قايرات پەن تورەعاليدىڭ «جەكپە-جەكتە» تەڭ تۇسكەنى تىڭدارماندارعا ۇناماي قالدى
بۇل جولى حالىقتىڭ جۇرەگىنەن ورىن تاپقان قوس حيتمەن - قايرات نۇرتاس پەن تورەعالي تورەالى ونەرلەرىن پاش ەتتى.
ءۇش كەزەڭنەن تۇراتىن سايىستا قوس جۇلدىز تەك جاندى داۋىستا ءان سالدى. العاشقى كەزەڭدە قايرات پەن تورەعالي ءوز اندەرىن ورىنداسا، ەكىنشى كەزەڭدە ءبىر-بىرلەرىنىڭ تۋىندىلارىن شىرقادى.
قايرات تورەشتىڭ «مەن رومانتيك ەمەسپىن» ءانىن شىڭىنا جەتكىزسە، تورەعالي قايروشتىڭ جۇلدىزىن جاققان «ارمان» ءانىن ايتىپ، جۇرتتى ءتانتى ەتتى.
سىيلاستىعى جاراسقان ونەردەگى باۋىرلار ءبىر-بىرىنە ءوز اندەرىن سىيلادى. ال مەيرامبەك بەسبايەۆ باستاعان قازىلار القاسى بۇل كۇنى قوس حيتمەندى ماداقتاۋمەن بولدى.
«بۇگىنگى بايقاۋدا مەن ويلايمىن جالعىز ءبىز عانا ەمەس، بولماسا زالداعى قايرات پەن تورەعاليدىڭ جانكۇيەرلەرى عانا ەمەس، قازىرگى بۇكىل قازاق، ءتىپتى التى الاش دەسەك تە بولادى، وسى ەكەۋىنىڭ قايسىسى جەڭىلەدى ەكەن دەپ تاعاتسىزدانا كۇتىپ وتىرعان بولۋى ابدەن مۇمكىن. بۇل جەردە باعا بەرۋشى ءبىز، دەگەنمەن ءقازىر قايرات دەيتىن بولساق، ونىڭ ارتىندا قالىڭ قازاق تۇر، تورەعالي قازاقتىڭ دومبىراسىن الىپ شىقتى. بۇل جەردە قالىڭ قازاقتى دا، دومبىرانى دا رەنجىتپەي، ات توبەلىندەي عانا ازعانتاي قازاقپىز عوي... ونەردە جۇرگەننەن كەيىن كۇنشىلدەر دە، سىنشىلدار دا بولادى، ول - زاڭدىلىق.
«قايرات قۇلاسا ەكەن» دەپ بىرەۋ تىلەۋى مۇمكىن، «تورەعالي قۇلاسا ەكەن» دەپ مىسىق تىلەۋلى تاعى ءبىر اعايىندار بولۋى مۇمكىن. مەن ويلايمىن، ونەردىڭ بايراعىن جەلبىرەتىپ جۇرگەن ەكى جىگىتتى دە دوس-دۇشپاندارىنا تابا قىلماي، كەلەسى كەزەڭگە بىردەي وتكىزۋ كەرەك سياقتى»، - دەپ ءوز پىكىرىن ءبىلدىردى اينۇر تۇرسىنبايەۆا.
ءوز كەزەگىندە ءداستۇرلى ءانشى ايگۇل ەلشىبايەۆا بۇل كۇنى قايرات پەن تورەعاليدى العاش رەت جاندى داۋىستا تىڭداعانىن ايتىپ، تاڭدانىسىن جاسىرمادى. ول قوس حيتمەندى مويىنداعانىن، ءتىپتى، سول ساتتەن باستاپ ەكەۋىنە دەگەن كوزقاراسىنىڭ تۇبەگەيلى وزگەرگەنىن مالىمدەدى.
وزگە تورەشىلەر دە ارىپتەستەرىنە قوسىلدى. ال شەشىمدى جوبانىڭ باس مودەراتورى مەيرامبەك بەسبايەۆ شىعاردى.
«ەندى وسىنداعى قىزدار-جىگىتتەر وسىلاي شەشكەن بولسا، ەشقانداي قارسىلىعىم جوق. قارسى بولا المايمىن دا. ويتكەنى ەكى باۋىرىم دا حالىقتىڭ جۇرەگىنەن ورىن العان. بۇلاردىڭ اندەرى عاسىردان عاسىرعا كەتە بەرەتىنىنە كۇمانىم جوق»، - دەپ مالىمدەدى ول.
قازىلار القاسى ءبىراۋىزدان كەلىسكەنىمەن، تىڭدارمان قاۋىمعا جەڭىمپازدىڭ بولماعانى ۇناماي قالعان سىڭايلى. ولار جەلىدە «جەكپە-جەكتى» قىزۋ تالقىعا سالىپ، كىم مىقتىنى انىقتاي الماعان قازىلاردى سىناپ تاستادى.
«تورەعالي الدەقايدا مىقتى، بۇل سايىستا دا باسىم ءتۇستى»، «قايرات جۇلدىز عوي شىركىن، داۋسىنىڭ قوڭىرلىعى قايتالانبايتىن تەمبر»، «تورەش تاماشا، داۋىسى قۇلاققا جاعىمدى، ءسوزسىز تورەش جەڭدى دەپ ويلايمىن»، «تورەعالي جەڭدى»، «تورەش سەگىز قىرلى، ءبىر سىرلى»، «قايرات ءبارىبىر مىقتى»، «ەكى جىگىت تە لايىق»، «قايراتتى قولدايمىن، ال تورەعالي ەڭبەك ەتسىن»، - دەپ ءوزارا داۋلاستى تىڭدارماندار.
