مەملەكەت باسشىسى اقتوبەدەگى رەلس- ارقالىق زاۋىتىنىڭ جۇمىسىمەن تانىستى
اقتوبەگە جۇمىس ساپارىمەن كەلگەن ەلباسى نۇرسۇلتان نازاربايەۆ رەلس- ارقالىق زاۋىتىندا بولدى. مۇندا ەۋروپالىق ستاندارتپەن ساي رەلس شىعارىلادى. رەلستەر ءىرى ماگيسترلدى جولدارعا دا ارنالعان. جوبا قۋاتتىلىعى بويىنشا مۇندا جىلىنا 430 مىڭ توننا ءونىم وندىرىلەدى. ونىڭ تەڭ جارتىسى رەلس. ەلباسى زاۋىتتىڭ جۇمىسىمەن تانىسىپ، جاس ماماندارمەن تىلدەستى.
«ءبىز رەلستەردىڭ مەتاللوگرافيكالىق ميكرو جانە ماكرو قىسىمىن زەرتتەيمىز. زاۋىت تاراپىنان مەتاللوگرافيالىق تالداۋدى ارنايى سانك- پەتەربۋرگ قالاسىنان وقىپ كەلدىك. رەلس ساپاسى وتە جوعارى. ءبىز جۇمىس ىستەيتىن قوندىرعىلار الەمدە ەڭ ۇزدىك بولىپ تابىلادى. زاۋىتتاعى الەۋمەتتىك جانە ەڭبەك جاعدايىنا ريزامىز. امبەباپ وندىرىستە جۇمىس ىستەپ جۇرگەنىمدى ماقتان ەتەمىن. سىزگە زور العىس بىلدىرەمىن»، - دەدى زاۋىتتاعى مەتالتانۋ زەرتحاناسىنىڭ جۇمىسشىسى ايىم سەكسەنبايەۆا.
ءوز كەزەگىندە ەلباسى جۇمىسشى جاستارمەن سۋرەتكە ءتۇسىپ، ساتتىلىك تىلەدى. «اقتوبە ءبىر ميلليون ادام بولاتىن قالالار قاتارىنا كىرەدى دەپ ءبارىن ىستەپ جاتىرمىز. مىناۋ ءبىزدىڭ وتانىمىز. وتانىمىزعا مۇنداي زاۋىتتىڭ تالايىن سالامىز. اقتوبەدە قىتايعا وتەتىن جول بار، تەمىر جول بار، گاز بار. مۇنداي جاعداي كوپشىلىگىندە جوق. باقىتتىسىڭدار، امان بولىڭدار»، - دەدى ەلباسى.
ايتا كەتەيىك، اقتوبەدە شىعارىلعان رەلس «نۇرلى جول» مەملەكەتتىك باعدارلاماسىن ىسكە اسىرۋ كەزىندە كەڭ قولدانىلىپ جاتىر. الماتى- شۋ باعىتىنداعى تەمىرجولعا اقتوبەلىك رەلس توسەندى. قۇرىق تەڭىز پورتىنىڭ قۇرىلىسى مەن استاناداعى «نۇرلى جول» تەمىرجول ۆوكزالىنىڭ قۇرىلىسى كەزىندە وتاندىق ءونىم پايدالانىلدى. اقتوبەدەن شىعارىلىپ جاتقان رەلستىڭ ساپاسى جوعارى قاۋىپسىزدىك تالاپتارىنا ساي كەلەدى.
اۆتور: التىناي ساعىندىقوۆا
