اۆياتسيا سالاسىندا ەڭ الدىمەن ماماندار دايارلايتىن بولامىز - مينيستر ج. قاسىمبەك
«سوڭعى جىلدارى قازاقستاندىق اۆياتسيادا ايتارلىقتاي وڭ ديناميكا بار. ۇشۋ گەوگرافياسى كەڭەيىپ، ەكونوميكالىق كورسەتكىشتەر ءوسىپ، اۋە تاسىمالىنا سۇرانىستار ارتىپ كەلەدى. بۇنىڭ بارلىعى زاماناۋي اۆياتسيالىق مامانداردى دايارلاۋدى تالاپ ەتەدى. حالىقارالىق ازاماتتىق اۆياتسيا ۇيىمى (ح ا ا ۇ) ۇسىنعان تاجىريبە بويىنشا قازاقستاننىڭ ازاماتتىق اۆياتسيا سالاسىنىڭ دەڭگەيى 74 پروتسەنت، ەۋروپالىق ورتاشا تاجىريبەدە 76 پروتسەنت، الەم بويىنشا 63 پروتسەنتتى قۇرايدى»، - دەدى مينيستر ح ا ا ۇ «قازاەروناۆيگاتسيا» ر م ك- مەن بىرلەسىپ وتكىزىپ جاتقان وڭىرلىك سيمپوزيۋمىندا.
جەڭىس قاسىمبەكتىڭ ايتۋىنشا، بۇگىنگى تاڭدا قازاقستاندا 96 ەلمەن اۋە مارشرۋتى جولعا قويىلعان. جىل سايىن جاڭا باعىتتار اشىلۋدا. وسى جىلى عانا وتكىزىلگەن «ەكسپو-2017» كورمەسى تاعى ءبىرقاتار باعدارلاردى اشۋعا مۇرىندىق بولعان.
«كورمە كەزىندە ىشكى باعدار بويىنشا جولاۋشىلاردىڭ اعىنى 90 پروتسەنتكە، شەتەلدىك باعدار بويىنشا 30 پروتسەنتكە ارتتى. بۇگىنگى كۇنى قازاقستاننىڭ ازاماتتىق اۆياتسيا سالاسىنىڭ الدىندا ۇلكەن تاپسىرمالار تۇر. اتاپ ايتقاندا، اۋەجايلاردى جاڭعىرتۋ، اۆياتسيالىق ترانزيتتىك جانە اەروناۆاتسيالىق تەحنولوگيالاردى جاڭارتۋ، اۋە كەمەلەرىنىڭ پاركتەرىن جاڭارتۋ، سونداي-اق ەڭ الدىمەن اۆياتسيالىق مامانداردى دايارلاۋدى كوزدەپ وتىرمىز. بۇل مىندەتتەر ۇزدىك تاجىريبە مەن جاڭا ءبىلىمدى تالاپ ەتەدى. سوندىقتان، ءبىز قازاقستاندىق كومپانيالارمەن بىرگە مامانداردى دايارلاۋ جۇمىسىنا باسا ماڭىز بەرەمىز»، - دەيدى جەڭىس قاسىمبەك.
اۆياتسيا سالاسىندا ەلىمىزدە شامامەن 20 مىڭ ادام ەڭبەك ەتەدى. ازاماتتىق اۆياتسيا اكادەمياسى، وقۋ ورتالىقتارى مامانداردى دايارلاۋ باعىتىندا جۇمىستاردى جۇرگىزىپ جاتىر.
ايتا كەتسەك، حالىقارالىق ازاماتتىق اۆياتسيا ۇيىمى (ح ا ا ۇ) «قازاەروناۆيگاتسيا» ر م ك- مەن بىرلەسىپ، استانا قالاسىندا اۆياتسيا ماماندارىن دايارلاۋ جانە TRAINАIR PLUS جونىندەگى وڭىرلىك سيمپوزيۋمىن وتكىزۋدە.
سيمپوزيۋمدى العاش رەت قازاقستاندا جانە ورتالىق ازيادا ۇيىمداستىرا وتىرىپ، قازاقستان اۋە كولىگىنىڭ قاۋىپسىز، سەنىمدى جانە تۇراقتى دامۋىن قولداۋ ماقساتىندا اۆياتسيا ماماندارىن دايارلاۋ سالاسىندا حااۇ جوعارى ستاندارتتارىن ۇستاناتىنىن كورسەتپەك. شاراعا 90 نان استام مەملەكەتتەن 350 دەن استام دەلەگات قاتىسۋدا.
