20:26, 05 - قازان 2017 | GMT +5
نازاربايەۆ قىزىلورداداعى شىنى وندىرەتىن زاۋىتتىڭ قۇرىلىسىمەن تانىستى
استانا. قازاقپارات - نۇرسۇلتان نازاربايەۆ قىزىلوردا قالاسىندا جالپاق شىنى وندىرەتىن جانە وڭدەيتىن زاۋىتتىڭ قۇرىلىسىمەن تانىستى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.
مەملەكەت باسشىسى قازاقستاننىڭ يندۋستريالىق- يننوۆاتسيالىق دامۋ باعدارلاماسى ارقىلى سالىنىپ جاتقان زاۋىتتىڭ قۇرىلىسىن كوردى.
سونداي- اق، ەلباسى وبلىستا ىسكە اسىرىلىپ جاتقان يننوۆاتسيالىق جوبالار كورمەسىنە باردى.
سوڭىندا نۇرسۇلتان نازاربايەۆ زاۋىت جۇمىسشىلارىمەن، جەرگىلىكتى تاۋار وندىرۋشىلەرمەن جانە وڭىردە جۇمىس ىستەپ جاتقان شەتەلدىك كومپانيالاردىڭ وكىلدەرىمەن كەزدەستى.
- ەلىمىزدە ينۆەستورلاردى تارتۋ ءۇشىن قولايلى جاعداي جاسالدى. بۇل جۇمىستى جالعاستىراتىن بولامىز، - دەدى قازاقستان پرەزيدەنتى.
ايتا كەتەرلىگى، زاۋىتتىڭ وندىرىستىك قۋاتى جىلىنا 197 مىڭ توننا جالپاق شىنى وندىرۋگە جەتەدى. بۇل ءونىم ىشكى نارىققا، سونداي- اق رەسەي، وزبەكستان جانە تۇركياعا جەتكىزىلەتىن بولادى. زاۋىت 2018 -جىلى ىسكە قوسىلادى دەپ جوسپارلانعان.
