ق ر سىرتقى ىستەر مينيسترلىگى كاتالونياداعى احۋالعا وراي پىكىر ءبىلدىردى

استانا. قازاقپارات - ق ر سىرتقى ىستەر مينيسترلىگى كاتالونيادا ورىن العان جايتقا بايلانىستى پىكىر ءبىلدىردى، دەپ حابارلايدى قازاقپارات.

«قازاقستان كاتالونيا اۆتونومدى قاۋىمداستىعىندا ورىن العان جايتتى تەك قانا يسپانيانىڭ ىشكى ءىسى دەپ بىلەدى جانە ونىڭ ودان ارى دامۋى تەك يسپانيانىڭ قولدانىستاعى زاڭناماسى اياسىندا عانا ءورۋى ءتيىس دەپ سانايدى. قازاقستان يسپانيامەن ءوزىنىڭ قارىم-قاتىناسىندا اتالعان ەلدىڭ ەگەمەندىگى مەن اۋماقتىق تۇتاستىعىنا قۇرمەتپەن قاراۋ ۇستانىمىنان تايمايدى»، - دەدى ق ر س ءى م باسپا ءسوز قىزمەتىنىڭ جەتەكشىسى ءانۋار جايناقوۆ قازاقپارات تىلشىسىنە.

ايتا كەتەيىك، 1- قازان، جەكسەنبى كۇنى كاتالونيادا اۆتونوميالىق وبلىستىڭ يسپانيا قۇرامىنان شىعۋىنا قاتىستى جالپى حالىقتىق داۋىس بەرۋ ءوتتى.

مادريد بۇل رەفەرەندۋمدى زاڭسىز دەپ سانايدى. قۇقىق قورعاۋ ورگاندارى پلەبيستسيتتىڭ ءوتۋىن توقتاتۋعا تىرىسىپ، سايلاۋ ۋچاسكەلەرىن جاپتى، جاشىكتەر مەن بيۋللەتەندەردى جاپپاي تاركىلەدى.

بارسەلونا مەرى ادا كولاۋ Twitter- دەگى پاراقشاسىندا كاتالونيادا 460 قا جۋىق ادام زارداپ شەككەنىن جازدى.

«بارسەلونا مەرى رەتىندە پوليتسيانىڭ قورعانسىز حالىققا قارسى ءىس-ارەكەتتەرىن توقتاتۋدى تالاپ ەتەمىن»، - دەدى ول.

كاتالونيا ۇكىمەتىنىڭ رەسمي وكىلى جوردي ءتۋرۋلدىڭ مالىمدەۋىنشە، جەكسەنبى كۇنى يسپانيانىڭ كاتالونيا ايماعىندا وتكەن رەفەرەندۋمدا تۇرعىنداردىڭ %90 تاۋەلسىزدىكتى قولداپ، داۋىس بەرگەن. كاتالونيا ۇكىمەتىنىڭ رەسمي وكىلى باسپا ءسوز ءماسليحاتىندا تاۋەلسىزدىك الۋ تۋرالى باستامانى سايلاۋشىلاردىڭ %7,8 قولداماعانىن، ال %2- ىنىڭ بيۋللەتەندەرى بوس بولىپ شىقسا، %0,89 بۇلىنگەنىن اتاپ ءوتتى.

يسپانيا بيلىگى وسى رەفەرەندۋمعا قاتىستى رەسمي ۇستانىمىن جاريالاپ، داۋىس بەرۋدىڭ ەشقانداي زاڭدى كۇشى جوقتىعىن اتاپ ءوتتى. سەبەبى ول كورولدىكتىڭ كونستيتۋتسياسىنا قايشى كەلەدى.

اۆتور: مارلان جيەمباي