اقتوبەلىك ايەلدەر ءجۇن ءتۇتىپ، كورپە تىگۋدى بيزنەسكە اينالدىردى
اقتوبە وبلىسى، مارتوك اۋدانىنىڭ تۇرعىنى تۇرعان شامشەتوۆا «دامۋ» قورىنان قارجى الىپ، ءجۇن وڭدەۋ كاسىبىن باستادى. «باستاۋ بيزنەس» جوباسى ارقىلى ءبىلىمىن جەتىلدىرگەن كاسىپكەر الدىمەن ءجۇن مەن ماقتا وڭدەيتىن قۇرال- جابدىقتى ساتىپ الدى. « ءجۇن جۋۋ، ءتۇتۋ، تازالاۋ كوپ ۋاقىت الادى. ال جاڭا اپپارات جۇمىستى جەڭىلدەتتى. «بيزنەس باستاۋ» جوباسى اۋىل تۇرعىندارى ءۇشىن ەڭ ءتيىمدى جولداردى ۇسىندى. قىز جاساۋىن دايىنداپ، كورپە تىگۋدى قولعا الدىم» ، - دەدى كاسىپكەر تۇرعان شامشەتوۆا.
اۋىل كاسىپكەرى جۇمىسپەن قامتۋ ورتالىعى ارقىلى ءبىر ادامدى جۇمىسقا الىپ، قولونەر بۇيىمدارىن وبلىس ورتالىعىنا تاپسىرىسپەن جەتكىزىپ جاتىر. شەبەر كورپە تىگىپ، جاستىق دايىندايدى. تەرەزە جاپقىش، جۇننەن ۇلتتىق كيىمدەر تىگىپ ءجۇر. ءجۇن تۇتەتىن اپپاراتتىڭ قىزمەتىن اۋىل تۇرعىندارى پايدالانادى. ولار تۇيە، قوي جۇنىنەن جاسالعان كورپەلەرىن جاڭارتىپ جاتىر.
«ءتۇرلى كورمە- جارمەڭكەلەرگە قاتىسىپ، سەمينارلاردا بىلىكتىلىك ارتتىرۋ مۇمكىندىكتەرىن پايدالانىپ ءجۇرمىن. الداعى ۋاقىتتا ۇلتتىق بۇيىمدار كورمەسىن جاساپ، ءوز قولىممەن تىككەن بۇيىمداردى كورشىلىككە ۇسىنعىم كەلەدى. كەز كەلگەن ايەلدىڭ قولىنان ءىس كەلەدى. تەك ينە مەن ءجىپتىڭ ءىلىمىن ءبىلۋ كەرەك» ، - دەدى تۇرعان شامشەتوۆا.
ول الداعى ۋاقىتتا مال باعاتىن شارۋالارمەن بايلانىس ورناتىپ، ءجۇن ساتىپ الۋدى كوزدەپ وتىر. ال كاسىپكەر سالتانات جاقسىعارينا ءسۇتتى ءىرى ءسۇت وڭدەۋ سەحىنا تاپسىرادى. ول ءسۇتتىڭ ءار ءليترىن 75 تەڭگەدەن وتكىزىپ ءجۇر.
«بيزنەس جوسپار جاساپ، 2 ميلليون تەڭگە الدىم. قارجىعا 7 ءسۇتتى سيىر ساتىپ الىپ، قازىر ءونىمدى سەحقا وتكىزىپ وتىرمىن. قارجىنىڭ ءبىر بولىگىنە مال ازىعىن ساتىپ الدىم. قۇرىلىس جۇرگىزىپ، مال باسىن ارتتىرۋ جوسپارىمدا بار. ءارى قۇس باعامىن. وسى جولمەن كاسىپتى باستاپ، تابىس تابۋعا كىرىستىم» ، - دەدى سالتانات جاقسىعارينا.
ماي مەن قايماق، ىرىمشىك، ايران ساتاتىن اۋىل كاسىپكەرىنىڭ تۇراقتى ساتىپ الۋشىلارى بار. ايتا كەتەيىك، اقتوبە وبلىسى، مارتوك اۋدانىندا بيىل قۇنى 54 ميلليون تەڭگە بولاتىن 20 بيزنەس جوبا قارجىلاندىرىلدى. تاعى بىرنەشە كاسىپكەر بيزنەس باستاۋ ءۇشىن قۇجات راسىمدەپ جاتىر.
اۆتور: التىناي ساعىندىقوۆا
