقتار دا بار. ال سونىڭ بارلىعىنا قويىلاتىن تالاپ جىل سايىن كۇشەيىپ كەلەدى. ماسەلەن، بۇرىن ەكىنشى كەزەڭگە ءوتۋ ءۇشىن «جاقسى» دەگەن باعا جەتكىلىكتى بولسا، قازىر «وتە جاقسىنى» الماساڭ، ەكىنشى كەزەڭگە وتۋگە رۇقسات جوق. سودان بولار، وسى جولى كەلەسى كەزەڭگە تەك 12 ۇمىتكەر عانا ءوتتى.
ەكىنشى كەزەڭنىڭ تالاپتارى دا جوعارى، تىپتەن كۇردەلى دەۋگە بولادى. 2 ساعات 20 مينۋتتىڭ ىشىندە 20 شاقىرىمدى جەدەل مارشپەن جۇگىرىپ ءوتۋ كەرەك. جاي جۇگىرىپ وتپەي، ارنايى تاپسىرمالاردى دا ورىنداۋ قاجەت. اتاپ ايتقاندا، وزەننىڭ ۇستىمەن تارتىلعان ارقانمەن ارعى بەتكە ءوتۋ، گازتۇتقىشتى كيىپ الىپ، شارتتى تۇردە ۋلانعان ايماقتى ەڭسەرۋ، تاۋعا ارقانمەن ورمەلەپ شىعۋ، اتىس الاڭىنان جەر باۋىرلاپ ءوتۋ، اۆتومات پەن پيستولەتپەن جىلدام اتۋ، جاراقات العان ادامعا العاشقى مەديتسينالىق كومەك كورسەتىپ، ونى بەلگىلى ءبىر جەرگە دەيىن كوتەرىپ اپارۋ سياقتى تاپسىرمالاردى شاپشاڭ اتقارىپ شىعۋ مىندەتى بار.
وسى كەزدە ارنايى ينسترۋكتورلار ۇمىتكەردىڭ ارتىنان قالماي، اسپانعا وق اتىپ، ۇنەمى ايقايلاپ، ۇمىتكەردى قامشىلاپ وتىرادى. ءسويتىپ، ادامنىڭ جۇيكەسى دە سىنالادى. كەزىندە ولار دا وسى سىناقتاردان ءوتىپ، «قارا بەرەتكە» قول جەتكىزگەن ەدى.
سوڭعى كەزەڭنىن مارە سىزىعىنا ۋاقىتىندا جەتۋ - ءبىر قۋانىش. دەگەنمەن، سىناق ونىمەن اياقتالمايدى. ۇمىتكەر بىردەن جەكپە- جەككە شىعۋى ءتيىس. ارنايى كيىم- كەشەك مەن جابدىقتاردى شەشۋگە رۇقسات جوق. سول كۇيىندە ءۇش قارسىلاسپەن توبەلەسۋ كەرەك. وندايدا قول- اياقتىڭ كۇشى ابدەن سارقىلىپ تۇرسا دا، قارسىلاستىڭ بارلىق سوققىلارىنا شىداۋ قاجەت. قارىمتا سوققىلاردى دا جاساماساڭ، قۇلاپ قالۋىڭ ابدەن مۇمكىن.
سەبەبى سپاررينگ سپورتشى ۇمىتكەردى ايامايدى، بارىن سالىپ، قۇلاتۋعا تىرىسادى. ال قۇلاپ، تۇرا الماي قالساڭ، قولعا ءتيىپ تۇرعان «قارا بەرەتتەن» ايىرىلعانىڭ. 12 ۇمىتكەردىڭ بارلىعى وسىنى جاقسى ءبىلدى، ارماندارىنا ەكى-ءۇش قادامنىڭ دا قالعانىن ىشتەي سەزدى. الايدا بەسەۋى ءسۇرىنىپ قالدى. ءسويتىپ، وسى جولى مەملەكەتتىك كۇزەت قىزمەتىنىڭ 7 ساربازى «قارا بەرەتتىڭ» يەگەرى اتاندى.
