قاي ەلدىڭ ەر ادامدارى ەرتە ولەدى؟

 استانا. قازاقپارات - ەرلەر ءولىمىنىڭ كورسەتكىشى بويىنشا ەۋروپا ەلدەرى ىشىندە رەسەي كوش باستاپ تۇر. بۇل تۋرالى دۇنيەجۇزىلىك بانكتىڭ زەرتتەۋ ناتيجەلەرىنە سۇيەنىپ ريا نوۆوستي جازادى.

رەسەيدە ەر ادامداردىڭ 43 پايىزى 65 جاسقا جەتپەي قايتىس بولادى ەكەن.

ەكىنشى جانە ءۇشىنشى ورىنداردا - ۋكراينا مەن بەلارۋس. بۇل ەلدەردە 65 جاسقا جەتپەي ولەتىن ەرلەردىڭ ۇلەسى 40 پايىزدان ءسال عانا تومەن. ءولىم- ءجىتىم رەيتينگىنىڭ ءتورتىنشى ساتىسىندا 37 پايىزبەن مولدوۆا تۇر، ليتۆا - 36 پايىزبەن بەسىنشى ورىندا.

ەرلەردىڭ ءومىر ءسۇرۋ ۇزاقتىعى بويىنشا «اۋتسايدەر» قاتارىنا گرۋزيا، ءازىربايجان، بولگاريا، ۆەنگريا، رۋمىنيا، ارمەنيا مەن ەستونيا كىردى.

ەڭ تومەنگى كورسەتكىش يسلانديا مەن شۆەيتساريادا تىركەلگەن. مۇندا ەر ادامداردىڭ 10 پايىزى عانا ەرتە كوز جۇمادى. شۆەتسيا، يتاليا، نيدەرلاندى، مالتا جانە نورۆەگيادا دا كورسەتكىش وسى شامالاس (11 پايىز) .

قىركۇيەكتە رەسەي دەنساۋلىق ساقتاۋ ءمينيسترى ۆەرونيكا سكۆورتسوۆا 2017 - جىلدىڭ ءبىرىنشى جارتىسىندا ەلدە ءومىر ءسۇرۋ ۇزاقتىعى 0,63  جىلعا ۇلعايىپ، 72,5 جاسقا جەتكەنىن مالىمدەگەن ەدى. ونىڭ ايتۋىنشا، رەسەيلىك ەرلەر ءبىر جىلعا ۇزاق، ياعني 67,5 جاسقا دەيىن ءومىر سۇرەتىن بولعان. ال ايەلدەردىڭ ءومىر ءسۇرۋ ۇزاقتىعى 77,4 جاستى قۇرادى.

Baq.kz