الماتى وبلىسىندا جىل مۇعالىمىنە اۆتوكولىك كىلتى تابىستالدى
تەكەلى قالاسىنداعى №1 ورتا مەكتەپتىڭ گەوگرافيا ءپانىنىڭ مۇعالىمى باقىتجان مولبايەۆ مۇعالىمدەر اراسىندا ۇزدىك اتاندى. ۇستازدى لايىقتى جەڭىسىمەن وبلىس اكىمى اماندىق باتالوۆ قۇتتىقتادى. بۇل تۋرالى بۇگىن مۇعالىمدەر كۇنىنە ارنالعان سالتاناتتى جيىندا بەلگىلى بولدى وبلىس اكىمى ءوز قۇتتىقتاۋ سوزىندە مۇعالىم ماماندىعى ءارقاشان ەرەكشە قۇرمەتكە جانە جوعارى مارتەبەگە يە ەكەندىگىن، سونىمەن قاتار وبلىستىڭ ءبىلىم سالاسى قىزمەتكەرلەرىنىڭ ەسەلى ەڭبەگىن اتاپ ءوتتى.
«ۇستازدار قاۋىمى ەلىمىزدىڭ ءداستۇرلى پەداگوگيكاسى مەن يننوۆاتسياسىن ۇيلەستىرە وتىرىپ، كوپتەگەن ساپالى ناتيجەلەرگە قول جەتكىزىپ كەلەسىزدەر. قازىرگى شاقتا دا الدارىڭىزدا كوپتەگەن ماڭىزدى مىندەتتەر بار. ولاردىڭ كوش باسىندا «رۋحاني جاڭعىرۋ» باعدارلاماسىن جۇزەگە اسىرۋ، «تاربيە جانە ءبىلىم» باعدارلاماسى اياسىندا اۋقىمدى جوبالاردى ورىنداۋ مىندەتتەرى تۇرعانىن اتاپ ءوتۋ قاجەت. بىلىمدىلىك پەن بەلسەندىلىكتەرىڭىزدىڭ ارقاسىندا وسى باعىتتا ءالى تالاي بەلەستەردى باعىندىرىپ، الدىڭعى قاتاردان كورىنەتىندەرىڭىزگە سەنەمىن»، - دەدى ا. باتالوۆ.
سالتاناتتى شارا ءبىلىم مەن تاربيە بەرۋدە ايرىقشا تابىستارعا قول جەتكىزگەن مۇعالىمدەردى ماراپاتتاۋ راسىمىمەن جالعاسىپ، ماراپاتتاردى وبلىس اكىمى اماندىق باتالوۆ تاپسىردى. تالعار اۋدانىنىڭ №6 ورتا مەكتەبىنىڭ مۋزىكا ءپانى مۇعالىمى قۋاندىق يماشيەۆ «قازاقستان رەسپۋبليكاسى ءبىلىم سالاسىنىڭ ۇزدىك قىزمەتكەرى» توسبەلگىسىنىڭ يەگەرى اتاندى. تاعى 4 ۇزدىك ۇستاز ى. التىنسارين اتىنداعى توسبەلگىلەرىمەن ماراپاتتالدى. شارا بارىسىندا ءبىلىم سالاسىنداعى وبلىستىق كونكۋرس قورىتىندىلاندى.
«2017 -جىلدىڭ ەڭ ۇزدىك مۇعالىمى» اتتى نەگىزگى نوميناتسيا بويىنشا تەكەلى قالاسى №1 ورتا مەكتەبى گەوگرافيا ءپانىنىڭ مۇعالىمى باقىتجان مولبايەۆ جەڭىمپاز اتانىپ، جاڭا «ladaXRay» اۆتوكولىگىنىڭ كىلتىنە يە بولدى.
«ۇزدىك بالاباقشا» اتاعى قاپشاعاي قالاسىنىڭ «بالداۋرەن» مەكتەپكە دەيىنگى ءبىلىم بەرۋ مەكەمەسىنە بەرىلىپ، 300 مىڭ تەڭگەنىڭ سەرتيفيكاتى تابىستالدى. سونداي- اق سەرتيفيكات جانە «ۇزدىك كاسىپتىك ءبىلىم بەرۋ مەكەمەسى» اتاعىن الماتى وبلىستىق قىزمەت كورسەتۋ جانە تاماقتانۋ سالاسىنداعى يننوۆاتسيالىق تەحنولوگيالار كوللەدجى يەلەندى. «ۇزدىك سىنىپ جەتەكشىسى» اتانعان بالقاش اۋدانى اقدالا ورتا مەكتەبىنىڭ مۇعالىمى جازىلبەكوۆا عالياعا 150 مىڭ تەڭگەنىڭ سەرتيفيكاتى تابىستالدى. «ۇزدىك اۋىلدىق مەكتەپ» كەربۇلاق اۋدانىنداعى قاراشوقى ورتا مەكتەبى دەپ تانىلىپ، 250 مىڭ تەڭگەنىڭ سەرتيفيكاتى تابىستالدى. ىلە اۋدانىنداعى №26 ورتا مەكتەپ «ۇزدىك ورتا ءبىلىم مەكەمەسى» اتانىپ، 19,6 ميلليارد تەڭگەنىڭ گرانتىن يەلەندى. سونىمەن قاتار ءبىرقاتار مۇعالىمدەر مەن ءبىلىم سالاسىنىڭ ارداگەرلەرى وبلىس اكىمىنىڭ قۇرمەت گراموتالارىمەن جانە العىس حاتتارىمەن ماراپاتتالدى.
ماراپاتتالعان ۇستازدار اتىنان «2017 -جىلدىڭ ەڭ ۇزدىك مۇعالىمى» نوميناتسياسىنىڭ جۇلدەگەرى باقىتجان مولبايەۆ ءسوز الدى.
«ءبىز ەل يگىلىگىنە ادال قىزمەت ەتەمىز، جاس ۇرپاقتى ەلجاندىلىققا تاربيەلەپ، وتانىمىزدىڭ لايىقتى ازاماتتارى بولۋىنا بار كۇش- جىگەرىمىزدى جۇمسايمىز. ەلباسى ساياساتىنىڭ ارقاسىندا بىزگە بارلىق جاعدايلار جاسالعان، ەڭ باستىسى - ءوزىمىز ماماندىعىمىزعا ادال، جۇمىسىمىزدى جاقسى كورەتىن، زامان تالابىنا ساي ءمۇعالىم بولساق، كاسىبيلىكتىڭ كىلتى سول»، - دەدى ۇستاز. سالتاناتتى شارا مەرەكەلىك كونسەرتپەن اياقتالدى.
ايتا كەتەيىك، الماتى وبلىسىندا 33 مىڭنان استام مۇعالىم جۇمىس ىستەيدى. ولاردىڭ ەڭبەگىنىڭ ارقاسىندا، سوڭعى وقۋ جىلىندا 242 وقۋشى ءارتۇرلى ينتەللەكتۋالدىق جارىستارعا قاتىسىپ، ولاردىڭ 95- ءى جۇلدەلى ورىندارعا يە بولدى. سونداي- اق، وتكەن وقۋ جىلىندا 1351 جاس مۇعالىم جۇمىسقا ورنالاسسا، بيىلعى جىلى 1400-دەن استامى جۇمىسپەن قامتىلعان.
