قازاقستانعا جاتىر موينى ىسىگىنە قارسى جاڭا ەكپە اكەلىندى

الماتى. قازاقپارات - قازاقستانعا جاتىر موينى ىسىگىنە قارسى جاڭا ەكپە اكەلىندى، دەپ حابارلايدى قازاقپارات ءتىلشىسى.

  بۇل تۋرالى الماتىدا وتكەن حالىقارالىق ونكولوگتار جانە ونكوگينەكولوگتار كونگرەسىندە ق ر ۇ ع ا اكادەميگى ديليارا قايداروۆا ايتتى.

ونىڭ ايتۋىنشا، قازاقستاندا شامامەن 12 مىڭعا جۋىق ايەل جاتىر موينى ىسىگى دياگنوزىمەن ەسەپتە تۇر.

«ايەلدەر اراسىنداعى قاتەرلى ىسىك دەرتى ەرلەرمەن سالىستىرعاندا ارتىپ كەلەدى. جىلىنا  4000 ايەل ءسۇت بەزى قاتەرلى ىسىگىنە،  1600 ايەل جاتىر موينى قاتەرلى ىسىگىنە شالدىعادى. ناۋقاستانعان ايەلدەردىڭ 25 پايىزى بالا تۋۋ جاسىنداعىلار. بۇل وتە قايعىلى جاعداي. سوندىقتان، بۇل كورسەتكىشتى ازايتۋ ماقساتىندا قازاقستانعا 9 ۆالەنتتى ەكپە ەنگىزىلە باستادى. بۇل ەكپەنى كەز- كەلگەن اتا- انا 9-12 جاستاعى قىزىنا سالدىرا الادى. ەكپە قۇنى 100 ا ق ش دوللارىنا تەڭ»، - دەدى ق ر  د س م باس ونكولوگى ديليارا قايداروۆا.

 ماڭىزدى شاراعا ا ق ش ۇلتتىق قاتەرلى ىسىك ينستيتۋتىنىڭ، EURAMA ونكولوگتاردىڭ كاسىبي قوعامداستىعىنىڭ وكىلدەرى كەلدى. كونگرەسس بارىسىندا قازاقستانداعى ءسۇت بەزى مەن جاتىر موينى قاتەرلى ىسىگىن دياگنوستيكالاۋ مەن ەمدەۋدىڭ وزەكتى ماسەلەلەرى تالقىلاندى.

ايتا كەتۋ كەرەك كەشە كونگرەس اياسىندا دۇنيەجۇزىنە بەلگىلى ماماندار بىرنەشە ايەلگە وتا جاسادى. ەرتەڭ دە قازاق ونكولوگيا جانە راديولوگيا عىلىمي زەرتتەۋ ينستيتۋتى بازاسىندا 4 ايەلدىڭ ءسۇت بەزىنە وتا جاسالادى. شەبەرلىك ساباعىنا قازاقستاندىق ونكوحيرۋرگتەر قاتىسادى.