قازاقستان سىرتقى ىستەر مينيسترلىگى قىرعىزستان پرەزيدەنتىنىڭ سوزدەرىنە بايلانىستى مالىمدەمە جاسادى
دەپ حابارلايدى «قازاقپارات» ح ا ا ۆەدوموستۆونىڭ باسپا ءسوز قىزمەتىنە سىلتەمە جاساپ.
«قازاقستان رەسپۋبليكاسىنىڭ سىرتقى ىستەر مينيسترلىگى قىرعىز ب ا ق- تارىندا تاراتىلعان 2017 -جىلعى 7 - قازانداعى قىرعىز رەسپۋبليكاسىنىڭ پرەزيدەنتى ا. اتامبايەۆتىڭ قازاقستان رەسپۋبليكاسىنىڭ باسشىلىعىنا قاتىستى سوزدەرىنە بايلانىستى قاتاڭ نارازىلىق بىلدىرەدى جانە مۇنداي سوزدەرگە ەكى دوستاس مەملەكەتتەر اراسىنداعى قاتىناستاردا جول بەرىلمەۋى ءتيىس دەپ سانايدى. قىرعىزستان پرەزيدەنتىنىڭ سايلاۋ الدى ماقساتىنداعى جاۋاپسىز، ارانداتۋشىلىق ءماندى جانە جالعان پىكىرى ەلدەرىمىز اراسىنداعى دوستىق پەن ءوزارا كومەكتىڭ كوپ عاسىرلى بايلانىستارىنا نۇقسان كەلتىرە المايتىنىنا سەنىم بىلدىرەمىز. قازاقستان تاراپى قىرعىز حالقىمەن ءداستۇرلى باۋىرلاستىق قاتىناستارىن دامىتۋ جولىنا بەرىك بولىپ قالا بەرەدى»، - دەلىنگەن مالىمدەمە ماتىنىندە.
كەشە بىشكەك تۇبىندەگى الا- ارچا مەملەكەتتىك رەزيدەنسياسىندا قىرعىزستاننىڭ دامۋىنا قوسقان ۇلەسى ءۇشىن ماراپاتتالعان ەل ازاماتتارىنا مەملەكەتتىك ناگرادالار تاپسىرۋ راسىمىندە سويلەگەن سوزىندە قىرعىزستان پرەزيدەنتى المازبەك اتامبايەۆ قازاقستان بيلىگىن «قىرعىز سايلاۋىنا كيلىگىپ وتىر» دەپ سىناعان. ول «قازاقستاننىڭ جوعارعى بيلىگىندەگىلەر قىرعىزستاننىڭ 2010 -جىلى قىزمەتىنەن قۋىلعان بۇرىنعى پرەزيدەنتى قۇرمانبەك باكيەۆتى قولداپ، ونىڭ ءىس- ارەكەتىن دۇرىس سانايدى» دەپ مالىمدەگەن.
قىرعىزستان سوڭعى ەكى اپتادان استام ۋاقىت ىشىندە قىرعىز پرەزيدەنتى سايلاۋىنا بايلانىستى قازاقستاننىڭ اتىنا وسىمەن ەكىنشى رەت سىن ايتىپ، وعان استانا جاۋاپ بەرىپ وتىر. 19- قىركۇيەكتە قازاقستان پرەزيدەنتىنىڭ رەسمي سايتى ەل پرەزيدەنتى نۇرسۇلتان نازاربايەۆتىڭ قىرعىزستاننىڭ «رەسپۋبليكا - اتا- جۇرت» فراكسياسىنىڭ باسشىسى ومىربەك بابانوۆپەن كەزدەسكەنى تۋرالى اقپارات جاريالاعان. ونى «قازاقستاننىڭ قىرعىزستاننىڭ ىشكى ىسىنە ارالاسۋعا تىرىسۋى» دەپ باعالاعان بىشكەك استاناعا نارازىلىق نوتاسىن جولداعان. قازاقستان جاعى دا قىرعىزستانعا جاۋاپ نوتا جىبەرىپ، بىشكەكتىڭ ايىپتاۋىن جوققا شىعارعان.
