لاس- ۆەگاستاعى اتىس ا ق ش تاريحىندا قارۋ قولدانۋدان قۇرباندار سانى كوپ وقيعا بولدى
ال سوڭعى دەرەككە قاراعاندا، ەگدە تارتقان قاسكويدىڭ قولىنان 59 ادام قازا تاۋىپ، 527 كىسى جارالانعان. ون شاقتى ادام اۋىر حالدە جاتىر. 64 جاستاعى ەسەپشى ستيۆەن پەددوك لاس- ۆەگاسقا وتكەن بەيسەنبى كۇنى كەلگەن. زەينەتكەر «ماندالەي بەي» قوناقۇيىنەن ءدال مۋزىكا فەستيۆالى وتەتىن الاڭعا قارايتىن بولمەنى تاڭداپتى. سونى جالعا العان. ءبىراق وزىمەن بىرگە 10 شابادان الىپ كىرگەن ادام ەشكىمنىڭ كۇدىگىن تۋدىرا قويمايدى. سەبەبى ونىڭ ىلعي كازينودا ۋاقىت وتكىزىپ، وينايتىنىن كوبى بىلگەن. مەسكيت مەكەنىندەگى كورشىلەرىنىڭ سوزىنە سۇيەنسەك، پەددوك ەشقاشان وقىس مىنەزىمەن كوزگە تۇسپەگەن.
ستيۆەن پەددوكتىڭ كورشىسى:
- كورشىلەردىڭ ونىمەن قانشالىقتى جاقسى ارالاسقانىن بىلمەيمىن. ءبىراق ول وتە تۇيىق ادام بولدى. ءتىپتى ۇيىندە بارى دا سەزىلمەيتىن. تەك دالاعا قوقىس شىعارىپ جۇرگەندە عانا كورەتىنمىن.
زەينەتكەرگە قارۋ ساتقان دۇكەن يەسى دە اقتالىپ الەك. قاسكويدىڭ ءون بويىنان جاعىمسىز قاسيەتتىڭ نىشانىن بايقاماعانىن ايتادى. شىنىمەن ول بۇعان دەيىن پوليتسيانىڭ نازارىنا ىلىگىپ، ءىستى بولماعان. اقىل ەسى دۇرىس ەمەس دەپ دارىگەردىڭ تىركەۋىندە دە تۇرماعان.
مايكل كريس، قارۋ- جاراق دۇكەنىنىڭ يەسى:
ول دۇكەنگە كەلگەندە، بۇل وڭىرمەن ونشا جاقسى تانىس ەمەس ەكەنىن جانە ءبىر سوزىندە وسىنداعى بارلىق قارۋ- جاراق دۇكەنىن ارالاپ شىققانىن ايتتى. ال بىزدەن وزىنە قاجەت قارۋدى تاپتىم دەدى. ءبىراق قارۋدى الۋ ءۇشىن زەينەتكەر دۇكەنگە بىرنەشە رەت كەلدى.
ازىرگە قاندى قول زۇلىمنىڭ مۇنداي ارەكەتكە نە سەبەپتى بارعانى بەلگىسىز. پوليتسيانىڭ دەرەگى بويىنشا، زەينەتكەر بۇل ويىن الدىن الا جوسپارلاعان. سەبەبى قاسكويدىڭ كولىگىن ءتىنتۋ كەزىندە جارىلعىش جاساۋ ءۇشىن قولدانىلاتىن حيميالىق قوسپالار تابىلدى.
دجوزەف لومباردو، لاس- ۆەگاس قالاسىنىڭ شەريفى:
- ستيۆەن پەددوكتىڭ مۇنداي ارەكەتكە نە ءۇشىن بارعانى تۋرالى ازىرگە قولىمىزدا دەرەك جوق. قازىر پوليتسەيلەر ونىڭ قاتىسى بار دەگەن ءتورت نىساندا زەرتتەۋ جۇرگىزىپ جاتىر. انىق- قانىعىن ءالى دە تەكسەرەتىن بولامىز.
لاس- ۆەگاستاعى وقيعادان كەيىن ەل ەسىن جيعانداي بولدى. قارۋ- جاراقتىڭ ەمىن- ەركىن ساتىلۋىنا مۇمكىندىك بەرەتىن زاڭ قايتا قارالىپ، تالاپتارىن كۇشەيتۋ كەرەك دەيدى دەموكراتيالىق پارتيانىڭ دەپۋتاتتارى. ولاردىڭ ايتۋىنشا، زاڭنىڭ السىزدىگىنەن بەيبىت تۇرعىندار جازىقسىز جاپا شەگىپ، وققا ۇشىپ جاتىر. دەمەك قارۋ ۇستاۋعا رۇقسات بەرۋ ازاماتتاردىڭ قاۋىپسىزدىگىن قامتاماسىز ەتىپ وتىرعان جوق.
www.24.kz
