تۇرىك الەمىنىڭ ۇزدىك ماتەماتيكتەرى استانادا باس قوستى
قازاننىڭ 2-5 ارالىعىندا وتكەن شاراعا 20 ەلدىڭ 100-دەن استام كورنەكتى عالىمدارىن قوسا العاندا، بارلىعى 500-دەن اسا ادام قاتىستى.
كونگرەستىڭ عىلىمي سەكسيالارى ماتەماتيكانىڭ بارلىق نەگىزگى باعىتتارىن قامتىدى. ءتورت كۇن ىشىندە عالىمدار الگەبرا جانە ماتەماتيكالىق لوگيكا، گەومەتريا جانە توپولوگيا، فۋنكسيا تەورياسى، ديففەرەنسيالدى تەڭدەۋلەر مەن ماتەماتيكالىق فيزيكا، ىقتيمالدىلىق تەورياسى مەن ماتەماتيكالىق ستاتيستيكا، ەسەپتەۋ ماتەماتيكاسى، باسقارۋ تەورياسى مەن وڭتايلاندىرۋ ادىستەرى، ماتەماتيكالىق مودەلدەۋ، اقپاراتتىق تەحنولوگيالاردىڭ تەوريالىق نەگىزدەرى، تۇرىك حالىقتارىنىڭ ماتەماتيكانى وقىتۋ تاريحى مەن ادىستەمەسى سياقتى باعىتتار بويىنشا وزەكتى ماسەلەلەردى تالقىعا سالدى. كونگرەستىڭ جۇمىسىنا تۇسكەن 507 باياندامانىڭ 320-سى تىڭدالعان بولاتىن.
شاراعا ءتوراعالىق ەتكەن قازاقستاننىڭ ماتەماتيكا قوعامىنىڭ پرەزيدەنتى باقىتجان جۇماعۇلوۆ تۇرىك الەمىنىڭ ماتەماتيكا قوعامىنىڭ VI كونگرەسى جۇمىسىنىڭ جەمىستى بولعاندىعىن اتاپ ءوتتى.
«بۇگىنگى تاڭدا ادامزات بالاسى ماتەماتيكالىق مودەلدەردى، اقپاراتتىق تەحنولوگيالاردى، كومپيۋتەرلىك، ساندىق جۇيەلەردى ءومىردىڭ بارلىق سالالارىندا دەرلىك كەڭىنەن قولدانىپ ءجۇر. ءبىزدىڭ ءومىرىمىزدىڭ بەلسەندى تۇردە ساندارعا اينالۋى ماتەماتيكا عىلىمىنىڭ جەتىستىكتەرىنە نەگىزدەلەدى. بۇگىندە ق ر پرەزيدەنتى نۇرسۇلتان نازاربايەۆ ەلىمىزدەگى ماتەماتيكا عىلىمىنىڭ دامۋىنا ۇلكەن كوڭىل بولەدى. ءبىز كونگرەسستىڭ كۇن تارتىبىنە قويىلعان بارلىق سۇراقتاردى قاراستىردىق. وزەكتى ماسەلەلەردى شەشۋ جولدارىن تالقىلادىق. كوپتەگەن ەلدەرمەن پىكىرىمىزبەن، تاجىريبەلەرىمىزبەن الماستىق» ، - دەدى باقىتجان جۇماعۇلوۆ.
سونداي- اق، كونگرەسس بارىسىندا تۇركىتىلدى ەلدەردىڭ ماتەماتيكالىق قوعامى باسقارماسىنىڭ وتىرىسى ءوتتى. وندا قوعامنىڭ جاڭا قۇرامى سايلانعان بولاتىن. قاتىسۋشىلار ءبىراۋىزدان تۇركىتىلدى ەلدەردىڭ ماتەماتيكالىق كەڭەسىنىڭ كەلەسى مەرزىمگە پرەزيدەنتى ەتىپ تانىمال عالىم- ماتەماتيك، اكادەميك باقىتجان جۇماعۇلوۆتى سايلاپ، كەلەسى كونگرەستىڭ وتەتىن ورنىن انىقتادى. تۇرىك الەمىنىڭ ماتەماتيكا قوعامىنىڭ 7 - كونگرەسى وزبەكستاندا وتەدى دەپ شەشىلدى.
كونگرەسس جۇمىسىنىڭ قورىتىندىسى بويىنشا ماتەماتيكا عىلىمىنىڭ دامۋىنا سۇبەلى ۇلەس قوسقان جەتەكشى عالىمدار مەن جاس ماتەماتيكتەر ديپلومدارمەن ماراپاتتالدى.
ايتا كەتەيىك، تۇرىك الەمىنىڭ ماتەماتيكا قوعامىنىڭ كونگرەستەرى 3 جىلدا 1 رەت وتەدى. العاشقى كونگرەسس 1999 -جىلى تۇركيادا وتكەن بولاتىن.
