باتىرلاردىڭ ەسىمىن ەلىمىزدىڭ شەكارا زاستاۆالارىنا بەرۋ ۇسىنىلدى
«ەلباسى ءوزىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا: «جاڭا تۇرپاتتى جاڭعىرۋدىڭ ەڭ باستى شارتى - ۇلتتىق كودىڭدى ساقتاي ءبىلۋ. ونسىز جاڭعىرۋ دەگەنىڭىزدىڭ قۇر جاڭعىرىققا اينالۋى وپ- وڭاي»، - دەپ اتاپ كورسەتتى.
ءبىزدىڭ باتىر بابالارىمىز اۋماعى جونىنەن الەمدە توعىزىنشى ورىندى الاتىن، و شەتى مەن بۇ شەتىنە قۇلان جورتسا تۇياعى توزاتىن، قىران ۇشسا قاناتى تالاتىن ۇلان- عايىر جەردىڭ شەبىن عاسىرلار بويى قانىن توكسە دە، ارىن توكپەستەن، جانقيارلىقپەن قورعادى. بۇگىنگى بەيبىت زاماندا ۇلى دالامىزدىڭ شەبىن قورعاۋشى جاۋىنگەر- شەكاراشىلار دا سول باتىر بابالارىمىزدىڭ بۇگىنگى بۋىنى بولىپ تابىلادى. بۇگىندە 5 مەملەكەتپەن شەكتەسەتىن جانە جالپى ۇزىندىعى 15 مىڭ شاقىرىمداي بولاتىن شەكارامىزدا 300-گە جۋىق شەكارا زاستاۆاسى قۇرىلعان. وسى زاستاۆالارعا سان تاراپتان سۇقتانعان جات جۇرتقا اتامەكەننىڭ قارىس قادامىن دا ۇستاتپاي، ۇرپاعىنا تولىق ميراس ەتكەن باتىر بابالارىمىزدىڭ اتىن بەرسەك، ورىندى بولار ەدى»، - دەپ توقتالدى ءماجىلىس دەپۋتاتى باقىتبەك سماعۇل ۇكىمەت باسشىسىنىڭ ورىنباسارى ەربولات دوسايەۆقا جولداعان دەپۋتاتتىق ساۋالىندا.
ونىڭ پايىمىنشا، وسىنداي قادامنىڭ ۇلاعاتتى ۇلگىسى بار.
«2017 -جىلدىڭ 3 - ساۋىرىندە قابىلدانعان №157- ۇكىمەت قاۋلىسىنا سايكەس، وزبەكستانمەن ارامىزداعى شەكاراداعى قىزىلوردا شەكارا وتريادىنىڭ 2019- اسكەري ءبولىمىنىڭ « قىزىلقۇم» شەكارا زاستاۆاسى جانقوجا باتىردىڭ اتىمەن قايتا اتالدى. وسىنىڭ الدىندا، 2014 -جىلى قىزىلوردا وبلىسىنىڭ قازالى اۋدانىندا وتكەن، جانقوجا نۇرمۇحاممەد ۇلىنىڭ 240 جىلدىعىنا ارنالعان رەسپۋبليكالىق اۋقىمداعى ءىس- شارا بارىسىندا قىزىلقۇمداعى شەكارا بەكەتىنە باتىردىڭ ەسىمىن بەرۋ باستاماسىن كوتەرگەن بولاتىنمىن. بۇل باستاما جۇزەگە استى جانە بۇل قازاقستاننىڭ شەكارا قىزمەتى قۇرامىنداعى ونىنشى اتاۋلى زاستاۆا بولىپ وتىر.
بۇل بىرىنشىدەن، ەل شەبى مەن ۇلتتىق قاۋىپسىزدىكتى قورعاۋشى شەكاراشىلارىمىزدى دارحان دالاعا قالقان بولعان باتىر بابالاردىڭ ۇلى رۋحىندا، ماڭگىلىك ەلدىڭ ماقسات- مۇراتىندا تاربيەلەۋگە ۇلەس قوسادى. ەكىنشىدەن، قازاقستان تاريحىندا ەرەكشە ورىن الار تۇلعالاردىڭ اتىن ماڭگى قالدىرۋعا قىزمەت ەتەدى. ۇشىنشىدەن، ەلباسى رۋحاني جاڭعىرۋدىڭ «تۋعان جەر» باعدارلاماسى اياسىندا ۇسىنعانداي، بۇل «ەسىمدەرى ەل ەسىندە ساقتالعان ءبىرتۋار پەرزەنتتەرى» ارقىلى جاس ۇرپاقتىڭ تۋعان جەر تاريحىن تانۋىنا ىقپال جاسايدى» ، - دەيدى دەپۋتات.
ونىڭ سوزىنە قاراعاندا، باتىر بابالار اتىمەن اتالعان شەكارالىق زاستاۆالار - وزگە مەملەكەتتەر ازاماتتارىنا قازاقستاندى ءاز تاريحىن جانە ەر ۇلاندارىن ۇلىقتايتىن، ۇمىتپايتىن، سولاردىڭ بيىك رۋحىمەن رۋحتاناتىن ءور ءارى وركەندى ەل رەتىندە كورسەتىپ تۇرادى. بۇل باستاما مەتسەناتتاردى شەكارالىق زاستاۆالارعا كومەك كورسەتىپ، قامقورلىق جاساۋعا تارتۋعا جول اشادى. ويتكەنى شەكاراشىلار ءوز قىزمەتى ءۇشىن قاجەتتىنىڭ بارلىعىمەن قامتاماسىز ەتىلگەنىمەن، شەكارالىق زاستاۆالاردىڭ كوبى كەڭەس زامانىندا تۇرعىزىلعان جانە ماتەريالدىق- تەحنيكالىق بازاسى توزا باستاعان.
«قۇرمەتتى ەربول اسقاربەك ۇلى، جوعارىدا ايتىلعاندى ەسكەرە وتىرىپ، ەندى بوگەنباي، قابانباي، قاراساي، ناۋرىزباي، ەر جانىبەك، رايىمبەك، جالاڭتوس ءباھادۇر جانە باسقا دا بايىرعىدان بەرگىگە دەيىنگى باتىرلارىمىزدىڭ ەسىمدەرىن ەلىمىزدىڭ ءار وڭىرىندەگى شەكارا زاستاۆالارىنا بەرۋ ماسەلەسىن قاراستىرىپ، ءتيىستى نۇسقاۋ بەرۋىڭىزدى سۇرايمىن. قازاقستاننىڭ ەجەلگى جانە كەيىنگى تاريحىنداعى ۇلى تۇلعالاردى ۇلىقتاۋ ۇلتتىق سانانى جاڭعىرتۋعا باعىتتالعان ماڭىزدى قادامعا اينالارى انىق»، - دەدى باقىتبەك سماعۇل.
اۆتور: رۋسلان عابباسوۆ
