استانادا پاتەر الۋشىلار قانداي قاتەلىكتەر جىبەرەدى؟
بۇگىندە استانادا جەكەلەگەن ينۆەستورلار مەن قۇرىلىس كومپانيالار اراسىندا تۋىنداپ جاتقان ماسەلەلەردى قالالىق اكىمدىك شەشۋگە اتسالىسىپ جاتىر.
تۋىنداپ وتىرعان باستى ماسەلە، ۇلەستىك قۇرىلىسقا قاتىسۋ كەزىندە قۇجاتتارمەن تولىق تانىسپاي كەلىسىمشارتقا وتىرۋ.
استانا قالالىق «ودا» ۇلەسكەرلەر قوعامدىق بىرلەستىگىنىڭ ءتورايىمى تاتيانا چۋرسينا ءبىرىنشى كەزەكتە جەكە ينۆەستور قۇرىلىس نىسانىنىڭ رۇقساتتاما قۇجاتتارىنا نازار اۋدارعانى دۇرىس دەيدى.
«رۇقساتتاما قۇجاتتارى دەگەن نە؟ ول: كومپانيادا جەر تەلىمى، ۇلگىلىك جوباسى، ساراپتاما جانە قۇرىلىس جۇرگىزۋگە رۇقساتتاما قۇجاتى بولۋى ءتيىس. ساتىپ الۋعا نيەتتى ادام وسى قۇجاتتارمەن تانىسقان سوڭ، جوبادا جوق پاتەردى ساتىپ المايدى. ياعني جوبالىق سمەتادا 72 پاتەر بولسا، ول ءوزى قورىتىندى جاساپ، كەيبىرەۋلەر سياقتى ۇلگىدە جوق 98-پاتەردى ساتىپ المايدى»، - دەدى ءتورايىم.
ۇلەسكەر قۇرىلىستى جۇرگىزەتىن كومپانيانىڭ قۇجاتتارىن تەكسەرۋى ءتيىس. ەگەر ونى تەكسەرۋ وزىنە قيىندىق تۋدىرسا، ول وسى جىلدىڭ تامىز ايىنان باستاپ جۇمىس ىستەي باستاعان ۇلەسكەرلەردى قولداۋ ورتالىعىنا جۇگىنسە بولادى.
ورتالىقتا پروكۋراتۋرا، قالالىق ءى ءى ب، مەملەكەتتىك كىرىستەر دەپارتامەنتى، ادىلەت باسقارماسى، ساۋلەت جانە قالا قۇرىلىسى باسقارماسىنىڭ وكىلدەرى وتىرادى. ورتالىق قىزمەتكەرلەرىنىڭ مىندەتى، ارىزدانۋشىدان ارىز قابىلداپ، سول ارىز نەگىزىندە كومەك كورسەتۋ.
قازىر ورتالىق اپتاسىنا ءۇش كۇن جۇمىس ىستەيدى. دۇيسەنبى، سارسەنبى، جۇما كۇندەرى، ساعات 9 دان 12 گە دەيىن، «سارى ارقا» ح ق ك ورتالىعىندا قابىلدايدى.