«قارا بەرەت» - الەمنىڭ كوپتەگەن ەلدەرىنىڭ قارۋلى كۇشتەرى مەن ارناۋلى بولىمشەلەرىندە كەڭىنەن قولدانىلاتىن اسكەريلەردىڭ نىساندى باس كيىمى. «قارا بەرەت» تەك ايىرىم بەلگىسى عانا ەمەس، ول قازاقستان رەسپۋبليكاسى مەملەكەتتىك كۇزەت قىزمەتى قىزمەتكەرلەرى مەن اسكەري قىزمەتشىلەرىنىڭ ابىروي-بەدەلى بولىپ تابىلادى، ول - ەرلىكتىڭ، باتىلدىق پەن نامىس- جىگەردىڭ، سونداي- اق دەنە شىنىقتىرۋ، اسكەري، مامانداندىرىلعان جانە كاسىبي دايىندىقتىڭ نىشانىن بىلدىرەدى. وعان يە بولعان قىزمەتكەرلەر وزدەرىنىڭ كاسىبي، جاۋىنگەرلىك جانە دەنە شىنىقتىرۋ دايارلىعىن ۇنەمى جەتىلدىرىپ وتىرۋى مىندەت»، - دەيدى م ك ق قىزمەتكەرى، «قارا بەرەت» يەگەرى ايدىن مۇقاتوۆ.
ال «قارا بەرەت» ساربازعا نە بەرەدى؟» دەگەن سۇراققا كەلەر بولساق، جوعارى تۇرعان لاۋازىمعا تاعايىنداۋ جانە ارناۋلى اتاقتى مەرزىمىنەن بۇرىن بەرۋ كەزىندە الدىمەن «قارا بەرەت» يەگەرلەرىنە باسىمدىق بەرىلەدى. ولارعا جاۋاپتى ىستەر تاپسىرىلادى. سەبەبى ونداي قىزمەتكەرلەر ءوز دايىندىعىن جوعارى دارەجەدە دالەلدەي ءبىلدى. «قارا بەرەت» بارلىق قىزمەتتەردە ساقتالادى. زاپاس بولسىن، وتستاۆكا بولسىن، «قارا بەرەتتىڭ» يەگەرى جاۋاپكەرشىلىك پەن تاباندىلىقتىڭ ۇلگىسى بولىپ قالا بەرەدى.
«تەستىلەۋدىڭ نەگىزگى ماقساتى - قىزمەتكەرلەر مەن اسكەري قىزمەتشىلەردىڭ جەكە دايىندىعىن باعالاپ، ۇزدىكتەردى انىقتاۋ. سونداي- اق، بۇل سىناقتار قىزمەتكەرلەر مەن اسكەري قىزمەتشىلەرگە كاسىبي تۇرعىدان سەرپىلىس بەرىپ، ولاردىڭ بويىنداعى پاتريوتتىق سەزىمدى ارتتىرىپ، رۋحتاندىرۋدى كوزدەيدى. بىزدەن كەيىنگى ساربازدارعا دا ۇلگى بولاتىنى انىق»، - دەيدى م ك ق قىزمەتكەرى رينات ابىكەشەۆ.
ايتا كەتكەن ءجون، بۇگىندە ءبىز ءالى كۇنگە دەيىن پرەزيدەنت كۇزەتشىلەرىن «س و پ» (سلۋجبا وحرانى پرەزيدەنتا - اۆت. ) دەپ اتاپ ءجۇرمىز. الايدا ق ر پرەزيدەنتىنىڭ كۇزەت قىزمەتى مەن رەسپۋبليكالىق ۇلان قوسىلعاننان كەيىن ق ر مەملەكەتتىك كۇزەت قىزمەتى قۇرىلعان بولاتىن. قازىرگى كەزدە اتالعان قۇرىلىم پرەزيدەنت پەن جوعارى مارتەبەلى قوناقتاردىڭ عانا ەمەس، مەملەكەتتىك ماڭىزى بار نىسانداردىڭ قاۋىپسىزدىگىنە دە جاۋاپ بەرەدى. دەمەك، م ك ق- نىڭ قىزمەت اياسى دا، جاۋاپكەرشىلىگى دە، دايىندىققا قويىلاتىن تالاپ تا ارتا ءتۇستى.
