نۇرسۇلتان نازاربايەۆ «بايقوڭىر» كەشەنىن دامىتۋ جوسپارىمەن تانىستى

استانا. قازاقپارات - مەملەكەت باسشىسى جۇمىس ساپارى كەزىندە قازاقستان مەن رەسەي اراسىندا قابىلدانعان «بايقوڭىر» كەشەنىندەگى ودان ءارى ىنتىماقتاستىق تۇجىرىمداماسىنىڭ ىسكە اسىرىلۋ بارىسىمەن، سونداي-اق «بايتەرەك» بىرلەسكەن جوباسىنا قاتىستى اتقارىلىپ جاتقان جۇمىستارمەن تانىستى، دەپ حابارلايدى اقوردانىڭ باسپا ءسوز قىزمەتى.

«رەسەيمەن جاسالعان ۋاعدالاستىقتار اياسىندا كەشەندى دامىتۋدىڭ ستراتەگيالىق باعىتتارى ايقىندالدى. ارنايى قۇرىلعان ۇكىمەتارالىق كوميسسيا مەن ۇكىمەتتەرىمىز ءتيىستى جۇمىستى ۇيلەستىرۋدە. ناقتى شارالار قابىلدانىپ جاتىر»، - دەدى نۇرسۇلتان نازاربايەۆ.

وسى ورايدا قازاقستان پرەزيدەنتى ءوڭىردىڭ ەكولوگيالىق قاۋىپسىزدىگىن ارتتىرۋدىڭ ماڭىزدىلىعىن اتاپ ءوتتى.

بۇدان بولەك، مەملەكەت باسشىسىنا بايقوڭىر قالاسىن دامىتۋ پەرسپەكتيۆالارى مەن تۇرعىنداردىڭ ءال-اۋقاتىن ارتتىرۋعا باعىتتالعان ءىس-شارالار جونىندە باياندالدى.

«قالانىڭ بولاشاعى زور. قاجەتتى ينفراقۇرىلىم دامىپ كەلەدى. قالا گازبەن قامتاماسىز ەتىلىپ، تۇرعىن-ءۇي كەشەندەرى مەن الەۋمەتتىك نىساندار سالىناتىن بولادى. سونداي-اق، جەرگىلىكتى حالىقتى جۇمىسپەن قامتۋ ءۇشىن بىرلەسكەن كاسىپورىندار قۇرۋ قاجەت»، - دەدى مەملەكەت باسشىسى.